ވިލިމާލެ މޫދަށް ލެއްގި ބޮޑުމަހެއް ސަލާމަތްކޮށްފިއެވެ.
މިކަމާ ގުޅިގެން ފުލުހުން ބުނީ ރޭ ފަތިހު 4:20 ހާއިރު ވިލިމާލެ މޫދުގައި މަރުނުވާ ބޮޑު މަހެއް ލައްގާފައިވާ ކަމުގެ މައުލޫމާތު ފުލުހުންނަށް ލިބިފައިވާ ކަމަށެވެ.
ފުލުހުން ބުނީ، މި ބޮޑުމަސް ސަލާމަތް ކުރުމަށް، އޭތި ބޭރަށް ނެރެ ކަނޑަށް ފުން ކޮށްފައި ވަނީ ވިލިމާލެ ފުލުހުންނާއި އާންމުން ގުޅިގެން ކަމަށެވެ.
ވިލިމާލޭ މޫދަށް ލައްގާފައިވާ ބޭބީ ހަމްޕްބެކް ވޭލް ވިލިމާލޭ ގޮނޑުދޮށުގައި އޮތް މަންޒަރު ދައްކުވައިދޭ ވީޑިއޯއެއް ވެސް ވަނީ ސޯޝަލް މީޑިއާގައި އާންމުވެފައެވެ. އެ ވީޑިއޯގައި ފެންނަ ގޮތުން، އެ ސަރަހައްދަށް ގިނަ އަދަދެއްގެ އާންމުން ވެސް ވަނީ އެއްވެފައެވެ. ވީޑިއޯއިން ފެންނަ ގޮތުން ބޮޑުމަސް އޮތީ ވިލިމާލޭ ގޮނޑުދޮށަށް ލައްގާފައެވެ. އަދި އޭތި އަނބުރާ ކަނޑަށް ނުދެވިގެން ތެޅި ތެޅި އޮތް މަންޒަރު ވެސް ވީޑިއޯ އިން ފެނެއެވެ.
ވިލިމާލެ މޫދަށް ބޮޑުމަހެއް ލައްގާފައިވާއިރު، ރޭ މާލެ ކޮމާޝަލް ހާބަރު ތެރެއިން ވެސް ވަނީ ބޭބީ ވޭލް އެއް ފެނިފައެވެ. މިއީ އެކައްޗެއް ކަމަށް ލަފާ ކުރެވެއެވެ.
މިފަދަ ހާދިސާތަކުގައި ފުލުހުންނާއި އާންމުން ގުޅިގެން އެއްބައިވަންތަކަމާއެކު މަސައްކަތްކުރާ ކަން ފާހަގަ ކުރެވެއެވެ.
