ސަރުކާރު ކޯލިޝަންގައި ހިމެނޭ ހުރިހާ ބައިވެރިންނަކީވެސް މުހިންމު ބައެއް ކަމަށް ވިދާޅުވެ، ޖުމްހޫރީ ޕާޓީގެ ތިމަރަފުށީ ދާއިރާގެ މެންބަރު އަބްދުﷲ ރިޔާޒް، މަޖިލީހުގެ ރައީސް މުހައްމަދު ނަޝީދަށް ރައްދު ދެއްވައިފިއެވެ.
ރިޔާޒް މިގޮތަށް ވިދާޅުވެފައިވަނީ އެމްޑީޕީ އިސްވެ އޮތް ސަރުކާރެއް އުފެދިފައިވީ ނަމަވެސް ރަށްރަށުގައި ތިބި ރައްޔިތުންގެ ތެރެއިން ގިނަ ބަޔަކަށް އަދިވެސް ފުރިހަމަ ހިތްހަމަޖެހުމެއް ނުލިބޭ ކަމަށާއި އޭގެ ސަބަބަކީ ސަރުކާރު ހިންގުމަށް ހަދާފައިވާ ކޯލިޝަން ކަމަށް ނަޝީދު ވިދާޅުވުމާއި ގުޅިގެނެވެ.
އެކަމަށް ރައްދު ދެއްވައި ރިޔާޒް ވިދާޅުވީ ސަރުކާރު ކޯލިޝަންގައި ހިމެނޭ ހުރިހާ ބައިވެރިންނަކީވެސް މުހިންމު ބައެއް ކަމަށެވެ. ރައީސް އިބްރާހިމް މުހައްމަދު ސޯލިހްގެ ސަރުކާރުން އެއްވެސް ބަޔަކު ބާކީނުކޮށް ހުރިހާ ރައްޔިތުންނަށް ހައްގުވާ މިންވަރު ދެއްވުމަށް ކުރެވެން އޮތް ހުރިހާ ކަމެއް ކުރައްވާނެ ކަމަށް ދެކެވަޑައިގަންނަވާ ކަމަށެވެ.
އެގޮތުން އެތައް މަސައްކަތްތަކެއް މިހާރުވެސް ފެށިގެން ކުރިއަށްދާ ކަމަށް ރިޔާޒް ވިދާޅުވިއެވެ.
ކައުންސިލް އިންތިހާބާ ދިމާކޮށް އެމްޑީޕީން ތިލަދުން މައްޗަށް ކުރާ ދަތުރުގެ ތެރެއިން ހއ. އިހަވަންދޫއަށާއި ހއ. ހޯރަފުއްޓަށް ވަޑައިގެން، ރައީސް ނަޝީދު ވިދާޅުވީ، އެމްޑީޕީ ވެރިކަމުގައި އޮވެ ރައްޔިތުންނަށް ހިތްހަމަ ނުޖެހުން ނުލިބިގެން އުޅެނީ އެމަނިކުފާނުގެ ނަޒަރުގައި ކޯލިޝަންއާ ހެދި ކަމަށެވެ.
"މި ޕާޓީގެ މެންބަރުންނަށް ވެސް އަދި މި ޕާޓީގެ މަސައްކަތުގައި އެތައް ޒަމާނެއް އުޅުނުހާ މީހުނަށް އަދި ރައްޔިތުންނަށް ވެސް ހައްގުވާ މިންވަރު ނުލިބި މި ދަނީ އެބައި އެހެން ތަންތަނަށް އަޅަން ޖެހޭ މިންވަރުން. އެއީ ސަރުކާރު އުފެދުނު ގޮތް. ސަރުކާރަށް އަޅުގަނޑުމެން އައީ މި ދެންނެވި އިންތިޒާމުގެ ތެރެއިން. އެހެން ޕާޓީތަކާ ގުޅިގެން." ރައީސް ނަޝީދު ވިދާޅުވިއެވެ.
މި ސަރުކާރު އުފެދުނީ ކޯލިޝަނެއްގެ ތެރެއިންކަން ފާހަގަ ކުރައްވާ ނަޝީދު ވިދާޅުވީ، މަޖިލީހުގެ އިންތިހާބުގެ ނަތީޖާއިން ފެނިގެން ދިޔައީ ރައްޔިތުން އެމްޑީޕީ ހޮވަން ބޭނުންވިވަރު ބޭނުންވި ކަމަށެވެ. އަދި މަޖިލީހުގެ މެޖޯރިޓީ އޮތީ އެމްޑީޕީގައި ކަން ފާހަގަ ކުރައްވާ ނަޝީދު ވަނީ، މި ސަރުކާރު ރައްޔިތުންނަށް ޖަވާބުދާރީ ވެފައިވާ ކަމަށް ވިދާޅުވެފައެވެ.
"ރައްޔިތުން ނެތް ގޮތަކަށް ރާއްޖޭގެ ވެރިކަމެއް ނޯންނާނެ. ރައްޔިތުންގެ ފިކުރާއި ހިޔާލު އޮތް ގޮތަކަށް މި ރާއްޖޭގެ ވެރިކަން ތަރުތީބު ވެގެން ދާން ޖެހޭނީ. ހަމަ ގައިމު ވެސް އެމްޑީޕީގެ ވެރިކަމެއް އުފެދި ތަރުތީބު ވެގެން އަންނާނީ މި ގޮތުގައި،" ރައީސް ނަޝީދު ވިދާޅުވިއެވެ.
ނަޝީދު ވިދާޅުވީ، މަޖިލީހަށް ހާޒިރު ކުރެވުނު ވަޒީރުންގެ އަދަދަކީ އެއީ ސަރުކާރު ޖަވާބު ދާރީ ވެފައިވާ މިންވަރު ހާމަ ވެގެންދާ ކަމެއް ކަމެވެ. އަދި މަޖިލީހުގެ ސުޕަ މެޖޯރިޓީ އޮވެމެ، އެމްޑީޕީ މެންބަރުން، އެމްޑީޕީގެ ވަޒީރުން ހާޒިރުކޮށް ސުވާލު ކޮށްފައިވާކަން ނަޝީދު ފާހަގަ ކުރެއްވިއެވެ.
