ޓޫރިޒަމް މިނިސްޓަރަކަށް ހުންނަވައި މުވައްޒަފުންތަކަކަށް ޖިންސީ ގޯނާކުރި މައްސަލައިގައި ހަތް ދައުވާއެއް އުފުލާފައިވާ ކުރީގެ ޓޫރިޒަމް މިނިސްޓަރު އަލީ ވަހީދު ބޭރަށް ފުރުވާލުމުގައި ޕްރޮސިކިއުޓަ ޖެނެރަލް (ޕީޖީ) ހުސެއިން ޝަމީމް އަމަލު ކުރައްވާފައި ވަނީ ރަނގަޅަށް ތޯ ބަލައިދޭން ރައްޔިތުންގެ މަޖިލީހުގެ ހިމެނޭ އަންހެން މެންބަރުން މިއަދު އެދިވަޑައިގެންފިއެވެ.
މި މައްސަލަ މަޖިލީހުގެ ޖުޑިޝަރީ ކޮމިޓީ އަށް ހުށަހަޅުއްވައި ދެއްވަން މަޖިލީހުގެ ރައީސް މުހައްމަދު ނަޝީދުގެ އަރިހުން އެދިވަޑައިގަތީ މަޖިލީހުގެ ނައިބު ރައީސް އީވާ އަބްދުﷲ އާއި ތުޅާދޫ ދާއިރާގެ މެންބަރު ހިސާން ހުސެއިނާއި ހިންނަވަރު ދާއިރާގެ މެންބަރު ޖީހާން މަހްމޫދުގެ އިތުރުން އައްޑޫ މީދޫ ދާއިރާގެ މެންބަރު ރޮޒައިނާ އާދަމް އެވެ.
19 ވަނަ މަޖިލީހުގެ 85 މެންބަރުންގެ ތެރޭގައި ހިމެނިވަޑައިގަންނަވާ ހަތަރު އަންހެން މެންބަރުން ހުށަހެޅި ސިޓީގައި ވަނީ، ޖިންސީ އަނިޔާ ދިނުމުގެ މިފަދަ ބޮޑެތި ސީރިއަސް ތުހުމަތުތަކެއް ކޮށް ތަހުގީގު ކުރެވި ދައުވާ އުފުލިފައިވާ މައްސަލައެއްގައި ދައުވާ އުފުލާފައިވާ ފަރާތަށް ރާއްޖެއިން ބޭރަށް ފުރައިގެން ދެވިފައި ވުމަކީ ކަންބޮޑުވާ ކަމެއްގެ ގޮތުގައެވެ. އަދި އެގޮތަށް ކަން ހިނަގއިގެން ދިއުމަކީ މި މައްސަލައިގައި އަނިޔާ ލިބުނު ފަރާތްތަކަށް ތަހައްމަލް ކުރަން ޖެހުނު އިތުރު އަނިޔާއެއް ކަމަށް އެ ސިޓީގައި ވެއެވެ.
އަލީ ވަހީދު ކޯޓަށް ހާޒިރުކޮށް ޝަރީއަތް ފެށުމުގެ ގޮތުން ޕީޖީން އަޅަން ނިންމާފައި ހުރި ފިޔަވަޅުތަކަކީ ކޮބައިކަން ސާފުކޮށް ދިނުމަށް އެ ސީޓިގައި ބުނެފައި ވެއެވެ. މީގެ އިތުރުން މި ޒާތުގެ މައްސަލަތައް ތަކުރާރު ވިޔަ ނުދިނުމަށްޓަކައި ޖިނާއީ އަދުލުގެ ނިޒާމުގެ ތެރެއިން ގެންނަން ޖެހޭ ބަދަލުތަކަކީ ވެސް ކޮބައިތޯ ދެނެގަނެ އެ ބަދަލުތައް ތަންފީޒު ކުރުމަށްޓަކައި އެޅެން ހުރި ފިޔަވަޅުތައް އެޅުމަށް ވެސް ސިޓީގައި ވެއެވެ.
