ހުޅުމާލެ ފޭސް-2 ގައި ސިފައިންގެ އަސްކަރީ ތަމްރީނު ތަކެއް ކުރިއަށް ގެންދިއުމަށް ހަމަޖެހިފައިވާ ކަމަށް އެމްއެންޑީއެފުން ބުނެފިއެވެ.
އެމްއެންޑީއެފުން ބުނީ ސިފައިންގެ އަސްކަރީ ތަމްރީނެއް މިއަދުން، ޖަނަވަރީ 16، 2021 އަށް ހުޅުމާލެ ފޭސް-2 ގައި ބޭއްވުމަށް ހަމަޖެހިފައިވާ ކަމަށެވެ.
މި ތަމްރީނުގައި ސިމިއުލޭޝަންގެ ގޮތުގައި ސިފައިން ބޭނުންކުރާ ހަތިޔާރާއި ގޮވާތަކެތި ބޭނުންކުރުމަށް ހަމަޖެހިފައިވާ ކަމަށް އެމްއެންޑީއެފުން ވަނީ ބުނެފައެވެ.
އެމްއެންޑީއެފުން ދަނީ ދޭތެރެ ދޭތެރެއިން މިފަދަ އަސްކަރީ ތަމްރީނުތައް ބާއްވަމުންނެވެ. އެގޮތުން މި މަހުގެ 10 އިން 16 އަށް ސިފައިންގެ ހާއްސަ ތަމްރީން ޕްރޮގްރާމެއް ދ. އަތޮޅުގެ ކަނޑިންމަ ރިސޯޓް ހިމެނޭ ފަޅުގައި އޮންނަ ފަޅު ރަށްތަކުގައި ކުރިއަށް އެބަދެއެވެ. މި ތަމްރީނުތަކުގައި ބައެއް ބާވަތްތަކުގެ ޕައިރޯޓެކްނިކް ބޭނުން ކުރާނެ ކަމަށްވެސް އެމްއެންޑީއެފުން ބުނެއެވެ.
އޭގެ އިތުރުން މި މަހުގެ 7 އިން 10 އަށް ސިފައިންގެ ހާއްސަ ތަމްރީން ޕްރޮގްރާމެއް ޅ. އަތޮޅުގެ ރަށްރަށުގައި ވަނީ ކުރިއަށް ގެންގޮސްފައެވެ. އެ ތަމްރީން ތަކުގައި ސިފައިން ހަތިޔާރާއެކު ހަރަކާތްތައް ހިންގާފައި ވާއިރު ބައެއް ބާވަތްތަކުގެ ޕައިރޯޓެކްނިކްސް ވެސް ވަނީ ބޭނުން ކޮށްފައެވެ.
ސިފައިންގެ މިފަދަ ތަމްރީންތައް ހިންގަނީ ރާއްޖޭގެ ސަލާމަތަށް ނުރައްކަލެއް އޮވެގެން ނޫން ކަމަށް އެމްއެންޑީއެފުން ވަނީ މީގެ ކުރިން ވެސް ބުނެފައެވެ.
