ގާތްގަނޑަކަށް ދުނިޔޭގެ 2 ލައްކައާ ގާތް ކުރާ މީހުން އިންފެކްޓް ވެފައިވާ ކޮރޯނާވައިރަސް ޖެހިގެން މެލޭޝިއާގައި 2 ވަނަ މީހަކު މަރުވެއްޖެއެވެ. ދާދި ދެންމެ އެކަން އިއުލާނު ކުރަމުން އެގަމުގެ ކަމާބެހޭ ފަރާތްތަކުން ބުނީ މަރުވެފައިވަނީ އުމުރުން 34 އަހަރުގެ މީހެއް ކަމަށެވެ.
އޭނާ އަކީ ސެލަންގޯރަށް ނިސްބަތްވާ މީހެކެވެ. މެލޭޝިއާގައި ކޮރޯނާވައިރަސްއަށް 673 މީހަކު ޕޮސިޓިވް ވެފައި ވާއިރު މިއަދު ވަނީ އުމުރުން 60 އަހަރުގެ މީހަކުވެސް މަރުވެފައެވެ.
މެލޭޝިއާގައި މިއަދު އެކަނިވެސް 120 މީހުން ވަނީ ކޮރޯނާވައިރަސް އަށް ޕޮޒިޓިވް ވެފައެވެ.
ދުނިޔޭގެ އެކި ހިސާބުތަކަށް ފެތުރެމުން ދާ ކޮރޯނާވައިރަސްގައި މިހާތަނަށް 7174 މީހުން ވަނީ މަރުވެފައެވެ. އިންފެކްޓްވެފައިވާ މީހުންގެ އަދަދު ވަނީ 182723 އަށް އަރާފައެވެ.
