ވައްކަމުގެ މައްސަލަތައް ގިނަވަނީ މުދަލަށް ދޭ ސަމާލުކަން ކުޑަވާތީ ކަމަށް ފުލުހުން ބުނެފިއެވެ.
ފުލުހުންގެ ވެބްސައިޓުގައި ޝާއިރުކޮށްފައި ލިޔުމެއްގައި ބުނީ ފުލުހުންނަށް ހުށަހަޅާ ވައްކަމުގެ މައްސަލަތަކަށް ބަލާއިރު، މުދަލަށް ދޭންވާ އެކަށީގެންވާ ސަމާލުކަން ނުދެވުމުގެ ސަބަބުން ހިނގާފައިވާ ވައްކަމުގެ މައްސަލަތައް ހިމެނޭ ކަމަށެވެ.
އެގޮތުން ތަޅުދަނޑި ޖަހާފައި ހުއްޓައި ސައިކަލު ވަގަށް ނެގުމާއި ސައިކަލު ޕޮކެޓުގައި ފޯނު ފަދަ ތަކެތި ބަހައްޓާފައި ސައިކަލު ޕާކުކޮށްފައި ދިއުމުން ވަގަށް ނެގުމާއި ސައިކަލު މަޑިދަށުގައި ތަކެތި ބެހެއްޓުމުން ވަގަށް ނަގާފައިވާ މައްސަލަތަކުގެ އިތުރުން ގެދޮރު ތަޅުނުލާ ހުއްޓާވަދެ ވައްކަން ކޮށްފައިވާ މައްސަލަތައް ހިމެނޭ ކަމަށް ފުލުހުން ވަނީ ބުނެފައެވެ.
ފުލުހުންގެ ތަފާސް ހިސާބުތަކަށް ބަލާއިރު 2019 ވަނަ އަހަރު ވައްކަމުގެ 4552 މައްސަލައެއް ފުލުހުންނަށް ހުށަހަޅާފައިވެއެވެ. އަދި ފާއިތުވި އަހަރު 3581 މައްސަލައެއް ހުށަހަޅާފައިވާއިރު މިއަހަރުގެ މިހާތަނަށް ވައްކަމުގެ 178 މައްސަލައެއް ހުށަހަޅާފައިވާ ކަމަށް ފުލުހުން ވަނީ ބުނެފައެވެ.
ފުލުހުން ބުނީ ވައްކަމުގެ މައްސަލަތައް އިތުރުވިޔަ ނުދިނުމާއި މިފަދަ މައްސަލަތައް މަދުކުރުމަށް މާލެއާއި އަތޮޅުތަކުގައި ފުލުހުން ގިނަ މަސައްކަތްތަކެއް ކުރަމުންދާ ކަމަށެވެ. މިގޮތުން މިފަދަ މައްސަލަތައް މަދުކުރުމަށް އާންމު ރައްޔިތުން ހޭލުންތެރި ކުރުވުމަށް މައުލޫމާތު ދިނުމުގެ ޕްރޮގްރާމްތައް ވެސް ސިލްސިލާކޮށް ކުރިއަށް ގެންދާ ކަމަށް ފުލުހުން ވަނީ ބުނެފައެވެ.
ވައްކަމުގެ މައްސަލަތަކަކީ އާންމު ރައްޔިތުންގެ އެހީތެރިކަމާއި އެއްބާރުލުން ލިބިގެން ނޫނީ ހުއްޓުވޭނެ ކަން ފާހަގަކުރައްވާ ފުލުހުން ބުނީ ފުރަތަމަ ކަމަކީ ފަރުދީ ޒިންމާ އަދާކުރުން ކަމަށެވެ. އެގޮތުން ގެންގުޅޭ އަގުބޮޑު ފޯނާއި ލެޕްޓޮޕާއި ވޮލެޓް ފަދަ ތަކެތި ރައްކާތެރިކަމާއެކު ބެލެހެއްޓުމަކީ އެ ތަކެތި ގެންގުޅޭ ފަރާތުގެ ޒިންމާއެއް ކަމަށް ފުލުހުން ވަނީ ބުނެފައެވެ. އަދި ބޭރުތެރޭގައި އުޅޭއިރު މިފަދަ އަގުބޮޑެތި ތަކެތި އެހެން މީހުންނަށް ފެންނާނެހެން ހާމަކޮށްފައި ނުބެހެއްޓުން ވެސް މުހިންމު ކަމަށް ފުލުހުން ބުނެއެވެ.
އޭގެ އިތުރުން ގޭގައި ހުންނަ އަގު ބޮޑެތި ތަކެތި ވެސް ހާމަކަން ބޮޑު ގޮތެއްގައި ބެހެއްޓުމަކީ ރައްކާތެރި ގޮތެއް ނޫން ކަމަށާއި ގެއިން ބޭރަށް ކުޑަ ވަގުތުކޮޅަކަށް ދިޔަ ނަމަވެސް ގޭގެ ދޮރުތައް ރަނގަޅަށް ތަޅުލެވުނުތޯ ޔަގީން ކުރަންވާނެ ކަމަށް ފުލުހުން ވަނީ ބުނެފައެވެ.
ހަމައެހެންމެ ބޭރުގައި އޮންނަ ފައިފުހި ދަށުގައި ނުވަތަ އެހެން ތަނެއްގައި ވިޔަސް ތަޅުދަނިޑި ނުބާއްވަން ފުލުހުން އެދެއެވެ. އަދި މޫދަށް އެރޭއިރު ވެސް ވައްކަން ކުރާ މީހުންގެ އަތުޖެހޭގޮތަށް ދަބަހާއި ފޯނު އަދި ވޮލެޓު ނުބޭއްވުމަށާއި އަދި ސައިކަލު ޕާކުކޮށްފައި ދިއުމުގެ ކުރިން ތަޅުދަނޑި ނެގުނުތޯ ޔަގީން ކުރުމަށް ވެސް ފުލުހުން ވަނީ އެދިފައެވެ.
މީހަކު ނުވަތަ ބަޔަކު ވައްކަމުގެ އަމަލެއް ހިންގާތަން ފެނިއްޖެނަމަ ނުވަތަ އެފަދަ ކަމަކަށް ޝައްކުކުރެވޭ ކަމެއް ފެނިއްޖެނަމަ 3322111، 3322112 ނުވަތަ އިމަޖެންސީ ނަންބަރު 119 އަށް ގުޅާ މައުލޫމާތު ހިއްސާކުރުމަށް ފުލުހުން ވަނީ އެދިފައެވެ. އަދި އަތޮޅު ތެރޭގައި ނަމަ އެ އަތޮޅެއްގެ ނުވަތަ އެ ރަށެއްގެ ޕޮލިސް ސްޓޭޝަނަށް މައުލޫމާތު ހިއްސާކުރުމަށް ފުލުހުން ވަނި އެދިފައެވެ.
ވަގުން ވައްކަން ކުރަނީ ފުލުހުންނާ ކަމާ ގުޅޭ ވުޒާރާ ތަކުން ވަގުންނަށް ވައްކަން ކުރުމުގެ ފުރުސަތު ދީ އަދި ވަގުންނަށް ވައްކަން ކުރުމުން އެ ކަމަށް ހައްގު އަދަބު ނުދީ މި މުޖުތަމައުގަ އެމީހުން ބޭނުން ވައްކަމެއް ކުރަން ފުރުސަތު ފަހިކޮއްދީފައި ވާތީ.