ކޮވިޑާ ގުޅިގެން އެކިއެކި ކަންކަމަށް ޖުމްލަ 814 މިލިއަން ރުފިޔާ ހަރަދު ކޮށްފިއެވެ. މީގެ ތެރޭގައި ބޮޑުބައި ހަރަދު ވީ ބޭހާއި އެނޫންވެސް ފާމަސޫޓިކަލްސް ގަތުމަށް ކަމަށް އެންއީއޯސީން ބުނެފިއެވެ.
އެންއީއޯސީން ދަރުބާރުގެގައި ބާއްވަމުންދާ ޕްރެސްކޮންފަރެންސްގައި މިނސިްޓްރީ އޮފް ފިނޭންސްގެ ޗީފް ފައިނޭންޝަލް ބަޖެޓް އެގްޒެކެޓިވް، އަހުމަދު ސަރުވަޝް ވިދާޅުވީ މިހާތަނަށް ކުރެވުނު ހަރަދުގެ ބޮޑުބައި ހޭދަ ކުރެވިފައި ވަނީ ފާމަސޫޓިކަލްގެ ބާވަތްތަކަށް ކަމަށެވެ. އަދި އޭގެ ބޮޑުބައި ދެވިފައި ހުންނަނީ ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) އަށް ކަމަށްވެސް ވިދާޅުވިއެވެ.
މި ނުކުތާގައި ވާހަކަ ދައްކަވަމުން ފިނޭންސް މިނިސްޓަރު އިބްރާހިމް އަމީރު ވިދާޅުވީ މުޅި ހަރަދުގެ 72 ޕަސެންޓު ކުރަނީ އެސްޓީއޯ މެދުވެރިކޮށް ކަމަށެވެ. އެގޮތުން މެޑިކަލް އިކްއިޕްމަންޓާއި، ރީއެޖެންޓްސްއާއި، ޕީޕީއީއާއި މާސްކާއި އަދި ނޫންވެސް އެބާވަތުގެ ތަކެތި ގެންނަނީ އެސްޓީއޯ މެދުވެރިކޮށްގެން ކަމަށެވެ.
ފިނޭންސް މިނިސްޓްރީގެ ޗީފް ފައިނޭންޝަލް ބަޖެޓް އެގްޒެކެޓިވް، އަހުމަދު ސަރުވަޝް ވިދާޅުވީ، މިހާތަނަށް ކުރެވުނު ހަރަދުތަކުގެ ތެރެއިން ކޮވިޑާ ގުޅޭގޮތުން ހަދަން ޖެހުނު އިންފްރާސްޓްރަކްޗާތަކަށް 74 މިލިއަން ރުފިޔާ ހަރަދުވެފައި ވާ ކަމަށެވެ. އޭގެ ތެރޭގައި ހުޅުމާލޭގައި ހަދާ ކޮވިޑް ވިލެޖާއި، އަދި އެހެނިހެން އެކިއެކި އިންފްރާސްޓްރަކްޗާތައް ހިމެނޭ ކަމަށް އޭނާ ވަނީ ވިދާޅުވެފައެވެ.
ކޮވިޑާ ގުޅިގެން ހަރަދު ކުރެވޭ ގޮތުގެ ތަފްސީލުތަކާއި ހިސާބުތައް ހަފްތާއަކު އެއްފަހަރު އާންމު ކުރަންވެސް ނިންމާ އެކަން މިއަދުގެ ޕްރެސްގައި ވަނީ އިއުލާން ކޮށްފައެވެ. އެގޮތުން މިހާތަނަށް ކުރެވުނު ހަރަދުތަކުގެ ފުރިހަމަ ތަފްސީލު ހާމަ ކުރައްވާނެކަމަށްވެސް ވަނީ ވިދާޅުވެފައެވެ.
ރާއްޖޭގައި ކޮވިޑް ޖެހޭ މީހުން އައިސޮލޭޓް ކުރުމަށް ހުޅުމާލޭގައި 3 ފެސިލިޓީއެއް ހަދަމުން އެބަދެއެވެ. އޭގެތެރޭގައި 300 މީހުންގެ ޖާގައިގެން ކޮވިޑް ވިލެޖާއި، ޗައިނާގެ ކުންފުންޏަކާ ހަވާލު ކޮށްގެން ހަދާ 800 މީހުންގެ ޖާގައިގެ ފެސިލިޓީއަކާއި، ޗައިނާ ކުންފުންޏެއްގެ އެހީތެރިކަމާއެކު ނިންމުން މަސައްކަތް ކުރާ 327 މީހުންގެ ފެސިލިޓީއެއް ހިމެނެއެވެ. މީގެ އިތުރުން ވިލިވަރުގައި ގާއިމު ކުރި 130 ކޮޓަރީގެ ފެސިލިޓީވެސް ހިމެނެއެވެ. މީގެ އިތުރުން ގުޅީފަޅުގައި ހުޅުމާލޭގައި ބިދޭސީން ބައިތިއްބަންވެސް ފެސިލިޓީތައް ވަނީ ހަދާފައެވެ.
