ފޮރިން މިނިސްޓަރު އަބްދުﷲ ޝާހިދު ޒުވާންް ދުވަސްވަރު ކުޅެން އުޅުއްވި ތަނުގައި ހެދި ފުޓްސަލް ދަނޑު ހުޅުވައިފިއެވެ.
ލޮނުޒިޔާރަތްކޮޅުގައި ރޭ ފުޓްސަލް ދަނޑު ހުޅުވުމަށް ބޭއްވި ޖަލްސާ ޝަރަފުވެރި ކޮށްދެއްވާ މިނިސްޓަރު ޝާހިދު ވަނީ އެދުވަސްތަކުގެ ހަނދާން އާކުރައްވާފައެވެ.
މިނިސްޓަރު ވިދާޅުވީ އެ ދަނޑުގައި ހުއްޓުމުން ހަނދާން ސޮއްސާލައިގެން ދަނީ، "ބޮލުގައި ތަންކޮޅެއް ގިނައިން އިސްތަށި ހުރި ޒަމާނަކަށް" ކަމަށެވެ. އެގޮތުން އެއީ މަދުރަސީ ދައުރު ކަން ފާހަގަ ކުރައްވާ މަދަރުސާގައި އުޅުއްވި ޒަމާނުގައި ސްކޫލް ނިމޭ ރަނގަބީލު ޖަހާނީ 3:25 ގައި ކަމަށާއި ހަނދާން ހުންނަ ގޮތުން، 3:45 ގައި ހުންނަވަނީ އެ ސަރަހައްދުގައި ކަމަށް ޝާހިދު ވިދާޅުވިއެވެ.
މިނިސްޓަރު ޝާހިދު ވިދާޅުވީ އެ ތަނަށް ކިޔަނީ އަޑި ޕާކު ކަމަށާއި އެތަނުގައި އޮންނާނީ މަޑު ފަސްގަނޑަކާ އަކިރި ކަމަށެވެ. އަދި ކުޅޭ ބޯޅަ ތައްޔާރު ކޮށްފައި ހުންނާނީ ފުއްޕާހަމުގެ ވަށައިގެން ފޮތި އޮޅައިގެން ކަމަށް މިނިސްޓަރު ޝާހިދު ވަނީ ފާހަގަ ކުރައްވާފައެވެ.
މަޝްހޫރު ނަން ހިނގާ ކުޅުންތެރިންގެ ތެރެއިން ކުޑަ މޫސަ އާއި އަންދަރޭ ކަހަލަ ކުޅުންތެރިންނަކީ އެ ފަސްގަނޑުގައި އުފެދިގެން އައި ކުޅުންތެރިން ކަމަށް މިނިސްޓަރު ވަނީ ވިދޅުވެފައެވެ.
މިނިސްޓަރު ޝާހިދު ވިދާޅުވީ މިއަދުގެ ސަރުކާރުގައި ޒުވާނުންގެ ކަންތައްތަކާ ހަވާލުވެ ހުންނެވި ވަޒީރު، މަހުލޫފު ވަޒީރުކަމުގައި ހޭދަ ކުރެއްވި ގާތްގަނޑަކަށް 25 މަސް ދުވަހުގެ ތެރޭގައި ކޮންމެ މަހަކު ދޮޅު ދަނޑުގެ ނިސްބަތުން ގެންދެވީ ރާއްޖޭގެ އެކި ސަރަހައްދުތަކުގައި ދަނޑުތައް ގާއިމް ކުރަމުން ކަމަށެވެ.
މިނިސްޓަރު ވިދާޅުވީ މުޅި އަހަރުގެ ބޮޑުބައި ކޮވިޑްގައި މުޅި ރާއްޖެ ބަންދުވެފައި، އެންމެން ގެދޮރުގައި ބަންދުވެފައި ކަން ކުރެވޭނެ އެއްވެސް ގޮތެއް ނެތި ތިބި ނަމަވެސް މަހުލޫފަކަށް ގޮތެއް ހުހެއް ނުވި ކަމަށްވެ.
ރައީސް އިބްރާހިމް މުހައްމަދު ސޯލިހު ރައީސްކަމުގެ ހުވާ ކުރައްވާފައި ޖެހިގެން އައި ދުވަހު ހަށިހެޔޮ ދުޅަހެޔޮ އީދެއް ފާހަގަކުރެއްވީ ކީއްވެގެން ކަން އަބަދު ވެސް ހަނދާނުގައި ބަހައްޓަން ޖެހޭ ކަމަށް ވިދާޅުވަމުން ޝާހިދު ވިދާޅުވީ އެ ދުވަހު އަމާޒު ހިއްޕެވީ ޒުވާނުންނަށް ފުރިހަމަ ސިއްހަތަކާއެކު ކުޅިވަރު ކުޅެ، ޒުވާނުންގެ ކަންތައްތަކަށް ހިތްވަރު ދިނުމަށް ކަމަށެވެ. އަދި މިދިޔަ 25 މަސް ދުވަހުގެ ތެރޭގައި ވަރަށް ދަތި ދުވަސްތަކަކާއެކު ވެސް ގެންދެވީ އެމަސައްކަތުގައި ސާބިތުކަމާއެކު ކަމަށް މިނިސްޓަރު ފާހަގަކުރެއްވިއެވެ.
