ކޮވިޑް-19 އަށް ޕޮޒިޓިވްވެފައިވާ އާއިލީ ފަރާތަކާ ކޮންޓެކްޓް ވުމުގެ ސަބަބުން ހޯމް ކަރަންޓީން ވެގެން ހުންނެވި ހެލްތް އިމަޖެންސީ އޮޕަރޭޝަން ސެންޓަރު (އެޗްއީއޯސީ)ގެ ތަރުޖަމާނު ޑރ. ނަޒްލާ ރަފީގުގެ ހާލު ރަނގަޅު ކަމަށް އޭނާ ވިދާޅުވެއްޖެއެވެ.

ރޭ އެޗްއީއޯސީން ބޭއްވި ނޫސްވެރިންގެ ބައްދަލުވުގައި 'ދަ ޕްރެސް' އިން ކުރި ސުވާލަކަށް ޖަވާބު ދެއްވަމުން ޑރ. ނަޒްލާ ވިދާޅުވީ އޭނާގެ ހާލު ރަނގަޅު ކަމަށާއި، ހައި ރިސްކް މީހަކަށް ނުވުމުގެ ސަބަބުން އަދި ޓެސްޓު ނުކުރައްވާ ކަމަށެވެ. އަދި ޓެސްޓު ކުރައްވާނީ 14 ދުވަސް ފަހުން ކަމަށް އޭނާ ވިދާޅުވިއެވެ.

މިއަދު ޑރ. ނަޒްލާ ނޫސްވެރިންގެ ބައްދަލުވުގައި ބައިވެރިވެ ވަޑައިގެންފައި ވަނީ ގޭގައި ހުންނަވައިގެންނެވެ.

ޑރ. ނަޒްލާ އަކީ އެޗްއީއޯސީގެ ތަރުޖަމާނަށް ވާއިރު އޭނާ ގެންދަވަނީ އެޗްއީއޯސީ އިން ބާއްވާ ނޫސްވެރިންގެ ބައްދަލުވުންތަކުގައި އެންމެ އިސްކޮށް ހަރަކާތްތެރިވެ ވަޑައިގަންނަވަމުންނެވެ.

އަދި މިހާތަނަށް ޑރ. ނަޒްލާ ޓެސްޓުކޮށްފައި ނުވާއިރު، އެޗްއީއޯސީގެ އުސޫލު އޮންނަ ގޮތުން، ޕޮޒިޓިވް މީހުންނާ ކޮންޓެކްޓްވާ މީހުންގެ ތެރެއިން ވަގުތުން ޓެސްޓު ކުރަނީ ހައި ރިސްކު މީހުންނެވެ. އެއީ އުމުރުން ދުވަސްވީ މީހުން، ކުޑަކުދިން، އަދި ބޮޑެތި ބަލިތަކަށް ބޭސްކުރާ މީހުންނެވެ. ދެން ތިބި މީހުން ޓެސްޓު ކުރާނީ 14 ދުވަސް ހަމަވެ، ކަރަންޓީނުން ދޫކުރަން ވީމައެވެ.

ހަބަރު އެޗްއީއޯސީ