ހަލުވިކަމާއެކު ފެތުރެމުންދާ ކޮރޯނާވައިރަސް ޑިޒީޒް (ކޮވިޑް-19) ކޮންޓްރޯލް ކުރުމަށް ގާތްގަނޑަކަށް 3 މަހެއްހާ ދުވަހަށް ބަންދުކޮށްފައި އޮތުމަށްފަހު، މާދަމާއިން ފެށިގެން މައްކާގެ މިސްކިތްތައް ހުޅުވުމަށް ސައުދީ އަރަބިއްޔާއިން ރާވާފައިވާކަމަށް އެ ގައުމުގެ ދައުލަތުގެ ޓީވީއާއި ހަވާލާދީ ބައިނަލްއަގުވާމީ މީޑިއާއިން ރިޕޯޓް ކޮށްފިއެވެ.
ކޮވިޑް-19އާ ގުޅިގެން ސައުދީން ވަނީ މައްކާގައި، ވަކިން ވަރުގަދަ ފިޔަވަޅުތަކެއް އަޅާފައެވެ.
އިސްލާމިކް މިނިސްޓްރީގެ ނިންމުމަށް ރިއާޔަތް ކޮށް ސައުދީ އަރަބިއްޔާގެ އަލް-އިޚްބާރިޔާ ޗެނަލުން ކުރި ރިޕޯޓަކާ ހަވާލާދީ ބައިނަލްއަގުވާމީ މީޑިއާއިން ހާމަކުރި ގޮތުގައި، 1500 އެއްހާ މުގައްދަސް ސައިޓްތަކެއް އަލުން ހުޅުވާލާ، މެހެމާނުންނަށް މަރުހަބާ ކިއުމުގެ ތައްޔާރީތައް މިހާރު ދަނީ ކުރިއަށެވެ. އެގޮތުން ތަޅުންގަނޑާ ކާޕެޓް ޑިސްއިންފެކްޓް ކުރުމުގެ މަސައްކަތްވެސް ކުރިއަށްދާ ކަމަށް ޚަބަރު ލިބެއެވެ.
މައްކާގެ މިސްކިތްތައް ހުޅުވާލަނީ ހަރުކަށި ޝަރުތުތަކަކާއެކުގައި ކަމަށް އަރަބި މީޑިއާއިން މައުލޫމާތު ދެއެވެ. އެގޮތުން މިސްކިތްތަކަށް ދާ މީހުން އަމިއްލަ މުސައްލަ ގެންދިއުމާ، ޖިސްމާނީ ގައިދުރުކަން ދެމެހެއްޓުން ފަދަ ފިޔަވަޅުތައް ތަންފީޒު ކުރުމަށް ވަނީ ގޮވާލާފައެވެ.
މައްކާގެ މިސްކިތްތައް ހުޅުވާލުމަށް ސައުދީ އަރަބިއްޔާއިން ނިންމާފައި ވާއިރު، ޙައްޖުގެ މަތިވެރި އަޅުކަމަށް ބާކީ ދެން އޮތީ ކުޑަ ދުވަސްކޮޅެކެވެ. ނަމަވެސް މިހިނގާ 1441 ވަނަ އަހަރުގެ ޙައްޖުގެ އަޅުކަމައިގެން ކުރިއަށް ދިއުމާ މެދު ސައުދީ އަރަބިއްޔާއިން ނިންމި ގޮތެއް އަދިވެސް ހާމަކޮށްފައެއް ނުވެއެވެ. ދިވެހިރާއްޖޭގެ އިސްލާމީ ކަންކަމާ ބެހޭ ވުޒާރާއިންވަނީ، އެންމެ ފަހު ވަގުތާ ހަމައަށްވެސް ޙައްޖަށް ދިއުމުގެ މަސައްކަތްތައް ކުރިއަށް ގެންދާނެ ކަމުގެ ޔަގީންކަން ދިވެހި ރައްޔިތުންނަށް އަރުވާފައެވެ.
ކޮވިޑް-19އާ ގުޅިގެން ސައުދީން އަޅަމުންދިޔަ ހަރުކަށި ފިޔަވަޅުތަކަށް ލުއި ދީ، މައްކާއިން ބޭރު ސަރަހައްދުގެ މިސްކިތްތައް، ހަރުކަށި ޝަރުތުތަކަކާއެކު ހުޅުވާލީ މިދިޔަ މެއި މަހުގެ ފަހުކޮޅުގައެވެ. އަދި މާދަމާއިން ފަށައިގެން ސައުދީގެ ބޮޑު ސަރަހައްދެއް އާންމު ހާލަތަށް ގެންދަން ހަމަޖެހިފައިވާކަމަށްވެސް ޚަބަރު ލިބެއެވެ.
ސައުދީ އަރަބިއްޔާގެ އަދުގެ ހާލަތަށް ބަލާއިރު އެގައުމުން ކޮވިޑް-19އަށް ޕޮޒިޓިވްވި މީހުންގެ އަދަދު ވަނީ 150292 އަށް އަރާފައެވެ. މީގެ ތެރެއިން އެކްޓިވް ކޭހުގެ ގޮތުގައި 53344 ކޭސް ފާހަގަކޮށްފައިވާއިރު، 1941 މީހެއްގެ ހާލު ސީރިއަސް/ކުރިޓިކަލް ކަމަށް ރެކޯޑްތަކުން ދައްކައެވެ. ސައުދީން މި ބަލީގައި މަރުވި މީހުންގެ އަދަދު 1184 އަށް ވަނީ އަރާފައެވެ.