އަލީ ވަހީދުގެ ޕާސްޕޯޓް ހިފަހައްޓަން ނެރެފައިވާ އަމުރު ބާތިލު ކޮށް ކްރިމިނަލް ކޯޓުން ގާޒީ ހަސަން ސައީދު ސޮއިކުރައްވައިގެން ނެރުނު އަމުރުގައި ބުނެފައި ވަނީ އަލީ ވަހީދު ފުރުން މަނާކޮށް ޕާސްޕޯޓް ހިފަހައްޓާފައި އޮތް އޮތުން ނިމުމަކަށް ގެނެސްފައި ވަނީ ޕްރޮސެކިއުޓާ ޖެނެރަލްގެ އޮފީހުން އެދިގެން ކަމަށެވެ. އަލީ ވަހީދު ރާއްޖެއިން ބޭރަށް ދާން ޖެހޭކަން ކަށަވަރު ކުރުމުގެ ގޮތުން ޑރ. ޔޫސުފް ޝާން ކޯޓަށް ހާޒިރުުކޮށް އޭނާގެ ވާހަކަތައް އަޑު އަހާފައިވާ ކަަމަށް އެ އަމުރުގައި ބުނެއެވެ.
އެ ކޮޓު އަމުރު ނެރުނު ފަހުން ރޭ ޕްރޮސެކިއުޓާ ޖެނެރަލް ހުސައިން ޝަމީމް ވަނީ ކޯޓް އަމުރުގައި އޮތީ އޮޅުމެއް ކަމަށް ވިދާޅުވެފައެވެ. އަދި އެކަން ހިނގައި ދިޔަ ގޮތް ސާފުކޮށްދީ ޕީޖީން ބަޔާނެއް ނެރޭނެ ކަމަށް އޭނާ ވަނީ ވިދާޅުވެފައެވެ.
މިއަދު ޕީޖީން ނެރުނު ބަޔާނުގައި ބުނެފައި ވަނީ ކްރިމިަލް ކޯޓުން އަލީ ވަހީދުގެ ޕާސްޕޯޓް ދޫކުރަން ނިންމި އަޑުއެހުން ނިންމާލި އިރު އަލީ ވަހީދު ރާއްޖެއިން ބޭރަށް ފުރާވަޑައިގެންފައި ކަމަށް މައުލޫމާތު ލިބިފައި ވާތީ އެ ނިންމުމަކީ ރަނގަޅު ނިންމުމެއް ކަމަށް ނުދެކޭ ކަމަށެވެ.
މި މަހުގެ 9 ވަނަ ދުވަހު މެންދުރު ފަހު 1:30 ގައި ކްރިމިނަލް ކޯޓުގައި ބާއްވަން ތާވަލް ކުރި އަލީ ވަހީދުގެ އަޑުއެހުން ފަށާފައި ވަނީ އެދުވަހުގެ 14:30 ގެ ފަހުން ކަމަށެވެ. އަދި އެ އަޑު އެހުން ނިންމާލާފައި ވަނީ އެ ދުވަހު ހަވީރު 4 ޖެހި ފަހުން ކަމަށް ޕީޖީން ބުނެއެވެ. އަލީ ވަހީދުގެ ޕާސްޕޯޓް ހިފަހައްޓަން ނެރެފައިވާ އަމުރު ބާތިލު ކޮށްލުމުން ރާއްޖެ ދޫކޮށް އޭނާ ފުރާ ވަޑައިގެންފައި ވަނީ މި މަހުގެ 9 ވަނަ ދުވަހުގެ ހަވީރު ޓާކިޝް އެއާލައިނުގައި ލަންޑަނަށެވެ.
އަލީ ވަހީދުގެ ޕާސްޕޯޓް ދޫކޮށްފައި ވަނީ 4 މަސް ދުވަހަށެވެ. އަދި ޖާމިނުވާ ފަރާތެއްގެ ގޮތުގައި ހަމަޖައްސާފައި ވަނީ ޔޫތް މިނިސްޓްރީގެ ސްޓޭޓް މިނިސްޓަރު އަސްއަދު އަލީ (އަޑުބަރޭ) އެވެ.
