މިދިޔަ އަހަރުގެ ސެޕްޓެމްބަރު މަހުން ފެށިގެން ވަރުގަދަ އަލިފާންގަނޑުތަކެއް ރޯވެ އަނދަމުންދާ އޮސްޓްރޭލިއާގެ އިރުމަތީ އައްސޭރި ފަށުގެ ސަރަހައްދަށް ގުގުރުމާއެކު ބޯކޮށް ވާރޭވެހެން ފަށައިފިއެވެ.
ބޯކޮށް ވާރޭވެހުމުގެ ސަބަބުން، އަލިފާންގަނޑުތައް ނިއްވާލުމަށް ނުވަތަ ކޮންޓްރޯލް ކުރުމަށް ބޮޑު އެހީތެރިކަމެއް ލިބޭނެ ކަމަށް އެގައުމުގެ އާންމު ރައްޔިތުން އުއްމީދުކުރެއެވެ.
ނަމަވެސް އޮސްޓްރޭލިއާގެ އޮފިޝަލުން ވިދާޅުވާ ގޮތުގައި ހާލަތު މިހާރު އޮތީ 'ދެ މިޔަ ލީ ކަނޑި'އެއްގެ ދަށުގައޭ ބުނާފަދަ ފައްތަރެއްގައެވެ. ގުގުރުމާއެކު އިރުއިރުކޮޅާ ބޯކޮށްލާ ވިއްސާރައިގެ ސަބަބުން ކުށްލިކުށްލިއަށް ފެންބޮޑުވުމުގެ ހާދިސާތައް ހިނގުން ފަދަ ހާލަތެއް މެދުވެރިވުމުގެ ފުރުސަތު އެބައޮތް ކަމަށާ، ގުގުރުމާއެކު ހޮނުއެޅުމުގެ ހާދިސާތައް ހިނގާ، އިތުރު އަލިފާންގަނޑުތަކެއް ރޯވެދާނެ ކަމުގެ ބިރުވެސް އެބައޮތް ކަމަށް އޮފިޝަލުން ވަނީ ފާހަގަކުރައްވާފައެވެ.
އޮސްޓްރޭލިއާގެ މޫސުމާ ބެހޭ ބިއުރޯއިން ބުނާ ގޮތުގައި ކުރިއަށް އޮތް 4 ވަރަކަށް ދުވަހުވެސް އޮސްޓްރޭލިއާގެ މޫސުން އޮންނާނީ މިފަދަ ގޮތަކަށެވެ.
އާދަޔާ ހިލާފަށް ހޫނުގަދަވުމުގެ ސަބަބުން މިދިޔަ ސެޕްޓެމްބަރު މަހުން ފެށިގެން އެ ގައުމުގެ އެކި ހިސާބުތަކުގައި ރޯވެފައިވާ ވަރުގަދަ އަލިފާންގަނޑުތަކުގެ ސަބަބުން 29 މީހެއްގެ ފުރާނަ ގެއްލިފައިވާއިރު އެތައް މިލިއަން ޖަނަވާރެއް ވަނީ މަރުވެފައެވެ. މީގެ އިތުރުން އާންމުންގެ މުދަލާ ތަކެއްޗަށްވެސް މި ހާދިސާތަކުގެ ސަބަބުން ވަނީ ބޮޑެތި ގެއްލުންތަކެއް ލިބިފައެވެ. އެގޮތުން 2500އަށްވުރެ ގިނަ ގެ ހަލާކުވިއިރު، ސުވިޓްޒަލޭންޑް ވަރުގެ 2 ގުނަ ހުންނަހާ ބިމުގެ ސަރަހައްދުގައި އަލިފާން ރޯވެފައިވާކަމަށް މައުލޫމާތު ލިބެއެވެ.
