ދިރާގާއި ބައިކްމޯލްޑިވްސް ގުޅިގެން ރާއްޖޭގެ ސްކޫލްތަކަށް އަމާޒުކޮށްގެން ބާއްވަމުން އަންނަ މަމެން އިންޓާ ސްކޫލް ސައިކްލިން ޗެމްޕިއަންޝިޕްގެ 3 ވަނަ މުބާރާތް، މިއަހަރު މާރިޗު 14 ގައި ބާއްވަން ވަނީ ހަމަޖެހިއްޖެއެވެ.
މި މުބާރާތް ބާއްވަން ހަމަޖެހިފައި އޮތީ ހުޅުމާލެ ރޭސިންގް ޓްރެކްގައެވެ. މި މުބާރާތުގައި މިފަހަރުވެސް ތަފާތު 20 ރޭހެއް އެކި އުމުރުފުރާ ދެމެދު ކުރިއަށް ގެންދިއުމަށް ހަމަޖެހިފައިވާ އިރު، މުބާރާތް ކުރިއަށްދާނީ 4 އުމުރުފުރާއަކަށް ބަހާލައިގެންނެވެ. އެއީ، 13 އަހަރުން ދަށް، 15 އަހަރުން، 17 އަހަރުން ދަށް އަދި 19 އަހަރުން ދަށުގެ އުމުރުފުރާއެވެ. ކޮންމެ އުމުރުފުރާއެއްގައި ވެސް އަންހެން އަދި ފިރިހެން ބައި ކުރިއަށްދާނީ ވަކިވަކިންނެވެ. މީގެ އިތުރުން 11 އަހަރުން ދަށުގެ އުމުރު ފުރާއަށް ހާއްސަ ކޮށްގެން ބާއްވާ "ފަން ރައިޑް" ގެނަމުގައި ހާއްސަ ބައިސްކަލު ރޭހެއް ބޭއްވުމަށްވެސް ވަނީ ހަމަޖެހިފައެވެ.
2019 ވަނަ އަހަރު ބޭއްވި މުބާރާތުގައި 600 އަށްވުރެއްގިނަ ދަރިވަރުން ޖުމްލަ 20 ސްކޫލަކުން ވަނީ ބައިވެރިވެފައެވެ. ކުރީ އަހަރުތަކާ ހިލާފަށް މި އަހަރު މި މުބާރާތް ކުރިއަށްދާނީ އެއްދުވަހުގެ ފޯރިގަދަ އިވެންޓެއްގެ ގޮތުގައެވެ. މި ރޭސް ކުރިއަށްދާނީ މާރިޗު 14 ވަނަ ދުވަހުގެ ހެދުނު 7:00 ފެށިގެން ހަވީރު 18:00 އަށެވެ.
ބައިކް މޯލްޑިވްސްއަކީ 2016 ވަނަ އަހަރުން ފެށިގެން ބައިސްކަލު ދުއްވުމުގެ އާދަ ކުރިއަރުވަމުން އަންނަ ޖަމިއްޔާއެއް އަދި "ޔޫނިއަން ސައިކްލިސްޓް އިންޓަނޭޝަނަލް" ގެ މެންބަރެއްވެސްމެވެ.
ދިރާގާއި ބައިކް މޯލްޑިވްސް އިން މި އިވެންޓް ބޭއްވުމުގެ އަމާޒަކީ ވީހާވެސް ގިނަ ކުދިން ޅަފަތުގައި ދުޅަހެއޮ ސިއްހަތެއްގައި ހުރުމަށް އަހުލުވެރިކުރުމަށް ކަމަށާއި، ތިމާވެއްޓާ ރައްޓެހިގޮތް ހިޔާރުކޮށް، އިންޖީނުލީ އުޅަނދުތައް މަދުކުރުމަށް އެއްބާރުލުން ދިނުމަށްކަމަށް ބައިކް މޯލްޑިވްސްއިން ބުނެއެވެ. މި އިވެންޓަކީ ދިރާގުގެ ހުރިހާ އިވެންޓެކޭވެސް އެއްފަދައިން ޕްލާސްޓިކް ފްރީ އިވެންޓެކެވެ.
