ކުޑަކަމުދާތަކެތި ދޭން އިންކާރު ކުރި ކަމުގެ ދައުވާ ފިލްމީތަރި މަލީހާ ވަހީދު (މަލް) ގެ މައްޗަށް އުފުލައިފިއެވެ.
ޕްރޮސެކިއުޓާ ޖެނެރަލްގެ އޮފީހުން މައުލޫމާތުދޭ ގޮތުގައި، 19 ނޮވެންބަރު 2019 ދުވަހު ހުޅުމާލޭ ގެސްޓްހައުސްއެއްގައި ބަނގުރާ ބޯން ތިބިކަމަށް ތުހުމަތު ކުރެވުނު މައްސަލާގައި އަންހެނެއްގެ މައްޗަށް މަސްތުވާތަކެއްޗާބެހޭ ގާނޫނުގެ 125 ވަނަ މާއްދާގެ ދަށުން ކުޑަކަމުދާ އެއްޗެހި ދިނުމަށް އިންކާރުކުރުމުގެ ކުށުގެ ދައުވާ މެޖިސްޓްރޭޓް ކޯޓަށް ހުށަހެޅިފައިވާ ކަމަށެވެ.
މީގެ އިތުރުން އެ ގާނޫނުގެ 115 ވަނަ މާއްދާގެ ދަށުން 6 ފިރިހެނެއްގެ މައްޗަށް ކެނެބިސް ބޭނުންކުރުމުގެ ކުށުގެ ދައުވާ ހުޅުމާލެ މެޖިސްޓްރޭޓް ކޯޓަށް ހުށަހެޅިފައިވާ ކަމަށްވެސް ޕީޖީ އޮފީހުން ބުނެއެވެ. އަދި އެ މައްސަލާގައި އިތުރު ފިރިހެނެއްގެ މައްޗަށް ކެނެބިސް ބޭނުންކުރުމުގެ ކުށުގެ ދައުވާ ޑްރަގް ކޯޓަށް ވަނީ ހުށަހަޅާފައެވެ.
މަލްގެ މައްޗަށް އެ ދައުވާ އުފުލާފައި ވަނީ މިދިޔަ ނޮވެމްބަރު މަހުގެ 19 ވަނަ ދުވަހު ހުޅުމާލޭ ގެސްޓްހައުސް އަކުން މަލް އާއި އިތުރު 11 މީހަކު ހައްޔަރު ކުރުމަށް ފަހު ކުޑަކަމުދާ ތަކެތި ދޭން އެންގުމުން ކުޑަކަމުދާ ތަކެތި ނުދިނުމުންނެވެ. އެމީހުން ހައްޔަރުކުރީ ހުޅުމާލެ ގެސްޓްހައުސްއެއްގައި ބަނގުރާ ބޭނުންކޮށް، ޕާޓީކުރާކަމަށް ފުލުހުންގެ އިންޓެލިޖެންސަށް ލިބުނު މައުލޫމާތަކާއި ގުޅިގެންނެވެ.
މިދިޔަ އޮގަސްޓުމަހު އދ. މާމިގިލިން ވެސް މަސްތުވާތަކެއްޗާއެކު މަލް ހައްޔަރު ކުރިއެވެ. އެ މައްސަލާގައި އޭނާގެ މައްޗަށް ވަނީ ޑައިމޯފިން ޓްރެފިކް ކުރުމުގެ ދައުވާ އާއި ކެނަބިސް ބޭނުންކުރުމުގެ ދައުވާ އުފުލާފައެވެ. އެމައްސަލައިގެ ޝަރީއަތް ވެސް މިހާރު ވަނީ ފަށާފައެވެ.
ޚަބަރުތައް ބަލަާމިީހުންނައް ސަާފުވާހެން ޚަބަރުލިޔާނަމަ ހާދަރަނގަޅުވާނެއެވެ.