އޮބްލޫ ސިލެކްޓް ސަންގެލި ރިސޯޓުން ފެނިފައިވާ ކޮވިޑް ޕޮޒިޓިވް ކޭސްގެ އަދަދު 83 އަށް އަރައިފިއެވެ.
ހެލްތު އެމަޖެންސީ އޮޕަރޭޝަން ސެންޓާ (އެޗްއީއޯސީ) އިން މިރޭ ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އެޗްއީއޯސީގެ ތަރުޖަމާނު ޑރ. ފާތުމަތު ނަޒްލާ ރަފީގް ވިދާޅުވީ، މިހާރު އޮބްލޫ ސިލެކްޓް ސަންގެލި ރިސޯޓުން ޕޮޒިޓިވް ވެފައިވާ މީހުންގެ އަދަދު 83 އަށް އަރާފައިވާ އިރު ކޮންޓެކްޓް ޓްރޭސިންގް މަސައްކަތް އެ ރިސޯޓުގައި ކުރަމުން ދާ ކަމަށެވެ.
އޮބްލޫ ސަންގެލި ފެނުނު ކޭސްތަކުގެ ތަފްސީލް ދެއްވަމުން ނަޒްލާ ވިދާޅުވީ، މި މަހުގެ 22 ވަނަ ދުވަހު އެ ރިސޯޓުން 3 މީހަކު ޕޮޒިޓިވް ވެފައި ވާ ކަމަށާއި އަދި އިއްޔެ އެ ރިސޯޓުން 2 މީހަކު ޕޮޒިޓިވް ވެފައި ވާ ކަމަށެވެ.
މި މަހުގެ 3 ވަނަ ދުވަހު ބަލީގެ އަލާމާތްތައް ހުރެގެން އެ ރިސޯޓުން ޓެސްޓު ކުރި 3 މީހަކު ބައްޔަށް ޕޮޒިޓިވް ވެފައިވާ އިރު މި މަހުގެ 11 ވަނަ ދުވަހުގެ ބަލީގެ އަލާމާތް ހުރެގެން ޓެސްޓު ކުރި 2 މީހަކު ވަނީ ބައްޔަށް ޕޮޒިޓިވް ވެފައެވެ. އެ ކޭސްތަކާ ގުޅިގެން ނެގި ރެންޑަމް ސާމްޕަލް ތަކުން 27 މީހަކު މި މަހުގެ 13 ގައި ޕޮޒިޓިވް ވެފައި ވާއިރު މި މަހުގެ 14 ވަނަ ދުވަހު 10 މީހަކު ޕޮޒިޓިވް ވެފައި ވާ ކަމަށް އެޗްއީއޯސީން ބުނެފައި ވެއެވެ.
އޮބްލޫ ސަންގެލި ރިސޯޓުގެ އިތުރުން ރެސިޑެންސް މޯލްޑިވްސް ރިސޯޓުން މިހާތަނަށް 15 ކޭސް ވަނީ ފެނިފައެވެ. ހަމައެއާއެކު އަނަންތަރާ އިން 31 ޕޮޒިޓިވް ކޭސް އަދި އިރުވެލި ރިސޯޓުން 6 ކޭސް ފެނިފައިވާ ކަމަށް ނަޒްލާ ވިދާޅުވިއެވެ.
