ކޮވިޑް-19 ކޮންޓްރޯލް ކުރުމަށް އަޅާފައިވާ ފިޔަވަޅެއްގެ ގޮތުން، ކަރަންޓީނަށް ދާން ދެކޮޅު ހެދި އޮސްޓްރިއާގެ މީހަކު ކަރަންޓީނު ކުރުމަށް ސިވިލް ކޯޓުން ރޭ އަމުރެއް ނެރެ އެމީހާ ކަރަންޓީން ކޮށްފިއެވެ.
ސިވިލް ކޯޓުން ބުނީ ރޭ މެންދަމުގެ ވަގުތެއްގައި އަމުރު ނެރެ އޮސްޓްރިއާގެ މީހަކު ކަރަންޓީން ފެސިލިޓީއެއްގައި ބަންދު ކުރުމަށް ކަމާ ބެހޭ ފަރާތްތަކަށް އަމުރު ނެރެފައިވާ ކަމަށެވެ.
މާލެ ތެރޭގައި މިހާރު ހަލުވިކަމާއެކު ފެތުރެމުންދާ ކޮވިޑް-19 އިން ރައްކާތެރިވުމަށް، ރާއްޖެ އިން ބޭރުން އަންނަ މީހުންނާއި އެ ބައްޔަށް ޕޮޒިޓިވްވާ މީހުންގެ އިތުރުން ޝައްކު ކުރެވޭ މީހުން ކަރަންޓީން ފެސިލިޓީތަކަށް ދިއުމަށް ދެކޮޅުހަދާ، އަމުރުރަކަށް ބޯނުލަނބާނަމަ، ކަރަންޓީން ކުރުމުގެ ބާރު ހެލްތު ޕްރޮޓެކްޝަން އޭޖެންސީ (އެޗްޕީއޭ) އަށް ސިއްހީ ކުއްލި ނުރައްކަލުގެ ހާލަތުގައި ލިބިގެން ވެއެވެ.
މި ފަދަ އަމުރެއް މީގެ ކުރިން ވެސް ވަނީ ދެ ފަހަރެއްގެ މަތިން ނެރެފައެވެ. ނަމަވެސް ބިދޭސީއަކު ކަރަންޓީނު ފެސިލިޓީއަށް ގެންދަން ކޯޓުން އަމުރު ނެރުނު މިއީ ފުރަތަމަ ފަހަރެވެ.
މާލެތެރެއިން ކޮވިޑް-19އަށް 200އަށް ވުުރެ ގިނަ މީހުން މިހާރު ޕޮޒިޓިވް ވެފައިވާއިރު އޭގެ ތެރޭގައިވެސް ގިނައީ ބިދޭސީންނެވެ.
