އެފްރިކާއިން ޕޯލިއޯ ބަލި ނައްތާލެވިފައި ވާ ކަމަށް، މިނިވަން މުއައްސަސާ، އެފްރިކާ ރީޖަނަލް ސެޓިފިކޭޝަން ކޮމިޝަނުން އިއުލާން ކޮށްފިއެވެ.
އާންމު ގޮތެއްގައި، އުމުރުން 5 އަހަރުން ދަށުގެ ކުދިންނަށް ޖެހޭ ޕޯލިއޯ ބައްޔަކީ، ވާގި ނެތުމުގެ ސަބަބުން އިޔާދަ ނުކުރެވޭ ވަރުގެ ގެއްލުންތަކާވެސް ކުރިމަތި ކުރުވާ ބައްޔެކެވެ. ނޭވާލާ ނިޒާމާ ގުޅިފައިވާ މަސްތަކަށް މި ބަލީގެ އަސަރު ކޮށްފި ނަމަ، މަރާވެސް ކުރިމަތިވެއެވެ.
މީގެ 25 އަހަރު ކުރިއަށް ނަޒަރު ހިންގާއިރު، އެފްރިކާގެ އެތައް ހާސް ކުދިންނަކީ ޕޯލިއޯ ބަލީގައި ވާގި ނެތިމުގެ ތަކުލީފުތައް އުފުލަމުންދިޔަ ކުދިންނެވެ. މުޅި ދުނިޔޭގެ އަދުގެ ހާލަތަށް ބަލާއިރު، މި ބަލި މިހާރު އުޅެނީ ހަމައެކަނި އަފްގާނިތާނާއި ޕާކިސްތާނުގައި ކަން ފާހަގަކުރަންޖެހެއެވެ.
ޕޯލިއޯ ބައްޔަކީވެސް ކަނޑައެޅިގެން ވަކި ފަރުވާއެއް ހޯދިފައިވާ ބައްޔެއް ނޫނެވެ. ނަމަވެސް، ޕޯލިއޯ ބަލިން ދިފާއު ކޮށްދޭ ވެކްސިން ހުރެއެވެ.
އެފްރިކާ ސަރަހައްދުން އެންމެ ފަހުން ޕޯލިއޯ ބަލި ނައްތާލީ ނައިޖީރިއާއިންނެވެ. ނައިޖީރިއާއަކީ، މީގެ 10 ވަރަކަށް އަހަރު ކުރިއަށް ބަލާއިރު، މުޅި ދުނިޔޭގައި ތިބި ޕޯލިއޯ ޕޭޝަންޓުންގެ ދެބައިކުޅަ އެއްބައި ހާ ޕޭޝަންޓުން ހިއްސާ ކުރި ގައުމެކެވެ. ނަމަވެސް، ނައިޖީރިއާގައި ވަނީ ޕޯލިއޯ ބައްޔާ ދެކޮޅަށް ފުޅާދާއިރާއެއްގައި ވަރުގަދަ ކެމްޕޭނެއް ހިންގާފައެވެ.
ޕޯލިއޯއަކީވެސް އެކެއްގެ ހަށިގަނޑުން، އަނެކާކެ ހަށިގަނޑަށް ވާރުތަކުރާ ވައިރަހަކުން ޖައްސާ ބައްޔެކެވެ. އާންމު ގޮތެއްގައި މި ބަލި ފެތުރެނީ ތަގައްޔަރުވެފައިވާ ފެނުގެ ޒަރިއްޔާއިންނެވެ. ޕޯލިއޯ ޖައްސާ ވައިރަހުގެ އަސަރު ކުރުމުން މީހާ ވާގި ނެތި ކޮށްލަނީ، ނާރުތަކުގެ ނިޒާމަށް ހަމަލާ ދީގެންނެވެ.
