ފުލުހުންގެ ކޭ9 ސްކޮޑްގައި ހިމެނޭ ޝަކީރާއަށް ދިވެހިންގެ ހިތްޖެހިއްޖެއެވެ.
ފުލުހުން ގެންގުޅޭ ކުއްތާތައް ގެންގުޅެނީ ލޯބިންތޯ އަހާ އިއްޔެ އާންމުންގެ މީހަކު ކުރި ޓްވީޓަކަށް ޖަވާބު ދެމުން ފުލުހުން ވަނީ ބައެއް ކުއްތާތަކާއި ބެހޭ މައުލޫމާތު އާންމު ކޮށްފައެވެ. އެގޮތުން، މިކަމުގައި ޓްވިޓާގައި ހަރަކާތްތެރިވާ ގިނަ ޒުވާނުންގެ ތައުރީފު ފުލުހުންނަށް ލިބިގެން ދިޔައިރު، މިފަދަ މައުލޫމާތު އާންމުންނާ ގިނަ ގިނައިން ހިއްސާ ކުރުމަކީ ފުލުހުންނަށް ކުރެވޭނެ ވަރަށް ރަނގަޅު ކަމެއް ކަމަށް ގިނަ ފަރާތްތަކުން ބުނެއެވެ.
ފުލުހުން ބުނީ، ޑްރަގް އޮޕަރޭޝަންތަކުގައި ބޭނުންކުރާ ކުއްތާތައް ބަލަހައްޓާނެ އޮފިސަރުން ހޯދަނީ ޖަނަވާރުންނާ ގުޅޭ، ޖަނަވާރުންނަށް ލޯބި ޖެހިފައިވާ އޮފިސަރުން ފާހަގަކޮށްގެން ކަމަށެވެ. އަދި ކޮންމެ ކުއްތާއެއް ބެލެހެއްޓުމަށް ވަކި އޮފިސަރަކާ ހަވާލު ކޮށްފައި ވާއިރު، ކޭ9 ސްކޮޑްގައި ކުއްތާގެ އިތުރުން ދޫންޏާއި މުސަޅު ފަދަ ޖަނަވާރުތައް ވެސް ބަލަހައްޓާ ކަމަށް ފުލުހުން ބުނެއެވެ.
ފުލުހުން ބުނީ، ހުރިހާ ކުއްތާތަކެއް ވެސް ބަލަހައްޓަނީ ވަރަށް ލޯބިން ކަމަށާއި، އެއީ ފުލުހުންގެ އާއިލާގެ މުހިންމު ބައިވެރިން ކަމަށެވެ. އަދި ފުލުހުންގެ ވަޒީފާއަކީ ކޮންމެ ދުވަހަކުވެސް ތަފާތު ކުރިމަތިލުންތަކާއި، ކުރިމަތިލާން ޖެހޭ އުނދަގޫ ވަޒީފާއެއް ކަމުން، މި ކުއްތާތަކަކީ އޮފިސަރުންގެ ނަފްސާނީ ދުޅަހެޔޮ ކަމުގައި މުހިންމު ދައުރެއް އަދާކުރާ ބައެއް ކަމަށް ފުލުހުން ބުނެއެވެ.
ފުލުހުންގެ ގެންގުޅޭ ކުއްތާތަކުގެ ތެރޭގައި ތަފާތު ވައްތަރުތަކުގެ ކުއްތާތައް ހިމެނެއެވެ. އެގޮތުން، ބެލްޖިއަމް މަލިނޮއިސް، ލެބްރެޑާ، ގޯލްޑެން ރިޓްރީވާ، ޗޮކްލެޓް ލެބްރޯޑް، ޕެޓިޑޭލް، ޖެކް ރަސްލް ހިމެނެއެވެ. މީގެ ތެރެއިން ފުލުހުން ދައްކާލާފައި ވަނީ، ބެލްޖިއަމް މަލިނޮއިސް، ދެ ލެބްރޭޑާ އަދި ލެބްރޭޑާ ޕެޓިޑޭލް މިކްސް އެކެވެ. އެއީ ބްލެކީ، ޝަކީރާ، ސޭމް އަދި ޓާރާ އެވެ.
މި ކުއްތާތަކުގެ ތެރެއިން އެންމެ ގިނަ މީހުންނަށް ކަމުގޮސްފައި ވަނީ ޝަކީރާއެވެ. އެއީ ދުނިޔޭގެ މަޝްހޫރު ލަވަކިއުންތެރިއަކަށް ކިޔާ ނަމަކަށް ވީމާ ކަމަށް ވެސް ވެދާނެއެވެ. ނަމަވެސް ބްލޯންޑް، ޑަޗް ޝަކީރާއަށް ވަނީ ގިނަ ދިވެހިންގެ ހިތް ޖެހިފައޭ ބުންޏަސް ދޮގަކަށް ނުވާނެއެވެ. ޝަކީރާއަކީ ގޯލްޑަން ރިޓްރީވާއެކެވެ.
މި ކުއްތާތަކަށް ނަން ދީފައިވާ ގޮތާ ބެހޭގޮތުން މައުލޫމާތު ހިއްސާ ކުރަމުން ފުލުހުން ބުނީ، ހުރިހާ ކުއްތާތަކަށް ވެސް ނަން ދީފައިވަނީ ނެދަލެންޑުން ކަމަށެވެ. އަދި މި ކުއްތާތައް އެއްބާރުލުން ދޭނީ ހަމައެކަނި އޭގެ އަސްލު ނަމުން ގޮވުމުން ކަމަށާއި، އަމިއްލައަށް ހަދައިގެން ބޭނުންކުރާ ނަމަކަށް އެއްބާރުލުން ނުދޭނެ ކަމަށެވެ.
މީގެ އިތުރުން ފުލުހުން ބުނީ، ފިރިހެން ކުއްތާ އަދި އަންހެން ކުއްތާތައް ބަހައްޓަނީ ވަކިން ކަމަށެވެ. އަދި މިފަދައިން ވަކިން ބަހައްޓަނީ ކުއްތާތައް ބަޑުބޮޑުވެ ވިހާފާނެތީ ކަމަށް ފުލުހުން ބުނެއެވެ.
