ސަރުކާރުގެ އިސްފަރާތްތަކުން ކްރިމިނަލް ކޯޓުގެ އިސްގާޒީ އަހްމަދު ހައިލަމަށް ނުފޫޒު ފޯރުވިކަމަށް އިންކާރު ނުކުރާތީ ގާނޫނީ ވަކީލު ހުސެއިން ޝަމީމް ސުވާލުއުފައްދަވައިފިއެވެ.
ޝަމީމް މިއަދު ވިދާޅުވެފައި ވަނީ، ކުރީގެ ރައީސް އަބްދުﷲ ޔާމީންގެ މައްޗަށް މަނީ ލޯންޑާ ކުރުމުގެ ތުހުމަތުގައި ދައުލަތުން އުފުލާފައިވާ ދައުވާގެ މައްސަލައިގައި، އެ މައްސަލަ ބައްލަވާ ފަނޑިޔާރު ގާޒީ ހައިލަމަށް ސަރުކާރުގެ އިސްފަރާތްތަކުން ނުފޫޒު ފޯރުވަން މަސައްކަތް ކުރި ވާހަކައިގައި ކަންބޮޑުވުން ތަކެއް ހުރި ކަމަށެވެ.
ސަރުކާރުގެ އިސް ފަރާތްތަކުން އަދި ސަރުކާރުން ވެސް ގާޒީ ހައިލަމް ކުރެއްވި ތުހުމަތުތަކަށް އިންކާރުކޮށްފައި ނުވާ ކަން ފާހަގަކޮށް ޝަމީމް ވިދާޅުވީ، ހައިލަމަށް ނުފޫޒު ފޯރުވަން މަސައްކަތް ނުކުރާ ނަމަ އެކަން ހާމަ ކުރަން ޖެހޭ ކަމަށެވެ. އަދި ސަރުކާރުން ނުވަތަ ސަރުކާރުގެ އިސް ފަރާތަކުން މިކަމަށް އިންކާރު ނުކުރާ ނަމަ 'ނުބައެއް އުޅޭ ކަމަށް' ހީވެލައްވާ ކަމަށެވެ.
މީގެ އިތުރުން، ގާޒީ ހައިލަމަށް ނުފޫޒު ފޯރުވުމުގެ ގޮތުން ގުޅި ފަރާތެއްގެ ނަން ހާމަ ކޮށްދެއްވުމަށް ހައިލަމް ގާތު އެއްސެވުމަށް އެދިވަޑައިގެން ޝެއިހް ޑރ. މުހައްމަދު އިޔާޒް ކުރެއްވި ކޮމެންޓްގެ ޖަވާބުގައި ޝަމީމް ވަނީ، 'އޭރުން ބޭޒާރު ވަނީ އޭނާއާއި ޑރ. އިޔާޒް ކަމަށާއި، ނުފޫޒު ފޯރުވުމަށް ގާޒީ ހައިލަމަށް ގުޅުއްވި ފަރާތަކުން ޒިންމާ އުފުއްލަވަން ކެރިވަޑައިގަންނަވާނެތޯ' ސުވާލު އުފައްދަވާފައެވެ. އަދި 'ހައިލަމް އަކީ ހައިލަމް ކަމަށް ވިދާޅުވެ، ޝަމީމް ވަނީ ގާޒީ ހައިލަމް ދޮގު ހެއްދެވުމުގެ ފުރުސަތުވެސް އޮތް' ކަމަށް ވިދާޅުވެ ތުހުމަތު ކުރައްވާފައެވެ.
ރައީސް ޔާމީނުގެ ޝަރީއަތުގައި ހުކުމާ ހަމައަށް ގޮސްފައި ވަނިކޮށް ގާޒީ ހައިލަމް ސަސްޕެންޑް ކޮށްފައި ވާއިރު، ޔާމީން ޖަލަށް ލާނެ ކަމުގެ ޔަގީންކަން ހޯދަން ސަރުކާރުގެ އިސް ބައެއް ފަރާތްތަކުން ގުޅިކަމަށް އޭނާ ވަނީ މިދިޔަ ބުރާސްފަތި ދުވަހު ނެރުއްވި ބަޔާނެއްގައި ވިދާޅުވެފައެވެ. ގާޒީ ހައިލަމަށް ނުފޫޒު ފޯރުވުމުގެ ގޮތުން ގުޅި އޮފިޝަލުން ވަނީ އޭނާއަށް އިންޒާރު ދީ ބިރު ދެއްކާފައިވާއިރު، އޭނާއާ މެދު ޖުޑީޝަލް ސާވިސް ކޮމިޝަން (ޖޭއެސްސީ) އިން ފިޔަވަޅު އަޅައި، ރިޝްވަތުގެ ތުހުމަތުތަކެއްކޮށް އަބުރު ކަތިލަމުން ދަނީ ޔާމީނަށް ޖަލު ހުކުމެއް އިއްވާނެ ކަމުގެ ޔަގީންކަން ނުދިނުމުން ކަމަށް ހައިލަމް ވިދާޅުވިއެވެ.
ގާޒީ ހައިލަމް ވިދާޅުވެފައިވާ ގޮތުގައި، ސަރުކާރުގެ ވަރަށް އިސް މަގާމުތަކުގައި ތިއްބެވި ބޭފުޅޫން ސީދާ ގޮތުން މެސެޖުކުރައްވައިގެންނާއި ގުޅުއްވައިގެން އަދި ދަންނަ ގާތް މީހުން މެދުވެރިކޮށް ޔާމީން ޖަލަށްލުމަށް ހުކުމް ކުރާނެކަމުގެ ކަށަވަރުކަން ދިނުމަށް އެދިވަޑައިގެންފައިވެއެވެ. އަދި އެކަމުގެ ކަށާވަރުކަން ނުދެއްވާނެ ކަމަށް ވިދާޅުވުމުން ޕޮލިހުގައި އަލްހާނު ފަހުމީއާއި އޭނާގެ މައްސަަލައެއް އޮތް ކަމަށް ވިދާޅުވެ އެ މައްސަލަ ބެލޭނެ ކަމުގެ އިންޒާރު ދެއްވާފައިވާ ކަމަށާއި ސަސްޕެންޑް ކުރާނެ ކަމުގެ އިންޒާރު ވެސް ދެއްވާފައިވާ ކަމަށް ހައިލަމް ވިދާޅުވެފައިވެއެވެ.
