ފްލައިމީ އިން މިއަދު ގެނައި އާ މަތިންދާބޯޓާ އެކު ދަތުރުކުރަމުން އަންނަ މަންޒިލްތައް އިތުރުކުރަން ފަސޭހަ ވެގެންދާނޭ ކަމަށް ފްލައިމީ ހިންގާ ވިލާ އެއާގެ މެނޭޖިން ޑިރެކްޓަރު އަބްދުﷲ ނާޝިދު ވިދާޅުވެއްޖެއެވެ.

އޭނާ ވިދާޅުވީ ކުރިއަށް އޮތްތާނގައި އިފުރު އެއާޕޯޓަށް ދަތުރު ކުރަން ފަށާނެ ކަމަށާއި މާފަރު އެއާޕޯޓު ހުޅުވުމާއެކު އެ އެއާޕޯޓަށް ވެސް ދަތުރުތައް ފަށާނެ ކަމަށެވެ.

މިއަދު ގެނައި ބޯޓަކީ ހަތްދިހަ ދެ ސީޓުގެ ބޯޓެކެވެ. މި ބޯޓުގެ ސީޓުތަކަކީ ފަސިންޖަރުންނަށް ފަސޭހަ ކަމާއެކު ދަތުރު ކުރެވޭނެ ގޮތަށް ތައްޔާރުކޮށްފައިވާ ސީޓުތަކެކެވެ. އެގޮތުން، ކޮންމެ ސީޓެއްގެ ދޭތެރޭގައި 29 އިންޗީގެ ދުރުމިނެއް ހުރެއެވެ. ފްލައިމީގެ ފްލީޓަށް އިތުރު ކުރި މި ބޯޓަކީ އޭޓީއާރު 600-72 ގެ ބޯޓެކެވެ.

އެތެރޭގެ އުދުހުންތަކަށް ބޭނުން ކުރަމުން އަންނަ ފްލައިމީ އިން މިހާރު އަންނަނީ އޭޓީއާރުގެ 500-72 މަރުކާގެ ދެ ބޯޓު ބޭނުން ކޮށްގެން މާލެ އިން ޑޮމެސްޓިކް ދެ އެއާޕޯޓަކަށް ދަތުރު ކުރަމުންނެވެ. އެއީ އދ. މާމިގިލީ އެއާޕޯޓާއި ބ. ދަރަވަންދޫ އެއާޕޯޓެވެ.

ޖުމްހޫރީ ޕާޓީގެ ލީޑަރު އަދި ވިޔަފާރިވެރިޔާ ގާސިމް އިބްރާހިމްގެ ހިއްސާ އޮންނަ ވިލާ އެއާގެ ފްލައިމީ އިން އަންނަނީ ސީޕްލޭން ދަތުރުތައް ފެށުމަށްވެސް ތައްޔާރުވަމުންނެވެ.

ހަބަރު