ށ. ފޭދޫގައި ކުރީގެ ކްލާސް ރޫމެއްގެ ގޮތުގައި ބޭނުން ކުރަމުން ދިޔަ އިމާރާތެއްގައި އަލިފާން ރޯވެ އަނދައިފިއެވެ.
"ދަ ޕްރެސް" އަށް މައުލޫމާތު ދެއްވަމުން ފޭދޫ ކައުންސިލްގެ ނައިބު ރައީސް މުހައްމަދު ޝާމިރު ވިދާޅުވީ އެހާދިސާ ހިނގާފައި ވަނީ މިއަދު 11:00 ހާއިރު ކަމަށެވެ. އަދި އަލިފާން ރޯވި އިމާރާތަކީ މިހާރު ވެސް ބައްދަލުވުން ތަކާއި ޖަލްސާތައް ބާއްވަމުން އަންނަ ހޯލަކާ ގާތްގަނޑަކަށް ވިހި ފޫޓު ދުރުގައި ހުރި އިމާރާތެއް ކަމަށް ޝާމިރު ވިދާޅުވިއެވެ.
އަލިފާންގަނޑު ނިއްވާލުމަށް ރަށުގެ ރައްޔިތުން ވެސް މަސައްކަތް ކޮށްފައި ވާ ކަން ފާހަގަ ކުރައްވާ ޝާމިރު ވިދާޅުވީ އެމްއެންޑީއެފުން އެތަނަށް އައުމުގެ ކުރިން އެއިމާރާތް އެއްކޮށް އަނދާ ހުލިވެ، އަލިފާންގަނޑު ވެސް ނިވިފައިވާ ކަމަށެވެ.
ޝާމިރު ވިދާޅުވީ އަލިފާން ރޯވަން ދިމާވި ސަބަބު އެނގިފައިނުވާ ކަމަށެވެ.
ގުދަނެއްގެ ގޮތުގައި ބޭނުންކުރި އެއިމާރާތުގައި ބައެއް ފޮތްތަކާއި ފަރުނީޗަރުތަކެއް ވެސް ބަހައްޓާފައިވާ ކަމަށް ޝާމިރު ވަނީ ވިދާޅުވެފައެވެ.
އެމްއެންޑީއެފުން ބުނާގޮތުން އެހާދިސާގެ ރިޕޯޓު ލިބިފައިވަނީ މިއަދު 11:20 ހާއިރުއެވެ.
ފޭދޫ ކުރީގެ ސުކޫލު އިމާރާތެއްގައި އަލިފާނުގެ ހާދިސާ ހިނގާފައިވާއިރު ރޭ ދަންވަރު ހއ. މަނަފަރު ރިސޯޓްގައި އިންޖީން ގޭގައި އަލިފާނުގެ ހާދިސާއެއް ވަނީ ހިނގާފައެވެ. މި ހާދިސާ އެމްއެންޑީއެފަށް ރިޕޯޓްކޮށްފައި ވަނީ ރޭގެ ދަންވަރުގެ 3:35 ހާއިރު ކަމަށާއި ރިޕޯޓް ކުރުމުން ހދ. ކުޅުދުއްފުށީ ފަޔާ ސްޓޭޝަންގެ އެމްއެންޑީއެފްގެ ފަޔާ ޓީމް ވަނީ ހަރަކާތްތެރި ވެފައި ކަމަށް އެމްއެންޑީއެފުން ބުނެއެވެ.
އެގޮތުން އެ އަލިފާން ކޮންޓްރޯލް ކުރެވިފައި ވަނީ ފަތިހު 5:45 ހާއިރު ކަމަށް އެމްއެންޑީއެފުން ބުނެއެވެ.
އޭގެ އިތުރުން އިއްޔެ ހެނދުނުވެސް ވަނީ ދޯންނެއްގައި އަލިފާނުގެ ހާދިސާއެއް ހިނގައިގެން ތިން މީހަކު ފިހިފައެވެ.
