ފުލުހުންނާއި އިސްލާމިކް މިނިސްޓްރީ ގުޅިގެން ރ. މަޑުއްވަރީގައި ދީނީ ނަސޭހަތް ދިނުމުގެ ޕްރޮގްރާމެއް ފަށައިފިއެވެ.

މަޑުއްވަރީ ކައުންސިލުން ނެރުނު ބަޔާނެއްގައި ވަނީ، ފުލުހުންނާއި އިސްލާމިކް މިނިސްޓްރީ އަދި ބައެއް މުއައްސަސާތައް ގުޅިގެން ދީނީ ދަރުސް ދިނުމާއި ދީނީ ހޭލުންތެރިކަން އިތުރު ކުރުމުގެ ގޮތުން މިއަދުން ފެށިގެން ތިން ދުވަހަށް ޕްރޮގްރާމް ތަކެއް ކުރިއަށް ގެންދިއުމަށް ނިންމާފައިވާ ކަމަށެވެ.

އެގޮތުން ކޮންމެ ދުވަހެއްގެ އަސުރު އަދި މަޣްރިބް ނަމާދަށް ފަހު މިސްކިތުގައި ދީނީ ނަސޭހަތް ދިނުމަށް ވަނީ ތާވަލު ކޮށްފައެވެ. އަދި ދީނީ ނަސޭހަތް ދިނުމަށް މަޑުއްވަރީއަށް ގޮސްއުޅޭ ޝެއިހުންގެ ތެރޭގައި ޝެއިހު ނަސްރުއްﷲ އަލީ އާއި ޝައިހު ހުސައިން އަބްދުﷲ ސައީދުގެ އިތުރުން ޝެއިހު އަހުމަދު ފަހުމީ ދީދީ ހިމެނެއެވެ.

"މީގެ އިތުރުން މި ތިން ދުވަހުގެ ހެނދުނާއި ހަވީރުގެ ވަގުތު ތަކުގައި ޝެއިހުން އެކި ސަރަހައްދުތަކަށް ޒިޔާރަތްކުރުމަށްވެސް ވަނީ ރޭވިފައި. މި ޒިޔާރަތުގައި މިރަށުގައި ދިރިއުޅޭ ފަރާތްތަކާއި ބައްދަލުކޮށް ދީނީގޮތުން އޮޅުން ފިލުވަން ބޭނުންވާ ކަންކަން އޮޅުންފިލުވައިދިނުމަށްވެސް ވަނީ ހަމަޖެހިފައި." މަޑުއްވަރީ ކައުންސިލުން ކުރި އިއުލާނެއްގައި ބުނެފައިވެ އެވެ.

ދީނީގޮތުން އޮޅުން ފިލުވަން ބޭނުންވާ ކަންކަމާއި އޮޅުން އަރާ ކަންކަން އޮޅުން ފިލުވުމަށް ޝެއިހުންނާ ގުޅިގެން ކުރިއަށް ގެންދިއުމަށްވެސް މަޑުއްވަރީ ކައުންސިލުން ވަނީ އެދިފައެވެ.

ފުލުހުން ވަނީ މަޑުއްވަރީގައި "އައްސޭރި" ނަމުގައި ބޮޑު އޮޕަރޭޝަނެއް ކުރިއަށް ގެންގޮސްފައެވެ. އެ އޮޕަރޭޝަން ކުރިއަށް ގެންގޮސްފައިވަނީ މަޑުއްވަރީގައި ދީނީ ހަރުކަށި ފިކުރުގެ ގިނަ ބަޔަކު އުޅޭ ކަމުގެ ތުހުމަތާ ގުޅިގެނެވެ. އެ އޮޕަރޭޝަނުގެ ތެރޭގައި ތިން މީހަކު ވަނީ ހައްޔަރު ކޮށްފައެވެ.

މަޑުއްވަރީގެ ގެތައް ބަލައި ފާސް ކުރުމުގެ ހާއްސަ އޮޕަރޭޝަނެއް ސަލާމަތީ ބާރުތަކުން ކުރިއަށް ގެންގޮސްފައި ވަނީ ކުޑަކުދިންނާއި އަންހެނުންނަށް ލިބިދޭ އަސާސީ ހައްގުތަކާއި ރައްކާތެރިކަމުން މަހުރޫމުކޮށް ޓެރަރިޒަމާއި ހައްދުފަހަނައަޅާ ދިއުމުގެ އަމަލުތަކަށް މީހުން އަހުލުވެރިކޮށް، ޓެރަރިސްޓް ޖަމާއަތްތަކަށް މީހުން ރެކްރޫޓް ކުރުމަށް ހިންގާ މަސައްކަތާ ދެކޮޅަށެވެ.

މަޑުއްވަރީގައި ހަރުކަށި ފިކުރު ފަތުރައި ދައުލަތުގެ އާންމު ނިޒާމާއި އިދާރީ އިންތިޒާމްތަކުން ބޭރުން ވަކި ޖަމާއަތް ހަދައިގެން އުޅޭ ބަޔަކު ދަނީ އަންހެނުންނާއި ކުޑަކުދިން ހައްގުތަކުން މަހުރޫމުކޮށް، އެ ފަރާތްތަކުގެ ނާޖާއިޒު ފައިދާ ނަގަމުން ކަމަށް ފުލުހުން ބުނެފައިވެއެވެ. އަދި ބައެއް ފަރާތްތަކުން އަންހެނުންނާއި ކުޑަކުދިން މުޖުތަމައުއާ ވަކިކޮށް، ކުޑަކުދިންނަށް ސިއްހީގޮތުން ދިނުމަށް ލާޒިމުކުރާ ވެކްސިން ނުދީ، ތައުލީމު ހާސިލު ކުރުމުގެ ހައްގުން މަހުރޫމު ކޮށްފައިވާ ކަމަށް ވެސް ފުލުހުން ބުނެއެވެ.

އިސްލާމިކް މިނިސްޓްރީ މަޑުއްވަރީ އޮޕަރޭޝަން ޕޮލިސް