ގުދުސްގެ މައި ސަހަރެއްގެ ގޮތުގައި ބަލަމުން އަންނަ އޯލްޑް ސިޓީ އޭ ކިއުނު ހިސާބުގެ ބިމު އަޑީގައި ރޭލްވޭ ލައިނަކާ، ރޭލު ސްޓޭޝަނެއް ގާއިމު ކުރުމަށް އިސްރާއީލުން ނިންމި ނިންމުން ކުށްވެރި ކުރާ ކަމަށް އުރުދުން އިން ބުނެފިއެވެ.
އިސްރާއީލުގެ ދަތުރުފަތުރާ ބެހޭ ވަޒީރު މިދިޔަ ހޯމަ ދުވަހު ވިދާޅުވީ، އިސްރާއީލުގެ ތެލް-އަވީވްއިން ގުދުސްއަށް ހައި-ސްޕީޑް ރޭލު ދަތުރުތައް ކުރުމަށް އަޅަންޖެހޭ އާ ރޫޓު ގާއިމު ކުރުމުގެ ހުއްދަ މީހާރު ލިބިފައިވާ ކަމަށެވެ.
ކަންމިހެން އޮތްއިރު، އުރުދުން އިން ބުނީ، މިއީ ބައިނަލްއަގުވާމީ ގާނޫނުތަކާ ކަނޑައެޅިގެން ހިލާފު އަމަލެއް ކަމަށެވެ.
މިއާއެކު އުރުދުންގެ ހާރިޖީ ވުޒާރާގެ ތަރުޖަމާނު ލޮއިފަލާހް އަލް-ފާޔިޒު ވަނީ، އިސްރާއީލުން އަޅަމުންދާ ޣައިރު ގާނޫނީ ފިޔަވަޅިތަކާ ދެކޮޅަށް ބައިނަލްއަގުވާމީ މުޖުތަމައު ޒިންމާދާރުވެ، އިސްރާއީލުގެ އަމަލުތަކާ ދެކޮޅަށް ތެދުވުމަށް ގޮވާލައްވާފައެވެ.
އުރުދުންއަކީ ގުދުސްގައި ހުރި ބިނާތަކުގެ ތެރެއިން މުސްލިމުންގެ މުގައްދަސް ބިނާތައް ބެލެހެއްޓުމުގެ ޒިންމާ މަތިކޮށްފައިވާ ގައުމެވެ. ވަގުފް އުސޫލުން އަލް-ހަރަމް އަލް-ޝަރީފުގެ ޒިންމާދާރު ބެލެހެއްޓުން ތެރިއަކީ އުރުދުންއެވެ. އިސްރާއީލުން ފުޅާކުރަމުންދާ ރޭލްވޭ މަޝްރޫއުގައި މިސަރަހައްދަށްވެސް އަތްގަދަ ކުރުމަށް ވަނީ ރާވާފައެވެ.
ގުދުސްގެ މައްސަލައަކީ އިސްރާއީލާ ފަލަސްތީނުގެ ޒަމާންވީ ހަތުރުވެރިކަމާ ދެބަސްވުންތަކުގެ މައި މައްސަލަވެސްމެއެވެ. އިސްރާއީލުން ބުނާ ގޮތުގައި މުޅި ގުދުސްއަކީ އެމީހުންގެ ވެރި ރަށެވެ. ނަމަވެސް، 1967 ވަނަ އަހަރުގެ މެދުއިރުމަތީ ހަނގުރާމައަށްފަހު އިސްރާއީލުން ވެރިވެގެންފައިވާ އިރުމަތީ ގުދުސް ސަރަހައްދަކީ، މުސްތަގުބަލުގައި އެކުލަވާލާލެވިގެންދާ ފަލަސްތީނުގެ މިނިވަން ދައުލަތުގެ ވެރި ރަށް ކަމަށް ފަލަސްތީނުން ވަކާލާތު ކުރެއެވެ.
