އަބޫދާބީގެ ވަލީ އަހުދުގެ ދައުވަތަކަށް ރައީސް އިބްރާހިމް މުހައްމަދު ސޯލިހާއި ރައްޔިތުން މަޖިލީހުގެ ރައީސް، ރައީސް މުހައްމަދު ނަޝީދު މިރޭ ފުރާވަޑައިގެންފިއެވެ.

"ދަ ޕްރެސް" އަށް މައުލޫމާތު ދެއްވަމުން ރައީސް އޮފީހުގެ ތަރުޖަމާނު އިބްރާހިމް ހޫދު ވިދާޅުވީ، އަބޫދާބީގެ ކްރައުން ޕްރިންސް މުހައްމަދު ބިން ޒައިދު އަލް ނަހްޔާންގެ ދައުވަތަކަށް ރައީސް ސޯލިހާއި ރައީސް ނަޝީދު މިރޭ ފުރާވަޑައިގެންފި ކަމަށެވެ.

އަބޫދާބީއަށް މި ދެބޭފުޅުން ކުރައްވާ ދަރުފުޅުގައި ވަލީއަހުދާއި ޔުނައިޓެޑް އަރަބް އެމިރޭޓްސްގެ ފޮރިން މިނިސްޓަރާ ރަސްމީކޮށް ބައްދަލު ކުރެއްވުމަށް ހަމަޖެހިފައި ކަމަށްވެސް ހޫދު ވިދާޅުވިއެވެ.

މި ދަތުރުގައި ދެގައުމުގެ ދެމެދުގައި ގުޅުން ބަދަހި ކުރުމުގެ ގޮތުން ބައްދަލުވުން ބާއްވޭނެ ކަމަށް މައުލޫމާތު ލިބެއެވެ. އަދި މި ދަތުރުގައި، ދުނިޔޭގެ ފެންވަރުގައި ބާއްވާ ފޯމިއުލާ ވަން ރޭސްކާރު މުބާރާތްވެސް މި ދެ ވެރިން ބައްލަވާލައްވާނެ ކަމަށް ވަނީ މައުލޫމާތު ލިބިފައެވެ.

ރައީސް ސޯލިހާއި، ރައީސް ނަޝިދުގެ އިތުރުން، އެ ދެ ބޭފުޅުންނާއެކު ބައިވެރިވެވަޑައިގަތުމަށް ރާއްޖޭގެ ހާރިޖީ ވަޒީރު އަބްދުﷲ ޝާހިދުވެސް އަބޫދާބީއަށް މިސްރާބު ޖައްސަވައިފިއެވެ.

ޝާހިދު ކުރެއްވި ޓްވީޓެއްގައި ވިދާޅުވެފައިވަނީ އޭނާ އަބޫދާބީއަށް ކުރެއްވި ދަތުރުފުޅަށް މަހެއްހާ ދުވަހުގެ ތެރޭގައި ދެ ރައީސުން އަބޫދާބީއަށް ވަޑައިގަތުމުން ދެ ގައުމުގެ ގުޅުން ބަދަހިވެގެން ދިޔަ މިންވަރު ދޭހަވެގެން ދާ ކަމަށެވެ.