ނޫސްވެރިޔާ އަހުމަދު ރިލްވާނާއި ބްލޮގަރު ޔާމީން ރަޝީދާއި އުނގޫފާރު ދާއިރާގެ ކުރީގެ މެންބަރު ޑރ. އަފްރާޝީމް އަލީގެ މަރުގެ ފަހަތުގައި ތިބީ ކޮން ބައެއްކަން ނުހޯދެނީސް އެ މަސައްކަތް ހުއްޓަވާ ނުލައްވާނެ ކަމަށް ރައްޔިތުން މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.

ސަރުކާރުގެ ހިންގާ މައިޕާޓީ އެމްޑީޕީގެ ޒުވާނުންނާއި އޮންލައިންކޮށް ބައްދަލުކުރައްވާ ޒުވާނަކު ކުރި ސުވާލަކަށް ޖަވާބު ދެއްވާ ރައީސް ނަޝީދު ވިދާޅުވީ އެ މަސައްކަތް މަޖިލިސް ތެރެއިން ވަރަށް ބާރަށް ކުރިޔަށް ދާ ކަމަށެވެ. އެގޮތުން މިހާރު އެ މަސައްކަތް ކުރިޔަށް ދަނީ ސަލާމަތީ ހިދުމަތްތަކާއި ހާރިޖީ ގުޅުންތަކުގެ ކޮމެޓީއާ މަޖިލީހުގެ ޖުޑީޝަރީ ކޮމެޓީ އެކުވެގެންކަން ނަޝީދު ވަނީ ފާހަގަ ކުރައްވާފައެވެ.

ރައީސް ސޯލިހު ވެރިކަމަށް ވަޑައިގަތުމަށާއި އަދި ރައްޔިތުންގެ މަޖިލިސް އިންތިހާބުގައިވެސް އެންމެ ބޮޑަށް ވަކާލާތު ކުރެއްވި މަރުތަކުގެ ތަހުގީގާ ގުޅޭ ގޮތުން ރައީސް ނަޝީދު ވިދާޅުވީ އެއްގޮތަކަށްވެސް އެ މަސައްކަތް ހުއްޓާ ނުލައްވާނެ ކަމަށާއި އެކަމުގެ އެންމެ އަޑީގައި ތިބި މީހުން ހޯއްދަވާނެ ކަމަށެވެ.

"ހަމަ އެންޑް އޮފް ސްޓޯރޯ ނުހޯދެނީހެއް ހުއްޓައެއް ނުލާނަން،"
ރައީސް ނަޝީދު

މި ބައްދަލުވުމުގައި ނަޝީދުގެ އަރިހުގައި ބައިވެރިވެވަޑައިގެންނެވި އެމްޑީޕީގެ ޗެއާޕާސަން އަދި ހެންވޭރު ހުޅަނގު ދާއިރާގެ މެންބަރު ހަސަން ލަތީފު ވިދާޅުވީ މިއަދު ދެ ކޮމެޓީއެއް އެއްކޮށް އެ މަސައްކަތް ފަށާފައިވާ ކަމަށެވެ. އަދި ފަސް މެންބަރުންގެ މައްޗަށް އެކުލެވޭ ސަބް ކޮމެޓީއެއް ނެގުމަށްފަހު އެ މައްސަލަ މި މަހުގެ 18 ވަނަ ދުވަހާ ހަމައަށް ނިންމުމަށް ކަނޑައަޅާފައިވާ ކަމަށާއި ބަލަމުން ދަނީ މަރުތަކުގެ މައްސަލައާ އެމްއެމްޕީއާރްސީ މައްސަލަ އެއްކޮށް ކަމަށެވެ.

ހަސަން ލަތީފު ވިދާޅުވީ މާދަމާ ފުލުހުންނާއި ޕްރޮސިކިއުޓަރު ޖެނެރަލް (ޕީޖީ) އަދި އެންޓި ކޮރަޕްޝަން ކޮމިޝަން (އޭސީސީ) އަށް ކޮމެޓީން ސިޓީ ފޮނުވާނެ ކަމަށެވެ. އަދި މިހާ ދުވަސް ވެގެން ދިޔައިރު ވެސް ތަހުގީގުތައް ނުނިމިވާ ސަބަބުތައް އޮޅުން ފިލުއްވާނެ ކަމަށާއި މިވަގުތު އެންމެ މުހިއްމީ އެކަން [ތަހުގީގުތައް ނުނިމުވާ ސަބަބު] ބެލުން ކަމަށް އޭނާ ވިދާޅުވިއެވެ.

