2021 ވަނަ އަހަރު، ރާއްޖެއަށް ޒިޔާރަތް ކުރި ފުރަތަމަ ފަތުރުވެރިޔާއަށް ހޫނު މަރުހަބާއެއް ކިޔައިފިއެވެ.
މިއަދު ހެނދުނު ގަތަރު އެއާވޭޒްގެ ފްލައިޓުގައި ރާއްޖެ އެތެރެވި މިއަހަރުގެ ފުރަތަމަ ފަތުރުވެރިޔާ އަކީ ޖަރުމަނު ވިލާތަށް ނިސްބަތްވާ މީހެކެވެ. ޖޮސެން ޕައުލް ކާޗް ނަމަކަށް ކިޔާ މި ފަތުރުވެރިޔާ ރާއްޖެ ދަތުރު ކޮށްފައި ވަނީ އޭނާގެ އާއިލާއާ އެކުއެވެ. ޓޫރިޒަމް މިނިސްޓްރީ، އެމްއެމްޕީއާރްސީ، އެމްއޭސީއެލްގެ އިތުރުން އިމިގްރޭޝަނުން ވެސް ވަނީ ޖޮސެން އަށް ހޫނު މަރުހަބާއެއް ކިޔާފައެވެ.
ފުރަތަމަ ފަތުރުވެރިޔާއަށް ރާއްޖޭގެ ފަރާތުން ދިން ހަދިޔާ އަކީ ސަން އައިލެންޑް ރިސޯޓް އެންޑް ސްޕާއިން ޑަބަލް ރޫމެއްގައި 7 ރޭގެ ހުރުމެވެ. ރާއްޖޭގެ ފަރާތުން މި ހަދިޔާ ޖޮސެން އަށް ދީފައި ވަނީ އެމްއެމްޕީއާރްސީގެ މެނޭޖިން ޑިރެކްޓަރު ތޮއްޔިބު މުހައްމަދެވެ.
ފުރަތަމަ ފަތުރުވެރިޔާއަށް މަރުހަބާ ކިއުމާއެކު މިއަދު ވެލާނާ އިންޓަނޭޝަނަލް އެއާޕޯޓުގައި ވަނީ އިމިގްރޭޝަންގެ ބޯޑާ މައިލްސް ޕްރޮގްރާމް އިފްތިތާހު ކޮށްފައެވެ. ކޮންމެ ފަތުރުވެރިޔަކަށް ވެސް ސައިޓް މެދުވެރިކޮށް ބައިވެރިވެވޭ މި ޕްރޮގްރާމްގައި ރާއްޖޭގެ ބޯޑަރު ހުރަސް ކުރާ ކޮންމެ ފަހަރަކު ޕޮއިންޓްތައް އިތުރު ވަމުން ދާނެއެވެ. މިއަދު ރާއްޖެ އައި މިއހަަރުގެ ފުރަތަމަ ފަތުރުވެރިޔާއަށް ވަނީ މި ޕްރޮގްރާމުގައި ބައިވެރިވުމަށް ހިލޭ މެންބާޝިޕް ދީފައެވެ.
މި އަހަރުގެ ފަތުރުވެރިކަމުގެ ޓާގެޓެއް ކަމަށް ކަނޑައަޅާފައި ވަނީ 1،500،000 ފަތުރުވެރިންނެވެ.
