މިދިޔަ ބުރާސްފަތި ދުވަހުގެ ރޭ ލޯންޗަކާއި ޑިންގީއެއް ޖެހިގެން ހިނގި އެކްސިޑެންޓްގައި އަނިޔާވި ލޯންޗްގެ ކައްޕީގެ ހާލު މިހާރު ރަނގަޅު ކަމަށް އައިޖީއެމްއެޗް އިން ބުނެފިއެވެ.
ލޯންޗް ދުއްވަން އިން ކައްޕި، މުހައްމަދު މުސްތަފާގެ މޫނުމަތި ވަރަށް ބޮޑަށް ކަފައިގެން ގޮސްފައިވާއިރު އަތާއި އިނގިއްޔެއް ވަނީ ބިނދިފައެވެ. އަދި ދުލުގެ ނާރަކަށް ވެސް ވަނީ ގެއްލުންވެފައެވެ. މުސްތަފާއަށް ފުރަތަމަ ފަރުވާ ދީފައިވަނީ ބ. އަތޮޅު ހޮސްޕިޓަލްގައެވެ. ނަމަވެސް ހާލު ސީރިއަސްވެ، މިދިޔަ ހުކުރު ދުވަހު ހަވީރު ވަނީ އައިޖީއެމްއެޗްއަށް ގެނެސް އޭނާއަށް ފަރުވާދޭން ފަށާފައެވެ.
އައިޖީއެމްއެޗްގެ މީޑިއާ އޮފިޝަލް "ދަ ޕްރެސް" އަށް ވިދާޅުވީ، މުސްތަފާގެ ހާލު މިހާރު ރަނގަޅު ކަމަށެވެ. އަދި އޭނާއަށް އައިސީޔޫގައި ފަރުވާ ދީފައިނުވާ ކަމަށާއި އޭނާ މިހާރުވެސް އޮތީ ވާޑްގައި ކަމަށެވެ. އޭނާ މިހާރު ބާއްވާފައި ވަނީ މޫނުގެ އޮޕަަރޭޝަނެއް ކުރުމަށް ކަމަށްވެސް އޭނާ ވިދާޅުވިއެވެ.
ފުލުހުން މީގެ ކުރިން ބުނީ، އެކްސިޑެންޓުގައި ސީރިއަސް އަނިޔާތަކެއް ލިބިފައިވަނީ ލޯންޗުގެ ދުއްވަން އިން މީހާއަށް ކަމަށެވެ. އަދި ޑިންގީގައި ތިބި ތިން މީހުންގެ ތެރެއިން ދެ މީހަކަށްވެސް ބޮޑެތި އަނިޔާ ލިބިފައިވާ ކަމަށާއި ނަމަވެސް އެ މީހުންގެ ހާލު ސީރިޔަސް ނޫން ކަމަށެވެ. އަދި ލޯންޗު ފަޅުވެރިޔަކަށް ހުރި ބިދޭސީ މީހާއަށްވެސް އެކިވަރުގެ އަނިޔާ ލިބިފައިވާ ކަމަށްވެސް ފުލުހުން ބުނެފައިވެއެވެ.
މި އެކްސިޑެންޓުގައި ޑިންގީގައި ތިބި ތިން މީހުންގެ ތެރެއިން އެކަކު ވަނީ ގެއްލިފައެވެ. އޭނާގެ ހޯދުމުގެ މަސައްކަތް ފުލުހުންނާއި ސިފައިން ދަނީ ކުރަމުންނެވެ. އޭނާ ހޯދުމަށް ސިފައިން ދަނީ ހުރިހާ ވަސީލަތްތަށް ބޭނުން ކުރަމުންނެވެ.
ގެއްލިގެން ހޯދަމުންދަނީ ބ. އޭދަފުށީ މުޝްތަރީގެ، ނަސްރުﷲ އަބްދުﷲ އެވެ.
