ޔޫއެސް އާމީ ޕެސިފިކްގެ ޑެޕިއުޓީ ކޮމާންޑިން ޖެނެރަލް، މޭޖާ ޖެނެރަލް މެކް ޑެނިއެލް، ޗީފް އޮފް ޑިފެންސް ފޯސް މޭޖާ ޖެނެރަލް އަބްދުﷲ ޝަމާލް އާ ބައްދަލު ކުރައްވައިފިއެވެ.
އެމްއެންޑީއެފުން ބުނީ ބަންޑާރަކޮށީގައި މިއަދު ބޭއްވި އެ ބައްދަލުކުރެއްވުމުގައި ޔޫއެސް އާމީ ޕެސިފިކް ކޮމާންޑާ ގުޅިގެން އެމްއެންޑީއެފްގެ އިންސާނީ ވަސީލަތް ތަރައްގީ ކުރުމަށް ކުރިއަށް ގެންދާނެ އެކިއެކި އަސްކަރީ ތަމްރީނުތަކާ ގުޅޭގޮތުން މަޝްވަރާ ކުރައްވާފައިވާ ކަމަށެވެ.
އެމްއެންޑީއެފުން ބުނީ ޔޫއެސް އާމީ ޕެސިފިކްގެ ޑެޕިއުޓީ ކޮމާންޑިން ޖެނެރަލްގެ މަގާމުގައި ހުންނެވި މޭޖާ ޖެނެރަލް މެކް ޑެނިއެލް އަކީ އޮސްޓްރޭލިއަން އާމީގެ އެކިއެކި ސްޕެޝަލް އޮޕަރޭޝަންނަލް ކޮމާންޑުތަކުގެ ކޮމާންޑަރުކަން ކުރައްވާފައި ވާ ބޭފުޅެއް ކަމަށެވެ. އެގޮތުން ސްޕެޝަލް އެއާ ސާވިސް ރެޖުމަންޓާއި ސްޕެޝަލް އޮޕަރޭޝަން ކޮމާންޑުގެ ކޮމާންޑަރު ކަން ކުރައްވާފައިވާ ކަމަށް އެމްއެންޑީއެފުން ބުނެއެވެ.
އޭނާގެ މި ދަތުރަކީ މިމަ 24 އިން 30 އަށް ރާއްޖެއަށް ކުރައްވަމުން ގެންދަވާ ރަސްމީ ދަތުރެއް ކަމަށް އެމްއެންޑީއެފުން ބުނެއެވެ.
