ކޮވިޑް-19ގެ ތިންވަނަ ރާޅު ދިވެހިރާއްޖެއަށް ކުރިމަތިވެފައިވައިވާ މި ދަނޑިވަޅުގައި ޑިޖިޓަލް ހިދުމަތްތައް ބޭނުން ކުރުމަށް ދިރާގުން އިލްތިމާސް ކޮށްފިއެވެ.
ދިރާގުން ބުނީ ކަސްޓަމަރުންގެ ސަލާމަތާއި ރައްކާތެރިކަމަށް ޓަކައި ދިރާގުގެ ހިދުމަތްތައް ހޯދުމަށާއި ބިލްތަކަށް ފައިސާ ދެއްކުމަށް ދިރާގު "މައިއެކައުންޓް" އަދި ދިރާގު މޯބައިލް އެޕްލިކޭޝަން ފަދަ ޑިޖިޓަލް ހިދުމަތްތައް ބޭނުން ކުރުމަށް ދިރާގުން އެދޭ ކަމަށެވެ.
އެގޮތުން އިންޓަނެޓް އަދި މޮބައިލް ޕެކޭޖްތައް ބަދަލުކޮށް، ފިކްސްޑް ބްރޯޑްބޭންޑް އާއި މޮބައިލް ޕެކޭޖްތަކުގެ ޔޫސޭޖް ތަފުސީލު ބަލާފައި، ބިލް ދައްކާ، އަދި ދިރާގުގެ އެކި ހިދުމަތްތަކަށް އެދުމަށް ކަސްޓަމާ ކެއާ ސެންޓަރު ތަކަށް ދިޔުމުގެ ބަދަލުގައި އޮންލައިން ކޮށް އެޕްލައި ކުރުން ފަދަ ގިނަ ފަސޭހަތައް "މައިއެކައުންޓް" ހިދުމަތް މެދުވެރިކޮށް ކަސްޓަމަރުންނަށް ލިބިގެން ދާނެ ކަމަށް ދިރާގުން ބުނެއެވެ.
ދިރާގު ކަސްޓަމާ ސާވިސް ސެންޓަރުތައް މިހާރު ހުޅުވާފައި ވީނަމަވެސް، ކަސްޓަމަރުންނަށް ހިދުމަތް ދެވޭނީ ކުރީބައިގައި އެޕޮއިންޓްމެންޓެއް ހައްދައިގެން ކަމަށާއި އެޗްޕީއޭ އިން އަންގަވާފައިވާ ގައިދުރުކުރުމުގެ އިރުޝާދުތަކުގެ މަތިން ކަމަށް ދިރާގުން މައުލޫމާތު ދެއެވެ.
ދިރާގުން ބުނީ ކަސްޓަމާ ސާވިސް ސެންޓަރުތަކުގައި ކޮންމެ ދުވަހަކު ހިދުމަތް ދޭނީ ވަކި އަދަދެއްގެ ކަސްޓަމަރުންނަށެވެ. އެ ސްލޮޓްތައް ދިނުމުގައި އާ ކަސްޓަމަރުންނަށް އިސްކަންދެވޭނެ ކަމަށް ވެސް ދިރާގުން ބުނެއެވެ. އެހެންކަމުން ދިރާގުގެ ހިދުމަތްތައް މިހާރު ގެންގުޅުއްވާ ކަސްޓަމަރުން ކައިއެކައުންޓް މެދުވެރިކޮށް ހިދުމަތް ހޯދުމަށް ދިރާގުން އިލްތިމާސްކުރެއެވެ.
ދިރާގުގެ "މައިއެކައުންޓް" ހިދުމަތައް މިހާތަނަށް ރެޖިސްޓާ ކުރައްވާފައިނުވާ ކަސްޓަމަރުން www.dhiraagu.com.mv/ocs މި ލިންކް މެދުވެރިކޮށް ރަޖިސްޓާ ކުރެވޭނެއެވެ.
ކޮވިޑް-19ގެ ކޭސްތައް އިތުރު ވަމުން ދާ މި ދަނޑިވަޅުގައި ދިރާގުން އެދެނީ މިދުވަސްވަރު ހުރިހާ ކަސްޓަމަރުންވެސް ރައްކާތެރިކަމާއެކު ގޭގައި ތިބުމަށާއި އެޗްޕީއޭގެ ލަފަޔާ އިރުޝާދުތަކާ އެއްގޮތަށް ހުރިހާ ކަސްޓަމަރުންވެސް އަމަލު ކުރުމަށެވެ. ދިރާގުން މަސައްކަތްކުރަމުންދަނީ ކަސްޓަމަރުން ގޭގައި ތިބެންޖެހުނަސް ދިރާގުގެ ހިދުމަތްތައް ބޭނުން ކުރުމަށް ލުއިފަސޭހަތައް ފޯރުކޯށްދީ ކަސްޓަމަރުންގެ ޑިޖިޓަލް ތަޖްރިބާ އިތުރަށް ފުރިހަމަކޮށް ދިނުމަށެވެ.
