އޮސްޓްރޭލިއާގެ ނިއު ސައުތް ވޭލްސް ސަރަހައްދުގައި ރޯވަމުންދާ ވަރުގަދަ އަލިފާންގަނޑުތަކުގެ ޝިކާރައަކަށްވެ، ފުރާނަ ގެއްލުނު މީހުންގެ އަދަދު 4 އަށް އަރައިފިއެވެ.
އަލިފާނުގެ ހާދިސާގައި މަރުވި މީހުންގެ އަދަދު 4 އަށް އަރާފައި މިވަނީ، އަނދާހުލިވެފައިވާ ޖަންގަލީ ސަރަހައްދުން މިއަދު ހެނދުނު ފެނުނު ފިރިހެނެއްގެ ހަށިގަނޑާއެކުގައެވެ.
ކަމާ ބެހޭ ފަރާތްތަކުން ވަނީ އެ ސަރަހައްދުގައި ރޯވަމުންދާ އަލިފާންގަނޑުތަކުގެ ކާރިސާ އިތުރަށް ނުރައްކާވަމުންދާނެ ކަމުގެ އިންޒާރު ދީފައެވެ.
ފާއިތުވީ ހަފުތާއެއްހާ ދުވަހު ރޯވަމުންދިޔަ މި އަލިފާންގަނޑުތަކުގެ ސަބަބުން 1 މިލިއަން ހެކްޓަރު ނުވަތަ 2.5 މިލިއަން އޭކަރުގެ ދަނޑުބިމާ ގަސްތައް އަނދާ އަޅިއަށް ވެފައިވާކަމަށް މައުލުމާތު ލިބެއެވެ. މި އަލިފާންގަނޑުތައް އިތުރަށް ފެތުރި ގަދަވަމުންދަނީ ވައިގެ ތެތްކަން ދަށްވުމާ އެކު ވައި ގަދަވެގެންކަމަށް ޚަބަރު ލިބެއެވެ.
މިއަދު ހެނދުނުގެ ނިޔަލަށް އެއްކޮށްފައިވާ މައުލޫމާތަށް ބަލާއިރު ނިއު ސައުތް ވޭލްސްގައި އެކަނިވެސް 60 އަލިފާންގަނޑެއް ދަނީ ރޯވެ އަނދަމުންނެވެ. މި ސަރަހައްދުގައި އަލިފާން ނިއްވުމުގެ މަސައްކަތުގައި 1000 އަށްވުރެ ގިނަ ފަޔާފައިޓަރުން ހަރަކާތްތެރިވަމުންދާކަމަށް ޚަބަރު ލިބެއެވެ.
ކަންމިހެން އޮތްއިރު މިއަދުގެ ވަގުތުތަކުގައި އޮސްޓްރޭލިއާގެ ބައެއް ހިސާބުތަކުގެ ފިނި ހޫނުމިން 43 ޑިގްރީ ސެލްސިއަސްއަށް އެރުން އެކަށީގެންވާކަމުގެ އިންޒާރުވެސް ކަމާ ބެހޭ ފަރާތްތަކުން މިހާރު ވަނީ ދީފައެވެ.
