ޖަލު ހުކުމެއް ތަންފީޒު ކުރައްވަމުން ގެންދަވާ ކުރީގެ ރައީސް އަބުދުﷲ ޔާމީން މިނިވަން ކުރަން ކުރަމުންގެންދާ މަސައްކަތައް އެެއްވެސް ބަދަލެއް އައިސްފައިނުވާ ކަމަށް ޕީއެންސީގެ ރައީސް އަބުދުއްރަހީމް އަބުދުﷲ (އަދުރޭ) ވިދާޅުވެއްޖެއެވެ.
ޔާމީން މިނިވަން ކުރަން ގޮވާލައި ޕީޕީއެމްގެ އޮފީހުގައި ރޭ ބޭއްވި ޖަލްސާގައި އަދުރޭ ވިދާޅުވީ އިދިކޮޅުގެ ސަފުތައް ބައިބައި ކޮށްލަން މީޑިއާ އާއި އެނޫންވެސް ވަސީލަތްތައް ބޭނުންކޮށްގެން ސަރުކާރުން މަސައްކަތް ކުރަމުންދާ ކަމަށެވެ. އެގޮތުން ކުރިން ޖަލްސާތަކާއި، އެއްވުންތައް ބާއްވާގޮތަށް މިހާރު އިދިކޮޅުން ނުބާއްވާކަމަށް ބުނެ، މީޑިއާތަކުގައި ރިޕޯޓްކޮށްފައިވާ ކަމަށެވެ. އެ މަސައްކަތްތަކާ ދޭތެރޭގައި ހުރިހާ ރައްޔިތުން ފާރަވެރިވާން ޖެހޭނެ ކަމަށް ވެސް އޭނާ ވިދާޅުވިއެވެ.
އޭނާ ވިދާޅުވީ، އެ ހަރަކާތްތަށް ބަރާބަރަށް ކުރިޔަށް ގެންދާ ކަމަށާއި، އެކަމަށް އެއްވެސް ބަދަލެއް ނާންނާނެ ކަމަށެވެ. އަދި ވިދާޅުވީ ޔާމީން މިނިވަން ކުރަން ފެއްޓެވި މަސައްކަތަށް ހީނަރުކަން ނާންނަ ކަމަށެވެ. އެ މަސައްކަތް ވަރަށް ފޯރި އާއި ޖޯޝުގައި ހިނގަމުންދާ ކަމަށެވެ.
އަދުރޭ ވިދާޅުވީ އިދިކޮޅު ފަރާތްތަކުން ޔާމީން މިނިވަން ކުރުމުގެ މަސައްކަތް ކުރަނީ ވާދަވެރިންނަށް ނުވިސްނޭ ފަދަ ގޮތަކަށް ކަމަށެވެ. ޕީޕީއެމް އަދި ޕީއެންސީ ޖަހައިގަތުމަށް "މިނިކާ ބާޒުތަކަށް" އެއްވެސް ފުރުސަތެއް ނުދެއްވާނެ ކަމަށް ވެސް އަދުރޭ ވިދާޅުވިއެވެ.
އަދުރޭ ވިދާޅުވި ގޮތުގައި ޕީޕީއެމް އަދި ޕީއެންސީގެ ލީޑަޝިޕްގައި މިހާރު ތިއްބެވީ "މާ ހަންބޯ" ބައެކެވެ. އަދި ބުނާހާ އެއްޗަކާ ގުޅިގެން "ފިލައިގެން ނުދާނެ" ކަމަށް އޭނާ ވިދާޅުވި އެވެ.
އަދުރޭ އިތުރަށް ވިދާޅުވީ 2023 ގައި ޕީޕީއެމް، ޕީއެންސީން ރިޔާސީ ކެނޑިޑޭޓަކަށްވެސް ހުންނަވާނީ ރައީސް ޔާމީން ކަމަށް އަބުދުއްރަހީމް ވަނީ ވިދާޅުވެފަ އެވެ.
