ހއ. އިހަވަންދޫ އިން އެމްއެންޑީއެފަށް ހޫނު މަރުހަބާއެއް ކިޔައިފިއެވެ.
އެމްއެންޑީއެފުން ބުނީ 66 ވަނަ އަސާސީ ތަމްރީނު ކޯހުގެ ޝަރަފުގެ ހިނގާލުން ބޭއްވުމަށް އިހަވަންދޫއަށް ދިޔަ ސިފައިންނަށް ބަނދަރުމަތިން އެރަށުގެ ރައްޔިތުން ހޫނު މަރުހަބާއެއް ކިޔާފައިވާ ކަމަށެވެ.
ސިފައިންގެ 66 ވަނަ އަސާސީ ތަމްރީނު ކޯހުގެ ދަސްވެނިވުމުގެ ޝަރަފުގައި އެރަށުގައި ހިނގާލުން ފެށުމަށް ހަމަޖެހިފައިވަނީ މިއަދު ހަވީރު 04:30 ގައެވެ. އެ ހިނގާލުން ފެށުމަށް ހަމަޖެހިފައިވަނީ އިހަވަންދޫ ސްޓޭޓް ހައުސް ކުރިމަތިން ކަމަށް އެމްއެންޑީއެފުން ވަނީ ބުނެފައެވެ.
އެމްއެންޑީއެފުން ބުނީ އެރަށުގައި މިރޭ 08:00 ގައި ހަވާ އަރުވާ ގޮތަށް ވެސް ހަމަޖެހިފައިވާ ކަމަށެވެ.
އެމްއެންޑީއެފުން ވަނީ ޝަރަފުގެ ހިނގާލުން ބޭއްވުނު ހދ. ކުޅުދުއްފުށީ އަދި ހއ. ދިއްދޫގައި ވެސް ސިފައިންނަށް ހޫނު މަރުހަބާއެއް ކިޔާފައިވާ ކަމަށެވެ.
ސިފައިންގެ 66 ވަނަ އަސާސީ ތަމްރީނު ކޯހުގެ ދަސްވެނިވުމުގެ ޝަރަފުގައި ދެ ރަށެއްގައި އެމްއެންޑީއެފުން ވަނީ ހަވާ ވެސް އަރުވާފައެވެ. އެގޮތުން ކުޅުދުއްފުށީގައި ހަވާ އަރުވާފައިވަނީ މިމަހު 17 ވަނަ ދުވަހުއެވެ. އަދި ދިއްދޫގައި ހަވާއަރުވާފައިވަނީ ރޭގައެވެ.
ސިފައިންގެ 66 ވަނަ އަސާސީ ތަމްރީނު ކޯހުގެ ދަސްވެނިވުމުގެ ޝަރަފުގެ ހިނގާލުން ކުރިއަށް ދާ ދުވަސްތަކުގައި ސިފައިންގެ ވަޒީފާއަށް ވަނުމަށް ޝައުގުވެރިވާ ފަރާތްތަކަށް ސިފައިންގެ އާއި ސިފައިންގެ ވަޒީފާ އާ ގުޅޭ ގޮތުން މައުލޫމާތު ދިނުމުގެ ޕްރޮގުރާމުތަކެއް ކުރިއަށް ގެންދިއުމަށް ހަމަޖެހިފައިވާ ކަމަށް އެމްއެންޑީއެފުން ވަނީ ބުނެފައެވެ.
އެގޮތުން މިއަދު ކުޅުދުއްފުށި އަތޮޅު ތައުލީމީ މަރުކަޒުގައި ސިފައިންގެ ވަޒީފާއަށް ވަނުމަށް ޝައުގުވެރިވާ ފަރާތްތަކަށް ސިފައިންގެ އާއި ސިފައިންގެ ވަޒީފާ އާ ގުޅޭ ގޮތުން މައުލޫމާތު ދީފައިވާ ކަމަށް އެމްއެންޑީއެފުން ބުނެއެވެ.
