ސްޕެއިންގެ މައި ސަރުކާރުން ވަކިވުމަށް މަސައްކަތްކުރަމުންދާ ކެޓަލޯނިއާ ސަރަހައްދުގައި ހުންނަ ކެމިކަލް ޕްލާންޓެއްގައި އެއްޗެއް ގޮވައިގެން ހިނގި ހާދިސާގައި ހާނީއްކަވެގެން މަރުވީ، ހާދިސާ ހިނގި ސަރަހައްދާ ގާތްގަނޑަކަށް 3 ކިލޯމީޓަރު (2 މޭލު) ދުރުގައި ހުރި ފިރިހެނެއް ކަމަށް ޚަބަރު ލިބިއްޖެއެވެ.
ހަމައެކަނި ސާޖިއޯގެ ނަމުން މީޑިއާގައި މުހާތަބު ކުރަމުންދާ އެ ފިރިހެން މީހާ ހުރީ އޭނާ ދިރިއުޅެމުންދިޔަ އެޕާޓްމަންޓްގައި ކަމަށާ، މިހާދިސާގައި އޭނާ މަރުވީ، ކެމިކަލް ޕްލާންޓްއިން ނައްޓައިގެން ދިޔަ ދަގަނޑު-ޕްލޭޓެއް އޭނާ ހުރި އިމާރާތުގައި ޖެހިގެން ހިނގި ހާދިސާގައި ކަމަށް މައުލޫމާތު ލިބެއެވެ. މި ދަގަނޑު-ޕްލޭޓްގައި ގާތްގަނޑަކަށް 1 ޓަނު ހުންނާނެ ކަމަށްވެއެވެ.
މަންޒަރު ދުށް މީހުން ސިފަކުރި ގޮތުގައި ބޮޑު އެއްޗެއް އެ އިމާރާތުގައި ޖެހުނުތަން ވަނީ ފެނިފައެވެ. އަދި ގޮވި ބާރުގަދަ އަޑަކީ ބޮމެއް ގޮވުން ފަދަ ބާރު އަޑެއް ކަމަށްވެސް އެސަރަހައްދުގައި ހުރި މީހަކު ވަނީ ސިފަކޮށްފައެވެ.
މިހާދިސާގައި ކެމިކަލް ޕްލާންޓްގައި މަސައްކަތްކުރި މީހަކު އަންގާރަ ދުވަހު މަރުވިއިރު، ޒަހަމްވި އިތުރު މީހަކަށް ފަރުވާ ދެމުންދަނިކޮށް އެމީހާވެސް ވަނީ ބުދަ ދުވަހުގެ ވަގުތެއްގައި މަރުވެފައެވެ.
ކަމާބެހޭ ފަރާތްތަކުން ބުނާ ގޮތުގައި ކެމިކަލް ޕްލާންޓްގައި ގޮވުމެއް ގޮވާ އަލިފާނުގެ ހާދިސާއެއް ހިނގާފައިވަނީ 'ކެމިކަލް-އެކްސިޑެންޓެއް' ހިނގައިގެންނެވެ. މިހާދިސާގައި އެއްވެސް ވަރަކަށް، ވިހަ ކެމިކަލް ބޭރުވެފައި ނުވާނެކަމަށްވެސް ކަމާބެހޭ ފަރާތްތަކުން ބުނެއެވެ. ނަމަވެސް ހާދިސާ ހިނގި ސަރަހައްދާ ކައިރި ހިސާބުތަކުގައި ދިރިއުޅޭ ފަރާތްތަކުން ގޭތެރޭގައި ތިބުމަށް، ކަމާބެހޭ ފަރާތްތަކުން ވަނީ ގޮވާލާފައެވެ.
