ކޮވިޑަށް ފަރުވާދޭން ވީ މީހާ ކަނޑައަޅަން ގުރުއަތުލާން ޖެހިއްޖެއްޔާ ވަރަށް ދެރަވާނެ ކަމަށް ޓެގް ޓީމުން ބުނެފިއެވެ.
މިހާރު ކުރިއަށް ދާ ޕްރެސް ކޮންފަރެންސްގައި ވާހަކަ ދައްކަވަމުން ޑރ. އަލީ ލަތީފު ވިދާޅުވީ، ރާއްޖޭގައި ކޮވިޑަށް ޕޮޒިޓިވް ވާ މީހުންގެ އަދަދުތަކަށް ބަލާއިރު، ކޮވިޑަށް ފަރުވާ ދޭން ހުރި ވަސީލަތްތައް ފުރި، ފުރަތަމަ ފަރުވާ ދޭނީ ކާކަށްތޯ ކަނޑައެޅަން ޖެހޭ ހިސާބަށް ގޮސްފިނަމަ އެއީ ވަރަށް ދެރަކަމެއް ކަމަށެވެ.
ޓްރައޭޖް ކުރުމަކީ ފަރުވާދޭން ޖެހޭ ފަރާތްތައް، އެމީހެއްގެ ބަލި ހާލަތު ހުރިގޮތެއް ބެލުމަށްފަހު އިސްކަންދޭނެ ގޮތެއް ކަނޑައެޅުމެވެ.
މި ކަމާ ގުޅޭގޮތުން ވާހަކަ ދައްކަމުން ޑރ. ނަޒުލާ މުސްތަފާ ވިދާޅުވީ، މިހާރު ބަލިމީހާއަށް ފަރުވާ ދޭން ތިބޭ ނަރުހުންނާއި ސިއްހީ އެހީތެރިންގެ އަދަދު މަދުވުމާއި އަރާމެއް ނެތި މަސައްކަތް ކުރަން ޖެހުމުން ބޮޑެތި ގޮންޖެހުންތަކާ ދަތިތަކާ ދިމާވާ ކަމަށެވެ. އަދި ބައެއް ފަހަރު ބަލި މީހުން އެކަނި ގިނަ ވަގުތު އެނދުގައި އޮންނަން ޖެހުން ފަދަ ކަންކަން ދިމާ ވެ، ބައެއް މީހުން 5-6 ކިލޯ ލުއިވެފައިވެސް އެބަ ހުރި ކަމަށެވެ. އަދި ކޮވިޑްގައި ޕޮޒިޓިވް ވާ ނިސްބަތުގެ އިތުރުން، ނިޔާވި މީހުންނަކީ ހަމައެކަނި ނަންބަރެއް ނޫން ކަމަށާއި އެއީ ކޮންމެވެސް އާއިލާއެއްގެ މެންބަރެއް ކަމަށް ވިދާޅުވެ ކަމުގެ ސީރިއަސް ކަން ޑރ. ނަޒުލާ ފާހަގަ ކުރެއްވިއެވެ.
ކޮވިޑަށް ޕޮޒިޓިވް ވާ ނިސްބަތް ގިނަވަމުންދާ މައްސަލައިގައި ވާހަކަ ދައްކަވަމުން ދެ ޑޮކްޓަރުންވެސް އިލްތިމާސް ކުރެއްވީ، ކަމާބެހޭ ފަރާތްތަކުން ދޭ އިރުޝާދުތައް އަޑުއަހާ އަމަލު ކުރުމަށެވެ. އެހެން ނޫންނަމަ ރާއްޖޭގެ ސިއްހީ ނިޒާމަށް ނުތަކާ ވަރަށް ޕޮޒިޓިވް ކޭސް ގިނަ ވެ، ގޮތް ހުސްވެދާނެ ކަމަށެވެ.
ރާއްޖޭގައި ކޮވިޑްގެ ހާލަތަށް ބަލާއި، މިހާރު ޕޮޒިޓިވް ވެފައި ތިބި ކޮންމެ 30 މީހަކަށް ހުރީ އެންމެ ނަރުހެކެވެ. އަނދުގެ ހާލަތަށް ބަލާއިރު، މާލެ ސަހަރައްދުގެ 62 ޕަސެންޓް އެނދު މިހާރު ހުރީ ފުލް ވެފައެވެ. ކޮވިޑް ޖެހި ބަލި މީހުންގެ ގޮތުގައި 2531 މީހުން މިހާރުވެސް ރާއްޖޭގައި އެބަ ތިއްބެއެވެ.
