ހަލުވިކަމާއެކު ފެތުރެމުންދާ ކޮރޯނާވައިރަސް ޑިޒީޒް (ކޮވިޑް-19) ފެތުރުން ކޮންޓްރޯލް ކުރުމަށް އަވަށްޓެރި އިންޑިއާއިން އަނެއްކާވެސް އިތުރު 2 ހަފުތާގެ މުއްދަތަށް، ލޮކްޑައުން އަމުރުގެ މުހުލަތު އިތުރުކޮށްފިއެވެ.
އިންޑިއާ ސަރުކާރުގެ ޑިޒާސްޓާ ރެސްޕޯންސް އޮތޯރިޓީއިން ބުނީ ލޮކްޑައުން އަމުރާއެކު އަލަށް އެކުލަވާލި އިރުޝާދުތަކަކީ، އިގުތިސޯދީ ހަރަކާތްތައް އަލުން ހިންގަން ފެށުމަށް މަގު ތަނަވަސް ކުރަނިވި ގޮތަކަށް އެކުލަވާލާފައިވާ އިރުޝާދުތަކެއް ކަމަށެވެ.
އެގޮތުން ޓޭކްއަވޭގެ ހިދުމަތަށް ރެސްޓޯރަންޓްތައް ހުޅުވާލާ އިރު، ބެލުންތެރިންނާ ނުލާ ކުޅިވަރު މުބާރާތްތައް ކުރިއަށް ގެންދިއުމުގެ ފުރުސަތު ސްޕޯޓްސް ކޮމްޕެލްކްސްތަކާ ސްޓޭޑިއަމްތަކަށް އޮންނާނެ ކަމަށް އިންޑިއާގެ ދާހިލީ ވުޒާރާއިން ބުނެއެވެ. މީގެ އިތުރުން ސްޓޭޓްއާއި ސިޓީ ބޯޑަރު ހުރަސްކޮށް ޕްރައިވެޓް ބަސްތަކާ ކާރުތަކަށްވެސް ދަތުރު ކުރެވޭނެ ފުރުސަތު އޮންނާނެ ކަމަށް މައުލޫމާތު ލިބެއެވެ.
ކޮވިޑް-19ގެ ބަލިމަޑުކަން އިންޑިއާއަށް ފެތުރުމާއެކު އެގައުމުން ލޮކްޑައުންގެ ހަރުކަށި އަމުރެއް ތަންފީޒު ކުރަން ފެށީ މާޗް މަހުގެ 24 ވަނަ ދުވަހުއެވެ. އިންޑިއާއިން ބަލި ފެނުނު ފަހުން މިހާތަނަށް 90000 އަށްވުރެ ގިނަ މީހުންނަށް ބަލި ޖެހިފައިވާއިރު، މި ބަލީގައި 2800 އަށްވުރެ ގިނަ މީހުންގެ ފުރާނަ ވަނީ ގެއްލިފައެވެ. 1.3 ބިލިއަން މީހުންގެ އާބާދީއެއް އޮތް އިންޑިއާ އަނެއްކާވެސް ލޮކްޑައުން ކޮށްފައިވާއިރު، މިއީ މުޅި ދުނިޔޭގެ ނިސްބަތުން ބަލާއިރުވެސް އެންމެ "ބޮޑު" ލޮކްޑައުންއެވެ.
ފާއިތުވީ 24 ގަޑިއިރަށް ބަލާއިރު އެކަނިވެސް އިންޑިއާއިން 5200 އަށްވުރެ ގިނަ މީހުން ވަނީ މި ބައްޔަށް ޕޮޒިޓިވްވެފައެވެ.
މިފަދަ ދަނޑިވަޅެއްގައި، އިންޑިއާއިން ލޮކްޑައުންގެ މުހުލަތު އިތުރު ކުރި މިއީ 4 ވަނަ ފަހަރެވެ. އިންޑިއާގެ ލޮކްޑައުން އަމުރާއެކު ބަލި ކޮންޓްރޯލް ވަމުން ދިޔަ ކަމުގައި ވީނަމަވެސް އެކަމުގެ އިގުތިސޯދީ އަގު އިންތިހާ ބޮޑެވެ. އެގޮތުން، ލޮކްޑައުންގެ ސަބަބުން ވަޒީފާ ގެއްލުނު މީހުންގެ އަދަދު 120 މިލިއަނަށް ވުރެ މައްޗަށް އަރާފައިވާއިރު، އެތައް މިލިއަން ހިޖުރަވެރި މަސައްކަތްތެރިންނެއް ވަނީ ބޮޑެތި ސިޓީތަކުގައި ބިކަވެފައެވެ.
