އިންޑިއާގެ މުމްބާއި އާއި ނ. މާފަރު އިންޓަނޭޝަނަލް އެއާޕޯޓާ ދެމެދު ޑައިރެކްޓް ފްލައިޓްތައް އަންނަ އޭޕްރީލް މަހު ފެށުމަށް ތައްޔާރު ވެއްޖެއެވެ.
މިކަން އިއުލާން ކޮށްފައި ވަނީ މިއަދު މޯލްޑިވިއަނުން ބޭއްވި ނޫސްވެރިންގެ ބައްދަލުވުމުގައެވެ. މޯލްޑިވިއަނުން ބުނީ، މުމްބާއި-މާފަރު ޑައިރެކްޓް ފްލައިޓް ބޭއްވުމުގެ ތައްޔާރީތައް ވެ، ފުރަތަމަ ފްލައިޓް އޮންނާނީ އަންނަ އޭޕްރީލް 13 ވަނަ ދުވަހު ކަމަށެވެ. އެގޮތުން މާފަރު ސަރަހައްދުގެ ރިސޯޓްތަކާއި ގެސްޓްހައުސްތަކުގެ އިތުރުން އިންޑިއާގެ ޓުއާ އޮޕަރޭޓަރުންނާއެކު ވެސް މަޝްވަރާ ކޮށްފައި ވާ ކަމަށް މޯލްޑިވިއަނުން ބުނެއެވެ.
މޯލްޑިވިއަންގެ މެނޭޖިން ޑިރެކްޓަރު މުހައްމަދު މިހާދު ވިދާޅުވީ، މުމްބާއި އާ މާފަރާ ދެމެދުގެ ދަތުރުތައް ފެށުމުން، އެ ފުރުސަތުގެ ބޭނުން، މާފަރު ސަރަހައްދުގެ ރިސޯޓްތަކާއި ގެސްޓްހައުސްތަކުން ފުރިހަމައަށް ހިފާނެ ކަމަށް އުއްމީދު ކުރައްވާ ކަމަށެވެ. އަދި މިހާތަނަށް ވަރަށް ރަނގަޅު ތަރުހީބެއް ލިބިފައިވާ ކަމަށް މިހާދު ވިދާޅުވިއެވެ.
މިހާދު އިތުރަށް ވިދާޅުވީ މާފަރު އެއާޕޯޓް ގާއިމްކޮށްފައި ވަނީ ގާތްގަނޑަކަށް 10،000 ޓޫރިސްޓް އެނދު ހިމެނޭ ސަރަހައްދެއްގައި ކަމަށެވެ. އެއީ ނ، ރ، ބ، ޅ، ހަތަރު އަތޮޅު ކަމަށެވެ.
އޭނާ ވިދާޅުވީ މުމްބާއި-މާފަރު ފްލައިޓްތައް ފަށަނީ ހަފްތާއަކު 3 ފްލައިޓް ކަމަށާއި، ވަރަށް އަވަހަށް އިންޑިއާގެ އެހެން ސިޓީތަކުން ވެސް މާފަރަށް ދަތުރުތައް ފަށާނެ ކަމަށް އުއްމީދު ކުރައްވާ ކަމަށް އޭނަ ވިދާޅުވިއެވެ.
އެއާބަސް އޭ 320 މަރުކާގެ މަތިންދާބޯޓު ޖެއްސޭގޮތަށް، 2200 މީޓަރުގެ ރަންވޭ އަކާއެކު، ތަރައްގީ ކޮށްފައިވާ މާފަރު އެއާޕޯޓަކީ، ޔުނައިޓެޑް އަރަބް އެމިރޭޓްސް (ޔޫއޭއީ)ގެ އަބޫދާބީ ފަންޑުން ސިންގަޕޫރުގެ 'ޓަފް އޮފްޝޯ' ނަމަކަށް ކިޔާ ކުންފުންޏަކާ ހަވާލުކޮށްގެން ކުރިއަށް ގެންދިޔަ މަޝްރޫއެކެވެ.
