ހދ. ކުޅުދުއްފުށީގެ "ކަކާ" ގޭގައި ރޯކޮށްލި މައްސަލާގައި މީހަކު ހައްޔަރު ކޮށްފައިވާ ކަމަށް ފުލުހުން ބުނެފިއެވެ.
"ދަ ޕްރެސް" އަށް މައުލޫމާތު ދެމުން ފުލުހުން ބުނީ، އެ ހާދިސާއާ ގުޅިގެން ކޯޓު އަމުރެއްގެ ދަށުން މިދިޔަ ހޯމަ ދުވަހު 30 އަހަރުގެ ފިރިހެނެއް ހައްޔަރުކޮށްފައިވާ ކަމަށެވެ. އަދި ކުޅުދުއްފުށި މެޖިސްޓްރޭޓް ކޯޓުން އެމީހާގެ ބަންދަށް ހަތް ދުވަސް ޖަހައިދީފައި ވާކަމަށް ވެސް ފުލުހުން މައުލޫމާތުދެއެވެ.
މި މަހުގެ 22 ވަނަ ދުވަހުގެ ރޭ ކުޅުދުއްފުށީ ކަކާގޭގައި ހުރި ސައިކަލެއްގައި ރޯވުމުން ފުލުހުން އެ ސަރަހައްދަށް ދިޔަަ އިރު ސައިކަލުގެ އިތުރުން އެ ގޭގެ އަސްކަނިގެ ސީލިންގާއި ރަށު ޕިކަޕެއްގައި ވަނީ ރޯވެ އަނދާފައެވެ. ނަމަވެސް މި މައްސަލައާ ގުޅިގެން ފުލުހުން ބުނެފައިވަނީ މިހާތަނަށް ބެލި ބެލުމުން އެކަމަކީ ގަސްދުގައި ކުރި ކަމަކަށް ބެލެވޭ ކަމަށެވެ.
ފުލުހުން ބުނީ، އެ ހާދިސާގައި އެމްއެންޑީއެފްގެ ފަޔާ އެންޑް ރެސްކިއު ޓީމަށް އަލިފާންގަނޑު ނިއްވާލެވުނު އިރު އެ އަލިފާނުގެ އަސަރު، ކަކާގެއާ އިންވެގެން ހުރި، ނަހާގެއަށް ވެސް ކޮންމެވެސް ވަރަކަށް ކޮށްފައިވާ ކަމަށެވެ.