"ފުލުހުން އެއްވެސް ވަރަކަށް އެއްބަސް ނުވޭ މީގެކުރިން އެއްވެސް އިހުމާލެއް ރިލްވާން މައްސަލާގައިވެސް ޑރ. އަފްރާޝީމްގެ މައްސަލާގައިވެސް ޔާމީން ރަޝީދުގެ މައްސަލާގައި ވެސް ފުލުހުންގެ އެއްވެސް އިހުމާލެއް އޮތް ކަމަކަށް އެއްބަހެއް ނުވޭ. އެހެންނަމަވެސް އެކި ވާހަކަ އެކި ސުވާލު އެކި ގޮތް ގޮތަށް ކޮށްގެން މިހާރު ފުލުހުން އެންމެ ކުޑަ މިނުން އެއްބަސްވޭ އިހުމާލުތަކެއް ވާކަން. ދެން އަޅުގަނޑުމެން މި ބަލަނީ ހަގީގަތުގައިވެސް އެކަންކަން ކޮށްފައި ތިބި މީހުން ދެނެގަތުމަށް ކިހިނެއްތޯ ހެދޭނީ،"
ހަސަން ލަތީފު

ގެއްލިފައިވާ މީހުންނާއި މަރާލެވިފައިވާ މީހުންގެ މައްސަލަތައް ބެލުމަށް ވެރިކަމުގެ ހުވާ ކުރެއްވި ދުވަހު ރައީސް ސޯލިހު ވަނީ ރިޔާސީ ކޮމިޝަނެއް އުފައްދާފައެވެ. ގާނޫނީ ގޮތުން ބާރުވެރިކަން ދީފައިވާ އެ ކޮމިޝަނުގެ މަސައްކަތްތައް ހުއްޓިފައިވާ ކަމަށް ބުނެ ގިނަ ބަޔަކު އަންނަނީ ކަންބޮޑުވުން ފާޅުކުރަމުންނެވެ.

https://thepress.mv/108377

ދީނީ އިލްމުވެރިޔާ އަދި އުނގޫފާރު ދާއިރާގެ ކުރީގެ މެންބަރު ޑރ. އަފްރާޝީމް އަލީ، މިނިވަން ނޫހުގެ ނޫސްވެރިޔާ އަހްމަދު ރިޟްވާން އަދި ބްލޮގަރު ޔާމީން ރަޝީދުގެ މަރުގެ މައްސަލާގައި ޖިހާދީ ފިކުރުގެ ޖަމާއަތެއް ހިންގާ ކަމުގެ ތުހުމަތު އޮތް މާލެ ދަފްތަރު ނަމްބަރު 471 މުހައްމަދު މަޒީދު އަދި ތ. އޮމަދޫ އަތިރީގޭ ސާމިތު މުހައްމަދުގެ މައްޗަށް ދައުވާ ކުރުމަށް ޑިސެމްބަރު 3، 2019 ގައި ޕީޖީ އޮފީހަށް ފޮނުވިއެވެ.

ބޮޑު 3 މަރުގެ ގޮތުގައި ރާއްޖޭގައި މި ފަހުން ބަލަމުން އަންނަ 3 މަރުގެ ތަހުގީގު ރިޕޯޓުވެސް އޮތީ އާންމު ކޮށްފައެވެ. އަދި އެ ރިޕޯޓުގައި އެ މަރުތަކުގެ "ފަހަތުގައި ތިބި ކަމަށް ބުނާ މީހުން" ގެ ވާހަކަވެސް އޮތްކަން ފާހަގަ ކުރެވެއެވެ.

މި މައްސަލަތަކުގައި ބައެއްގެ މައްޗަށް ދައުވާ ކުރަން ފޮނުވާފައި ވާއިރު މަޖިލީހުން އިތުރަށް ތަހުގީގު ކުރަނީ އެ 3 މަރާ ގުޅޭ ކޮންކޮން ކަންކަމެއް ކަމެއް އަދި ސާފެއް ނުވެއެެވެ.

ރައްޔިތުންގެ މަޖިލިސް މަރު މަރު ކޮމިޝަން މުހައްމަދު ނަޝީދު ސިޔާސީ