ނުރައްކާތެރި ހައްދުފަހަނަ އެޅުން ހުއްޓުވުމުގެ މަސައްކަތްތަކާ ބެހޭ ނެޝަނަލް އެކްޝަން ޕްލޭން އެކުލަވާލުމަށް ހިޔާލު ހުށްހެޅުމުގެ ފުރުސަތު އާންމުންނަށް ހުޅުވާލައިފިއެވެ.
ނެޝަނަލް ކައުންޓާ ޓެރަރިޒަމް ސެންޓަރުން މައުލޫމާތު ދޭ ގޮތުގައި، ވައިލެންޓް އެކްސްޓްރީމިޒަމް ހުއްޓުވުމާ ބެހޭ ގައުމީ އިސްތިރާޖީގައި މަސައްކަތް ކުރުމަށް ކަނޑައަޅާފައިވާ ދާއިރާތަކުން، ދައުލަތުގެ އިދާރާތަކާއި މުޖުތަމައު ގުޅިގެން ހަރުދަނާ ގޮތެއްގައި މަސައްކަތްތައް ކުރިއަށް ގެންދިއުމަށްޓަކައި، ނުރައްކާތެރިކަން ހައްދުފަހަނައެޅުން ފެތުރުން ހުއްޓުވުމުގެ މަސައްކަތްތައް ކުރިއަށް ގެންދާނެ ގޮތުގެ އެކްޝަން ޕްލޭނެއްް އެކުލަވާމުލުގެ މަސައްކަތް ކަމާގުޅޭ މުއައްސަސާތަކާ ގުޅިގެން ފެށިފައިވާ ކަމަށެވެ.
މި އެކްޝަން ޕްލޭން އެކުލަވާލުމުގައި ހިމަނަންޖެހޭ މުހިއްމު ކަންތައްތަކާ ގުޅޭގޮތުން ހިޔާލު ހުށައަޅުއްވަން ބޭނުންވާ ފަރާތްތަކަށް އެ ފުރުސަތު އާންމުކޮށް ހުޅުވާލެވިފައިވާ ކަމަުގައި އެ ސެންޓަރުން ބުނެއެވެ. އެގޮތުން ހިޔާލު ހުށަހަޅަން ބޭނުންވާ ފަރާތްތައް އަންނަ މަހުގެ 10 ވަނަ ދުވަހުގެ ކުރިން ހިޔާލު ހުށަހެޅުމަށާއި، އަދި ހިޔާލު ހުށަހެޅުމަށް އެ ސެންޓަރުގެ އީމެއިލް އެޑްރެސް [email protected] ހުށަހެޅުމަށް އެ ސެންޓަރުން އެދިފައި ވެއެވެ.
މިދިޔަ ސެޕްޓެމްބަރު މަހު އދގެ އާންމު މަޖިލީހުގެ ޖަލްސާގައި ތަގުރީރު ކުރައްވަމުން ރައީސް އިބްރާހިމް މުހައްމަދު ސޯލިހް ވަނީ ހަރުކަށި ފިކުރުތަކާއި ހައްދުފަހަނަ އަޅާދިޔުމާ ގުޅޭގޮތުން "ސްޓްރެޓެޖިކް ރެސްޕޮންސެސް ޓު ޓެރަރިސްޓް އެންޑް ވަޔަލެންޓް އެކްސްޓްރީމިޒަމް ލީޑާޒް ޑައިލޮގް" ގައި ބައިވެރިވެވަޑައިގެންފައެވެ. ރައީސްގެ މި ތަގްރީރުގައި، ޓެރަރިޒަމް ފެތުރުމަށާއި، ދީނީ ހަރުކަށިކަން ފެތުރުމުގައި އިންޓަނެޓްގެ އޮންލައިން ޕްލެޓްފޯމްތައް ބޭނުންކުރުން ހުއްޓުވަން ފިޔަވަޅު އެޅުމުގައި ރާއްޖޭގެ ފުރިހަމަ އެއްބާރުލުން ލިބޭނެކަމުގެ ޔަގީންކަން ބައިނަލްއަގްވާމީ މުޖްތަމައަށް ވަނީ ދެއްވާފައެވެ.
