ކޮވިޑް-19 އަށް ޕޮޒިޓިވްވާ މީހުން މިހާރު ރިސޯޓުގައި ކަރަންޓީނު ކުރިއަސް ފަހުން ގޭގައި ކަރަންޓީނު ކުރަން ޖެހިދާނެ ކަމަށް ޓެކްނިކަލް އެޑްވައިޒަރީ ގްރޫޕްގެ ލީޑަރު ޑރ. އަލީ ލަތީފް ވިދާޅުވެއްޖެއެވެ.
މިހާރު ކުރިއަށްދާ ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޑރ. ލަތީފް ވިދާޅުވީ ކޮވިޑް-19 އަށް ޕޮޒިޓިވްވާ މީހުން މިހާރު ރިސޯޓުގައި ކަރަންޓީނު ކުރިއަސް، ހާލަތު ދިމާވާ ގޮތަކުން ފަހުން ގޭގައި ކަރަންޓީނު ކުރަން ވެސް ޖެހިދާނެ ކަމަށެވެ. ޑރ. ލަތީފް މިހެން ވިދާޅުވީ ރާއްޖޭގައި ކޮވިޑް-19 ފެތުރެމުންދާ ހަލުވި ކަމަސް ބެލުމަށްފަހުއެވެ.
ޑރ. ލަތީފް ވިދާޅުވީ މިހާތަނަށް ފެނިފައިވާ ކެށްތަކުގެ ތެރެއިން އެޑްމިޓް ކޮށްގެން ފަރުވާ ދޭން ޖެހޭ ހިސާބަށް އެއްވެސް މީހަކު ގޮސްފައި ނުވާ ކަމަށާއި، ޕޮޒިޓިވްވި މީހުންގެ ތެރެއިން އެއްވެސް މީހަކަށް ހާއްސަ ފަރުވާއެއް ދޭކަށް ނުޖެހޭ ކަމަށެވެ. ނަމަވެސް، މި އަދަދު މައްޗަށްދާ ނަމަ އެޑްމިޓްކޮށްގެން ފަރުވާ ދޭން ޖެހިދާނެ ކަމަށް ޑރ. ލަތީފް ވިދާޅުވިއެވެ.
ޑރ. ލަތީފް ވިދާޅުވީ، މިހާރު އޮތް އެންމެ ބޮޑު ބިރަކީ، ޕޮޒިޓިވްވި މީހުންގެ ކޮންޓެކްޓްސް ގިނަވުން ކަމަށެވެ. އެގޮތުން އެމީހުން އެކަހެރި ކުރުމުގައި ދަތިތައް ދިމާވާ ކަމަށް ޑރ. ލަތީފް ވިދާޅުވިއެވެ. އޭނާ ވިދާޅުވީ، މީގެ އެންމެ މުހިންމު ކަމަކީ ކަރަންޓީނު ކުރުން ކަމަށެވެ. އެގޮތުން، ހައި ރިސްކް ކޮންޓެކްޓްތައް ރިސޯޓުތަކުގައި މިހާރު ކަރަންޓީނު ކުރަމުންދާ ކަމަށެވެ. ނަމަވެސް މުސްތަގުބަލުގައި އެފަދަ ކޮންޓެކްޓްތައް ގިނަ ވެގެން ގޭގައި ކަރަންޓީނު ކުރަން ވެސް ޖެހިދާނެ ކަމަށް ޑރ. ލަތީފް ވިދާޅުވިއެވެ.
މީގެ އިތުރުން ޑރ. ލަތީފް ވަނީ ކޮންޓެކްޓުން އެކަހެރި ކުރުމުގައި ލަސްތަކެއް ދިމާވި ކަމުގައިވީ ނަމަވެސް އަމިއްލައަށް ގޭގައި ނުވަތަ ކޮޓަރީގައި އެކަހެރިވުމަށް އިލްތިމާސްކުރައްވާފައެވެ.
ކޮވިޑް-19 ހަލުވިކަމާއެކު ފެތުރެމުން ދާއިރު ރާއްޖެއިން ވަނީ ޖުމްލަ 67 ޕޮޒިޓިވް ކޭސް ފެނިފައެވެ. އަދި މީގެ ތެރެއިން 16 މީހަކު ރަނގަޅުވެ، 2 މީހަކު ރާއްޖެއިން ފުރައިގެން ގޮސްފައިވާއިރު، މި ބައްޔަށް މިހާރު 49 މީހަކު ދަނީ ރާއްޖޭގައި ފަރުވާ ހޯދަމުންނެވެ. އެއީ ރާއްޖެއިން ބޭރުގައި ހުރެފައި ރާއްޖެ އައި 2 ދިވެހިންނާއި، މާލެ އިން ޕޮޒިޓިވްވި 24 ދިވެހިންގެ އިތުރުން މާލެއިން ޕޮޒިޓިވްވި 23 ބިދޭސީންނެވެ.
