ނިމިދިޔަ 2020 ވަނަ އަހަރަށް ކަނޑައެޅި ފަތުރުވެރިކަމުގެ ޓާގެޓަށްވުރެ އިތުރަށް އަހަރު ނިމުނުއިރު ބައި ލައްކަ ފަތުރުވެރިން ޒިޔާރަތް ކޮށްފައިވާ ކަމަށް ޓޫރިޒަމް މިނިސްޓްރީގެ ތަފާސް ހިސާބުތަކުން ދައްކައިފިއެވެ.

ޓޫރިޒަމް މިނިސްޓްރީގެ ތަފާސް ހިސާބުތަކުން ދައްކާ ގޮތުގައި ކޮވިޑް-19 އާ ހެދު ފަތުރުވެރިކަން ހުއްޓި ދިޔައިރު ރާއްޖެ ޒިޔާރަތް ކޮށްފައި ވަނީ 382760 ފަތުރުވެރިންނެވެ. އަދި ބޯޑަރު ބަންދުކޮށްފައި އޮތް ދުވަސް ވަރު ވެސް ރާއްޖެއަށް 87 ފަތުރުވެރިން ޒިޔާރަތް ކުރިއިރު، އަހަރު ނިމޭއިރަށް ހާސިލުކުރަން ކަނޑައެޅި ޓާގެޓަކީ 5 ލައްކަ ފަތުރުވެރިންނެވެ.

ނަމަވެސް ބޯޑަރު އަލުން ހުޅުވުމުން ރާއްޖެ ޒިޔާރާ ފަތުރުވެރިންގެ އަދަދު އިތުރު ވެގެން ދިޔައެވެ. ޖުލައި 15 އިން ޑިސެމްބަރު 30 ގެ ނިޔަލަށް 169،964 ފަތުރުވެރިން ޒިޔާރަތް ކޮށް، ރާއްޖެއިން ކަނޑައެޅި 5 ލައްކަ ފަތުރުވެރިންގެ ޓާގެޓް އަހަރު ނިމުމުގެ ދެ ހަފްތާ ކުރިން ހާސިލު ކުރިއެވެ.

ޖުލައި 15ގައި ބޯޑަރު ހުޅުވިފަހުން މިވީ 5 މަސް ދުވަސް ތެރޭގައި ރަޝިއާއިން ވަނީ 31800 ފަތުރުވެރިން ރާއްޖެ އައިސްފައެވެ. އަދި އިންޑިއާއިން 27667 ފަތުރުވެރިން އައިސްފައި ވާއިރު، އިނގިރޭސި ވިލާތުން ވަނީ 19،686 ފަތުރުވެރިން ރާއްޖެ އައިސްފައެވެ. މީގެ އިތުރުން ރާއްޖެއަށް އެންމެ ގިނަ ފަތުރުވެރިން ޒިޔާރަތްކުރި ގައުމުތަކުގެ ތެރޭގައި ޔޫއެސްއޭ، ޖަރުމަނު، ފްރާންސް، ޔޫއޭއީ، ޔޫކްރެއިން، ކަޒަގަސްތާނުގެ އިތުރުން ސްޕެއިން ހިމެނެއެވެ.

ފަތުރުވެރިކަމުގެ ދާއިރާގައި ކޮވިޑް-19ގެ ހާލަތު އޮތް ގޮތަށް ބަލާލާއިރު، ބޯޑަރު ހުޅުވިފަހުން ރާއްޖެ ޒިޔާރަތްކުރި ފަތުރުވެރިންގެ ތެރެއިން 288 މީހަކު ވަނީ ކޮވިޑް-19 އަށް ޕޮޒިޓިވްވެފައެވެ. މީގެ ތެރެއިން 220 މީހަކު ބަލިން ރަނގަޅުވިއިރު، 68 މީހުން އަދިވެސް ތިބީ ބަލިކޮށެވެ.

ކޮވިޑް-19ގެ ސަބަބުން ރާއްޖޭގެ ފަތުރުވެރިކަމުގެ ސިނާއަތު އެފުށް މިފުށަށް ޖެހިގެން ދިޔުމަށްފަހުން އަލުން އަނބުރާ ކޮޅަށް ޖެހުމުގެ މަސައްކަތް ދަނީ ކުރަމުންނެވެ. އެގޮތުން، މިހާތަނަށް 141 ރިސޯޓާއި 265 ހޮޓެލް އަދި ގެސްޓްހައުސްގެ އިތުރުން 130 ސަފާރީ އޮޕަރޭޓް ކުރަމުން އެބަދެއެވެ. އެއީ 41580 އެނދެވެ.

ހަބަރު ބޯޑަރު ހުޅުވާލުން ޓުއަރިޒަމް