ގަވާއިދާ ހިލާފަށް ރާޢްޖޭގެ ސަރަހައްދުގައި މަސްވެރިކަން ކުރަން އުޅެނިކޮށް އިއްޔެ އަތުލައިގަތް ބޭރުގެ މަސް ބޯޓު ހދ. ކުޅުދުއްފުއްޓަށް ގެންގޮސްފިއެވެ.
އެމްއެންޑީއެފުން ބުނީ ނ. އަތޮޅު ބޮއެ ގެ އުތުރުން 30 މޭލު ބޭރުން 8 މީހުންނާއެކު އިއްޔެ ފެނުނު ބޭރުގެ މަސް ބޯޓު އެމްއެންޑީއެފް ނޯތު އޭރިއާ ކޯސްޓް ގާޑު ސްކޯޑަންގެ ބެލުމުގެ ދަށަށް ގެނެސް ރޭ މެންދަމު 01:15 ހާއިރު ކުޅުދުއްފުއްޓަށް ވައްދާފައިވާ ކަމަށެވެ.
މިމައްސަލަ ސަރުކާރުގެ ކަމާ ގުޅުން ހުރި އިދާރާތަކާ ގުޅިގެން ތަހުގީގު ކުރަމުންދާ ކަމަށް އެމްއެންޑީއެފުން ވަނީ ބުނެފައެވެ.
މި މަސް ބޯޓު ފެނިފައިވަނީ ނ. އަތޮޅު ބޮއެ ގެ އުތުރުން 30 މޭލު ބޭރުން ދާ އަޅައިގެން މަސްވެރިކަން ކުރަމުންދަނިކޮށް އެސަރަހައްދުގައި މަސްވެރިކަން ކުރަމުންދިޔަ "އާސަރީ" ދޯންޏަށެވެ.
ރާއްޖެ އަކީ ކަނޑުގެ ސަރަހައްދު ބޮޑު ގައުމަކަށް ވެފައި ރާއްޖޭގެ ކަނޑުގެ ސަރަހައްދުން ގަވާއިދާ ހިލާފަސް މަސްވެރިކަން ކުރަން ދޭތެރެ ދޭތެރެއިން އުޅަނދުތައް ވަދެއެވެ.
އާންމުކޮށް ރާއްޖޭގެ ކަނޑުގެ ސަރަހައްދަށް ވަންނަ މި ބާވަތުގެ އުޅަނދުތައް އިތުރަށް ބަލާ ފާސް ކުރާ އިރު މަސްތުވާތަކެތި ފެންނަ ނިސްބަތްވެސް މަދެއް ނޫނެވެ.
