ސުޕްރީމް ކޯޓުގެ ފަނޑިޔާރު އާދަމް މުހައްމަދު އަބްދުﷲއާ ބެހޭ ގޮތުން ޖޭއެސްސީން ބަލަމުންދާ ޝަކުވާ ޝަކުވާ ތަހުގީގު ކުރުން އަންނަ ހޯމަ ދުވަހަށް ފަސްކޮށްފިއެވެ.
މިއަދު ބޭއްވި އަޑުއެހުމުގައި، މި މައްސަލައިގެ ތަހުގީގު ފަސްކުރުމަށް ނިންމާފައިވަނީ ފަނޑިޔާރު އާދަމްގެ ފަރާތުން ގާނޫނީ ވަކީލަކު ހާޒިރު ނުވުމުގެ ސަބަބުންނެވެ. އެގޮތުން، މި އަޑުއެހުން ފަސްކޮށްފައިވާ މިއީ ދެވަނަ ފަހަރެވެ. މި އަޑުއެހުމަކީ ފަނޑިޔާރު އާދަމްގެ އެދިވަޑައިގަތުމުގެ މަތިން އާންމުކޮށް ހުޅުވާލައިގެން ކުރިއަށް ގެންދެވޭ އަޑުއެހުމެކެވެ.
ފަނޑިޔާރު އާދަމްގެ ފަރާތުން ވަކީލަކު ހާޒިރުނުވުމުގެ ސަބަބުން މިއަދުގެ އަޑުއެހުން އަންނަ ހޯމަ ދުވަހަށް ފަސްކޮށްފައިވާއިރު، އިއްޔެ ބޭއްވި އަޑުއެހުން ފަސްކޮށްފައި ވަނީ ފަނޑިޔާރުގެ ފަރާތުން ހާޒިރުވި ވަކީލު ޖޭއެސްސީން ބަލައި ނުގަތުމާއި ގުޅިގެންނެވެ.
މިއަދުގެ އަޑުއެހުމުގައި، ވަކީލަކު އައްޔަން ކުރުމުގައި ފަނޑިޔާރަށް އެކަށީގެންވާ ވަގުތު ޖޭއެސްސީން ދީފައިނުވާ ކަމަށް ބުނުމުން، ޖޭއެސްސީން ވަނީ އެކަން ދޮގުކޮށް، މިމަހު 15 ވަނަ ދުވަހުން ފެށިގެން ވަގުތު ދީފައިވާ ކަމަށާއި، ދެން މި މައްސަލައިގެ ތަހުގީގު ފަސްކުރެވޭނީ އެއްފަހަރު ކަމަށް ބުނެފައެވެ. އަދި އަންނަ ހޯމަ ދުވަހު ބާއްވާ އަޑުއެހުމުގައި ވަކީލަކު ހާޒިރުވެ ވަޑައިނުގެންނެވިއަސް، ކުރިއަށް ގެންދާނެ ކަމަށް ޖޭއެސްސީން ބުނެއެވެ.
މި މައްސަލަ ތަހުގީގު ކުރުމަށް ބޭއްވި ދެ އަޑުއެހުމުގައި ވެސް ފަނޑިޔާރު އާދަމް މުހައްމަދު ވަނީ ޖޭއެސްސީ އިން އޭނާގެ އަސާސީ ހައްގަކަށް އަރައިގެންފައިވާ ކަމަށާއި، އެމީހަކު ބޭނުންވާ ވަކީލެއް އައްޔަން ކޮށްގެން މައްސަލަތަކުގައި ކުރިއަށް ދިޔުމަކީ ކޮންމެ މީހަކަށް ވެސް ލިބިފައިވާ ހައްގެއް ކަމަށް ވިދާޅުވެފައެވެ.
މި މައްސަލާގައި ފަނޑިޔާރު އާދަމްގެ ފަރާތުން ފުރަތަމަ ވަޑައިގެންނެވި ވަކީލު، ކުރީގެ ނައިބު ރައީސް ޑރ. މުހައްމަދު ޖަމީލް އަހްމަދު ޖޭއެސްސީން ބަލައިނުގަތުމާއި ގުޅިގެން އޭނާ ވަނީ، ޖޭއެސްސީ ސިޔާސީވެ ނިމިފައި ކަމަށާއި ގާނޫނުއަސާސީން ދީފައިވާ ވަކީލެއްގެ އެހީ ހޯދުމުގެ ހައްގުވެސް ނުދިނުމުގެ އިތުރުން ފަނޑިޔާރު އާދަމް މުހައްމަދުގެ މައްސަލަ އެއީ ވަކީލެއްގެ ހައްގު ހަޖަމްނުވުމުގެ މައްސަލައެއްކަމަށް ޖަމީލް ވަނީ ވިދާޅުވެފައެވެ. އަދި މިކަމާ ޖޭއެސްސީ ލަދުވެތި ވާންޖެހޭ ކަމަށާއި، ބަހެއް ވިދާޅުވުމުގެ ފުރުސަތު ވެސް މައްސަލަ ރައްދުވާ ފަރާތަށް ނުދެއްވާ އެކަމުގައި ބާރު އޮތްކަން ޖޭއެސްސީން ދައްކާލީ ކަމަށްވެސް ޖަމީލް ވިދާޅުވެފައިވެއެވެ.
