ރާއްޖެއިން ކޮވިޑް ވެކްސިން ޖެހި މީހުންގެ އަދަދު 212،711 އަށް އަރައިފިއެވެ.
ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ނެރުނު ތަފާސް ހިސާބުތަކުން ދައްކާ ގޮތުން މިއަދު ވެކްސިން ޖަހާފައި ވަނީ 6597 މީހުންނެވެ. އެއީ މާލެ ސަރަހައްދުން ވެކްސިން ޖެހި 4994 މީހަކާއި އަތޮޅުތެރެއިން 1603 މީޙެކެވެ. މިއާއެކު މާލެ ސަރަހައްދުން ވެކްސިން ޖެހި މީހުންގެ ޖުމްލަ އަދަދު ވަނީ 121،630 އަށް އަރާފައެވެ. އަދި އަތޮޅުތެރޭގައި ވެކްސިން ޖެހި މީހުންގެ ޖުމްލަ އަދަދު ވަނީ 91،081 އަށް އަރާފައެވެ.
މާލެ ސަރަހައްދުގެ 8 ވެކްސިނޭޝަން ސެންޓަރެއްގައި ވެކްސިން ޖެހުމުގެ ކަންކަން ކުރިއަށް ދާއިރު، އަތޮޅުތެރޭގެ 169 ސެންޓަރެއްގައި ވެކްސިން ޖެހުމުގެ ކަންކަން ކުރިއަށް އެބަދެއެވެ. އަދި މޮބައިލް ކޮށް ވެކްސިން ޖަހަމުން ދާ 2 ޓީމެއްވެސް މާލެ ސަރަހައްދުގައި ހަރަކާތްތެރި ވެއެވެ.
މީގެ ކުރިން ހެލްތް މިނިސްޓަރު އަހުމަދު ނަސީމް ވިދާޅުވެފައި ވާ ގޮތުގައި މިއަދަކީ މާލެ ސަރަހައްދުގައި ކޮވިޑް ވެކްސިންގެ ފުރަތަމަ ޑޯޒް ޖަހާ ފަހު ދުވަހެވެ. ނަމަވެސް ވެކްސިން ނުޖެހި ތިބި މީހުންނަށް ވެކްސިން ޖެހުމުގެ މަސައްކަތް ކުރިއަށް ގެންދާނެ ކަމަށް ރޭ ބޭއްވި ނޫސްވެރިންގެ ބައްދަލުވުމުގައި އެޗްއީއޯސީގެ ތަރުޖަމާނު ޑރ. ފާތުމަތު ނަޒްލާ ރަފީގް ވިދާޅުވެފައި ވެއެވެ. ކޮވިޑް ވެކްސިން ޖަހަން އެޗްޕީއޭއިން ގޮވާލާ އިރު، ކޮވިޑް ވެކްސިންގެ ފުރަތަމަ ޑޯޒް ޖަހާތާ 8 ހަފްތާއާއި 12 ހަފްތާއާ ދެމެދު ދެވަނަ ޑޯޒް ޖަހަން ޖެހޭ ކަމަށާއި އެކަމަށް އެންމެން ސަމާލު ވުމަށް އެޗްޕީއޭއިން ބުނެއެވެ. އަދި އަންނަ އޭޕްރީލް މަހުގައި ކޮވިޑް ވެކްސިންގެ ދެވަނަ ޑޯޒް ޖަހަން ފަށާނެ ކަމަށް ވެސް ޑރ. ނަޒްލާ ވަނީ ވިދާޅުވެފައެވެ.
މި ދިޔަ މަހުގެ 1 ވަނަ ދުވަހުން ފެށިގެން ކޮވިޑް އިން ރައްކާތެރި ވުމަށް ރާއްޖޭގައި ވެކްސިން ޖަހަން ވަނީ ފަށާފައެވެ. ވެކްސިން ޖަހަން ފެށީ އިންޑިއާއިން ހަދިޔާ ކުރި ކޮވިޝީލްޑް ވެކްސިން އެފްޑީއޭއިން އެޕްރޫވް ކުރުމާއެކުއެވެ. އޭރު އިންޑިއާއިން ހަދިޔާކުރި ކޮވިޝިލްޑްގެ 1 ލައްކަ ޑޯޒްގެ ވެކްސިން ހުސްވެފައި ވާއިރު، ފަހުން ހަދިޔާ ކުރި 1 ލައްކަ ޑޯޒްގެ ކޮވިޝީލްޑް ވެކްސިން ޖެހުމުގެ މަސައްކަތް ދަނީ ކުރަމުންނެވެ. މިހާތަނަށް ރާއްޖޭގައި ޖަހާފައި ވަނީ ހަމައެކަނި ކޮވިޝީލްޑް ވެކްސިނެވެ.
