އިތުރު 4 މީހުން ޕޮޒިޓިވް ވެ ޖުމްލަ، 249 އަށް އަރައިފިއެވެ. މިއާއެކު މިއަދު މިހާތަނަށް ޕޮޒިޓިވް ވި މީހުންގެ އަަދަދު 21 އަށް އެރީއެވެ. މިއަދު ޕޮޒިޓިވް ވި މީހުންގެ ތެރޭގައި ށ. ނަރުދޫ އިން ޕޮޒިޓިވް ވި 8 މީހަކާއި، ށ. މިލަންދޫ މީހަކުވެސް ހިމެނެއެވެ. ށ. ނަރުދޫން ޕޮޒިޓިވް ވެފައި ވަނީ އަމާޒު ބޯޓުގެ ކެޕްޓަންގެ އަނބިމީހާ އާއި އެ ދެމަފިރިންގެ ތިން ދަރިންގެ އިތުރުން އަމާޒު ބޯޓުގެ ކުރޫއިންނެވެ.
އަމާޒު ބޯއްޓުގެ ކެޕްޓަނާ ކޮންޓެކްޓްވި 7 މީހަކު ޕޮޒިޓިވް ވެފައި ވާއިރު، އަމާޒު ބޯޓުުގެ ކެޕްޓަންގެ ކޭސްއާ ގުޅިގެން ޕްރައިމަރީ ކޮންޓެކްސް ނުވަތަ އޭނައާ ސީދާ ދިމާވި، 101 މީހަކު މިހާތަނަށް ހޯދާފައިވާ ކަމަށް އެޗްޕީއޭން ބުނެފައި ވަނީ ރޭގައެވެ.
އަމާޒު ބޯޓުގެ ކެޕްޓަން، އުމުރުން 49 އަހަރު (ކޭސް133) ކޮރޯނާވައިރަހަށް ޕޮޒިޓިވްވީ މިދިޔަ ހޮނިހިރު ދުވަހުއެވެ. މާލެ ލޮކްޑައުނަށް ދިޔުމުގެ ކުރިން އެ ބޯޓު ވަނީ މާލެއިން ފުރައިގެން ގޮސްފައެވެ. އެގޮތުން މިމަހުގެ 15 ވަނަ ދުވަހާއި 16 ވަނަ ދުވަހު އުތުރުގެ ބައެއް ރަށްތަކަށް ދަތުރު ކުރި އެ ބޯޓުގައި، 91 މީހަކު ދަތުރުކުރިކަން އެންއީއޯސީން ވަނީ މީގެ ކުރިން ހާމަކޮށްފައެވެ. އަދި އެ ބޯޓުން ދަތުރު ކުރި މީހުން އެޗްޕީއޭ އަށް ރިޕޯޓުކުރުމަށްވެސް ވަނީ އެދިފައެވެ.
ރާއްޖޭގައި މިހާރު ކޮވިޑް ޖެހިފައި ތިބި މީހުންގެ އަދަދު 249 އަށް އަރާފައި ވާ އިރު މިވަގުތު ބަލި މީހުންގެ ގޮތުގައި 220 މީހުން އެބަ ތިއްބެއެވެ.
