މިއަދު ނެގި އުމުރުން ދުވަސް ވީ މީހެއްގެ ސާމްޕަލް ޕޮޒިޓިވް ވެއްޖެއެވެ. މިއީ ރެންޑަމް ސާމްޕަލިންގެ ގެ ތެރެއިން ފެނުނު ކޭސް އެކެވެ. އެޗްޕީއޭގެ ޑރ. ނަޒުލާ ރަފީގު ވިދާޅުވީ، އެޗްޕީއޭއިން މިހާރު ކުރިއަށް ގެންދާ ރޭންޑަމް ސާމްޕްލިންގެ ތެރެއިން ނެގި އުމުރުން ދުވަސްވީ 3 މހޭއްގެ ސާމްޕަލްގެ ތެރެއިން އެކެއްގެ ސާމަޕްލަ ޕޮޒިޓިވް ވެފައ ވާކަމަށެވެ.
މި މީހާ ޕޮޒިޓިވް ވީ މީހަކާ ކޮންޓެކްޓް ވެފައި އޮވެގެން ކަމެއް ނުވަތަ އޭނާ ގެއިން ބޭރަށް ގޮސް އުޅެގެން ކަމެއް ޑރ. ނަޒުލާ ވިދާޅެއް ނުވެއެވެ.
މިއާއެކު އޭނާ ވިދާޅުވީ، އުމުރުން ދުަވސް ވީ މީހުންގެ ސާމްޕަލް ނެގުމުގައި އެޗްޕިއޭއިން ކުރަމުންދާ މަސައްކަތަށް ބައެއް ފަރާތްތަކުން އެއްބާރުލުން ނުދޭ ކަން ފާހަގަ ވެފައި ވާ ކަމަށެވެ.
"އުމުރުން ދުވަސް ވީ މީހުން އެބަ ބުނޭ، ތިމަންނާ ގެއަކުން ބޭރަކަށްވެސް ނުދަމޭ، ދެން ކީއްވެހޭ ތިމަންނާ އަށް ބަލި ޖެހެންވީ" އުމުރުން ދުވަސް ވީ މީހުންގެ ބައެއް ޝަކުވާ ހިއްސާ ކުރައްވަމުން ނަޒުލާ ވިދާޅުވިއެވެ.
ނަޒުލާ ވިދާޅުވީ، ބަލި ޖެހެނީ ކޮންމެހެން ގެއިން ބޭރަށް ގޮސްގެން ނޫންކަމަށާއި، ކޮންޓެކްޓެއް ވެފައި ހުންނަ މީހަކާ ކޮންމެވެސް ގޮތަކުން ބައްދަލުވުމުން ކަމަށެވެ. އެގޮތުން ބައްދަލުވާ މީހަކީ އެމީހެއްގެ ބައެއް ކަންކަން ހަމަޖައްސައިދޭން އުޅޭ މީހެއް ނުވަތަ އެމީހަކު ބަލަހައްޓާ މީހެއް ނުވަތަ، އެ ގެއަކަށް ވިޔަފާރި ކޮށް އުޅޭ މީހަކަށްވެސް ވެދާނެ ކަމަށެވެ.
އެހެން ކަމުން، ގެއަށް ވިޔަފާރި ކުރިއަސް، ގެންނަ އެއްޗެހި ކޮތަޅުން ނަގާ ރަނގަޅަށް ދޮވެ ސާފު ކުރުމާއި، ކޮތަޅުތައް ރަނގަޅަށް ނައްތާލުމާއި ސައިބޯނި ލައިގެން އަތްދޮވުން ފަދަ ކަންކަން ކުރަން ޖެހޭނެ ކަމަށެވެ.
މިއަދު ރޭންޑަމް ސާމްޕްލިންގެ ތެރެއިން އުމުރުން ދުވަސްވީ މީހަކު ޕޮޒިޓިވެ ވެފައި ވާއިރު ރޭންޑަމް ސާމްޕްލިންގެ ތެރެއިން ނޭޕާލުގެ މީހަކުވެސް ޕޮޒިޓިވް ވެފައިވެއެވެ.
މިއަދު ނޭޕާލުގެ 2 މީހުން ޕޮޒިޓިވް ވި އިރު ރޭންޑަމް ސާމްޕްލިންގެ ތެރެއިން ޕޮޒިޓިވް ވި މީހާއަކީ ކޮން ސަރަހައްދަކުން ޕޮޒިޓިވް ވި މީހެއް ކަމެއް އެޗްޕީއޭއަކުން ނުބުނެއެވެ.
