ރާއްޖެ ސަރަހައްދުން އިންޖީނު ހުއްޓުނު އިރާނު ބޯޓުން މަސްތުވާތަކެއްޗަށް ޝައްކުކުރެވޭ ތަކެތި ފެނިއްޖެއެވެ.
އެމްއެންޑީއެފުން ބުނީ މި މަސްބޯޓު ހިފަހައްޓާފައި ވަނީ، ގޮތްނޭނގޭ އުޅަނދެއް ރާއްޖޭގެ ސަރަހައްދުން ދަތުރުކުރަމުންދާ ކަމުގެ މައުލޫމާތު ލިބިގެން، އެމްއެންޑީއެފް ކޯސްޓްގާޑާއި މޯލްޑިވްސް ޕޮލިސް ސާވިސްއިން ގުޅިގެން ކުރިއަށްގެންދިޔަ އޮޕަރޭޝަނެއްގައި، އދ.މަންދޫގެ ހުޅަނގުން ގާތްގަނޑަކަށް 4.8 ނޯޓިކަލް މޭލު ބޭރުގައި އެ މަސްބޯޓު އޮއްވައި، މިއަދު ހެނދުނު 11:40 ހާއިރުއެވެ.
މި މަސްބޯޓަށް ސިފައިންނާއި ފުލުހުން އަރައި، ބެލިބެލުމުގައި އެބޯޓުގެ ތެރޭގައި، މަސްތުވާތަކެތި ކަމަށް ޝައްކުކުރެވޭ އެއްޗެހި ވަނީ ފެނިފައިވާ ކަމަށް އެމްއެންޑީއެފުން މައުލޫމާތުދެއެވެ. އަދި އެ ބޯޓު އިތުރަށް ބަލައި ޗެކްކުރުމުގެ ގޮތުން އެމްއެންޑީއެފާއި މޯލްޑިވްސް ޕޮލިސް ސާވިސްއިން މިހާރު ދަނީ މަސައްކަތް ކުރަމުން ކަމަށް އެމްއެންޑީއެފުން ބުނެއެވެ.
އިރާނުގެ މި ބޯޓު މިއަދު ހިފަހައްޓާފައިވާއިރު، ފުލުހުން ވަނީ، އދ. މަންދޫ ބޭރުން ރާއްޖޭން ބޭރުގެ ލަކުޑި ބޯޓެއްގެ އިންޖީނު ހުއްޓިގެން މަންދޫއާ ދިމާލަށް އޮޔާދާ ކަމުގެ މައުލޫމާތު މިއަދު 8:20 ހާއިރު ފުލުހުންނަށް ލިބުމާއި ގުޅިގެން، ކޯސްޓް ގާޑާ ހިއްސާކޮށް، އެ ސަރަހައްދަށް ގޮސްފައެވެ. އަދި މިއީ އީރާނުގެ ބޯޓެއްކަން އެނގިފައި ވަނީ އެ ބޯޓަށް އަރާ ބެލުމުން ކަމަށާއި އެ ބޯޓުގައި އިރާނުގެ 7 ފިރިހެނުން ތިބި ކަމަށް ފުލުހުން ބުނެއެވެ.
ފުލުހުން ބުނީ މިކަމުގައި ފުލުހުން ބަލަންޖެހޭ ކަންކަން ބަލަމުންދާ ކަމަށެވެ.
އިރާންގެ ބޯޓެއް ރާއްޖެ ސަރަހައްދުން އޮޔާދާތީ ފުލުހުން ހަރަކާތްތެރި ވަމުން ދާއިރު ރާއްޖެއަށް ކަނޑުމަގުން މަސްތުވާތަކެތި އެތެރެކުރަން އުޅެނިކޮށް އިރާންގެ ބައެއް ބޯޓުތައް ރާއްޖޭގެ ސަލާމަތީ ބާރުތަކުން މީގެކުރިން ވަނީ ހިފަހައްޓާފައެވެ.
