ކަނޑައެޅިގެން ވަކި ފަރުވާއެއް ހޯދިފައި ނުވާ ކޮރޯނާވައިރަސް ޑިޒީޒް (ކޮވިޑް-19) އަށް ޕޮޒިޓިވްވާ މީހުންގެ އަދަދު ރެކޯޑް މިންވަރަކަށް އިތުރުވަމުން ދިއުމާ ގުޅިގެން ތުރުކީވިލާތުގެ އިސްތަންބޫލްއިން އާންމުން އެއްވުންތަކާ ދެކޮޅަށް ހަރުކަށި ފިޔަވަޅުތަކެއް އަޅައިފިއެވެ.
އެގޮތުން، އިސްތަންބޫލްގެ ކަމާ ބެހޭ ފަރާތްތަކުން ވަނީ، ކައިވެނި ހަފުލާތަކާ، އެންޖޭޖްމަންޓް ޕާޓީތަކާ، ހިތާނީތައް ބަންދު މާހައުލުތަކުގައި ބޭއްވުން މަނާކޮށްފައެވެ. މި ދަނޑިވަޅަކީ އިސްތަންބޫލްއިން ރެކޯޑް އަދަދަކަށް ކޭސް ރެކޯޑް ކުރަމުންދާ ދަނޑިވަޅެކެވެ.
ބަންދު މާހައުލްތަކުގައި ޕާޓީތަކާ ހަފުލާތައް ނުބޭއްވޭ ގޮތަށް ހަމަޖައްސާފައިވާއިރު، އައުޓްޑޯ އިވެންޓްތަކުގައިވެސް، 60 އަހަރުން މަތީގެ މީހުންނާ، ކުޑަކުދިންނަށް ބައިވެރި ނުވެވޭނެ ކަމަށް އިސްތަންބޫލް ގަވަރުނަރުގެ އޮފީހުން މައުލޫމާތު ދެއެވެ.
ތުރުކީވިލާތުން އިއްޔެ 1549 މީހަކު ކޮވިޑް-19އަށް ޕޮޒިޓިވް ވެފައި ވާއިރު، 39 މީހަކު ވަނީ މަރުވެފައެވެ. މިއާއެކު ތުރުކީވިލާތުން ކޮވިޑް-19 ޖެހުނު މީހުންގެ ޖުމުލަ އަދަދު 267064 އަށް އަރާ، މަރުވި މީހުންގެ އަދަދު 6284 އަށް ވަނީ އަރާފައެވެ. ތުރުކީވިލާތުގައި މިވަގުތު އެކްޓިވް ކޭހުގެ ގޮތުގައި 17968 ކޭހެއް ރެކޯޑް ކޮށްފައިވާކަމަށް ރެކޯޑްތަކުން ދައްކައެވެ.
