މިދިޔަ ބުރާސްފަތި ދުވަހު ރާއްޖެއިން، ބަންގްލަދޭޝްއަށް ފުރުވާލި 200 މީހުންގެ ތެރެއިން ގިނަ މީހުންގެ އަތުގައި ނެގެޓިވް ޕީސީއާރު ޓެސްޓެއް ނެތުމުން ގައުމީ އެއާލައިން މޯލްޑިވިއަން ޖޫރިމަނާކޮށްފިއެވެ.
"ދަ ޕްރެސް" އަށް މައުލޫމާތު ދެއްވަމުން މޯލްޑިވިއަންގެ ޕަބްލިކް ރިލޭޝަންސް ކޮމިއުނިކޭޝަން މެނޭޖަރު މޫސާ ވަސީމް ވިދާޅުވީ ނެގެޓިވް ޕީސީއާރު ޓެސްޓެއް ނެތުމުން މޯލްޑިވިއަން ޖޫރިމަނާކުރި ކަމަށާއި ޖުރިމަނާގެ ސަބަބުން ދައްކަން ޖެހޭ ހުރިހާ ފައިސާއެއް މިހާރު ދައްކާފައިވާ ކަމަށެވެ.
މޯލްޑިވިއަންއިން ބުރާސްފަތި ދުވަހު ބަންގްލަދޭޝަށް ގެންދިޔަ 200 މީހުންގެ ތެރެއިން ގިނަ މީހުންގެ އަތުގައި ކޮވިޑް-19 އިގެ ނެގެޓިވް ނަތީޖާނެތް ކަމަށް ހަޒުރަތު ޝާހުޖަލާލް އިންޓަނޭޝަނަލް އެއާޕޯޓް (އެޗްއެސްއައިއޭ)ގެ އެގްޒެކެޓިވް މެޖިސްޓްރޭޓް އަހުމަދު ޒާމިލް އެގައުމުގެ މީޑިއާތަކަށް ވަނީ ވިދާޅުވެފައިއެވެ.
އެ ރިޕޯޓުތަކުން ބުނާ ގޮތުގައި ޖޫރިމަނާކުރި އަދަދަކީ 236،000 ބަންގްލަދޭޝީ ޓާކާއެވެ. އެއީ ޔޫއެސް ޑޮލަރުން ބަލާނަމަ 2785.97 ޑޮލަރެވެ. އެއީ ދިވެހި ރުފިޔާއިން ނަމަ ގާތްގަނޑަކަށް 42،900 ރުފިޔާއެވެ.
ބަންގްލަދޭޝްގެ ސިވިލް އޭވިއޭޝަނުން ވަނީ މިމަހުގެ ފަސް ވަނަ ދުވަހުން ފެށިގެން ބަންގްލަދޭޝަށް އެތެރެވާ ހުރިހާ މީހުންގެ އަތުގައި، 72 ގަޑިއިރުނުވާ ކޮވިޑް-19 އިގެ ނެގެޓިވް ޓެސްޓެއް އޮންނަންޖެހޭ ގޮތަށް ލާޒިމުކޮށްފައިއެވެ. އެ ފިޔަވަޅު އަޅާފައިވަނީ، ބަންގްލަދޭޝްގައި ކޮވިޑް-19 ގެ ދެވަނަ ރާޅެއްގެ ނުރައްކާ ކުޑަކުރުމަށްކަމަށް ސިވިލް އޭވިއޭޝަނުން ވަނީ ބުނެފައެއެވެ.
އަދި އެ އުސޫލުގެ ދަށުން، ކޮވިޑް ސެޓްފިކެޓެއްނެތި، އެއްވެސް ފަސިންޖަރަކަށް ބޯޑިންޕާސް ދޫނުކުރުމަށް، އެޗްއެސްއައިއޭ އަށް އޮޕަރޭޓުކުރާ ހުރިހާ އެއާލައިންތަކަށް އަންގާފައިވާކަމަށް ވަނީ ބުނެފައިއެވެ.
