މިހާރު ކުރަމުންދާ ވިއްސާރާގައި ޖެހުނު ގަދަވައިގެ ސަބަބުން، މާލެ ސަރަހައްދުތަކުގައި ދަމާފައިވާ ބެނާ އަދި ދިދަފަތިތައް ކަނޑައިގެންގޮސް ވެއްޓިފައިވާތީ އެތަކެތި ނަގާ ސާފުކުރުމަށް މާލެ ސިޓީ ކައުންސިލުން އެދިއްޖެއެވެ.
މާލެ ސިޓީ ކައުންސިލުން ކުރި އިއުލާނެއްގައި ބުނީ ލޯކަލް ކައުންސިލް އިންތިހާބަށް ކެމްޕެއިން ކުރުމަށް ސިޔާސީ ޕާޓީތަކުންނާއި ކެންޑިޑޭޓުން މާލެ، ވިލިމާލެ އަދި ހުޅުމާލޭގެ އެކި ސަރަހައްދުތަކުގައި ދަމާފައިވާ ބެނާތަކާއި ދިދަފަތިތައް ދަމާފައިވަނީ ދުއްވާ އެއްޗިއްސަށާއި، އާންމު ރައްޔިތުންނަށް ދަތި ވާގޮތަށް ތިރިކޮށްކަން ފާހަގަ ކުރެވޭ ކަމަށެވެ.
އެހެންކަމުން މިހާރު ކުރަމުންދާ ވިއްސާރާގައި ގަދަވަޔާއެކު މާލެ، ވިލިމާލެ އަދި ހުޅުމާލޭގެ އެކިސަރަހައްދުތަކުގައި އެގޮތަށް ދަމާފައިވާ ބެނާ އަދި ދިދަފަތިތައް ކަނޑައިގެންގޮސް ވެއްޓިފައިވާތީ އެތަކެތި ނިސްބަތްވާ ސިޔާސީ ޕާޓީތަކުންނާއި، ކެންޑިޑޭޓުން ވީއެންމެ އަވަހަކަށް އެތަކެތި ނަގާ ސާފުކުރުމަށް ސިޓީ ކައުންސިލުން ވަނީ އެދިފައެވެ.
އޭގެ އިތުރުން މާލެ، ވިލިމާލެ އަދި ހުޅުމާލޭގެ އެކި ސަރަހައްދުތަކުގައި އެގޮތަށް ދަމާފައިހުރި ދިދަފައްޗާއި ބެނާ ފަދަ ތަކެތި އާންމު ރައްޔިތުންނަށާއި ދުއްވާ އެއްޗިއްސަށް ދަތިނުވާނެހެން ރަނގަޅު ކުރުމަށް ވެސް ސިޓީ ކައުންސިލުން ވަނީ އެދިފައެވެ.
ރާއްޖެއަށް ކުރަމުންދާ ވިއްސާރާގައި އިއްޔެ މާލޭގައި އެކި ހާދިސާތައް ވަނީ ހިނގާފައެވެ. އެގޮތުން ބުރުޒު މަގު އެމްޕްލޮއިމެންޓް ޓްރިބިއުނަލް ކައިރި ހުރި ގަހެއް ވެސް ބުޑުން ލުހިގެން ވަނީ މަގުމައްޗަށް އަރިއަރާލާފައެވެ. އަދި ރާޅުގަނޑު ސަރަހައްދުގައި ހުރި ކުރެދި ގަސް ވެސް ވަނީ ބިންދައިގެން ގޮސްފައެވެ. އަދި މަގުމަތިގައި ޕާކު ކޮށްފައި ހުރި ބައެއް ސައިކަލްތައް ވެސް ވަނީ ވަޔާ ވެއްޓިފައެވެ.
