އައިލެންޑް އޭވިއޭޝަނަށް (އައިއޭއެސް) ގެ ހަރަދުތައް މައްޗަށްގޮސް، މިއަހަރުގެ ދެވަނަ ކުއާޓާގައި އެ ކުންފުންޏަށް 10 މިލިއަން ރުފިޔާގެ ބޮޑު ގެއްލުމެއް ލިބިިފައިވާ ކަމަށް، ޕްރައިވެޓައިޒޭޝަން އެންޑް ކޯޕަރައިޒޭޝަން ބޯޑް (ޕީސީބީ)އިން ބުނެފި އެވެ.
ޕީސީބީއިން ނެރެފައިވާ ރިވިއު ރިޕޯޓުގައިވާ ގޮތުގައި، މިއަހަރުގެ ދެވަނަ ކުއާޓަރުގައި އައިއޭއެސްއަށްވަނީ 10.75 މިލިއަން ރުފިޔާގެ ގެއްލުމެއް ލިބިފައި ކަމަށެވެ. އައިއޭސްއަށް މި އަހަރުގެ ދެވަނަ ކުއާޓަރުގައި ބޮޑު ގެއްލުމެއް ކުރިމަތިވެފައިވީ ނަމަވެސް، މި އަހަރުގެ ފުރަތަމަ ކުއާޓަރުގައި އެ ކުންފުންޏަށްވަނީ، ވިޔަފާރި ކުރުމަށް 300.62 މިލިއަން ރުފިޔާ ހަރަދުކޮށްގެން އާމްދަނީގެ ގޮތުގައި، 541.52 މިލިއަން ރުފިޔާ ހޯދާފަ އެވެ. އަދި ފައިދާއަށް 104.98 މިލިއަން ރުފިޔާ ލިބުނެވެ. ނަމަވެސް މި އަހަރުގެ ދެވަނަ ކުއާޓާގައި އައިއޭސްއިން ވިޔަފާރި ކުރުމަށް 319.98 މިލިއަން ރުފިޔާގެ ހަރަދުކުރި ނަމަވެސް، އާމްދަނީގެ ގޮތުގައި ލިބުނީ 457.94 މިލިއަން ރުފިޔާ އެވެ. އެއީ، މި އަހަރުގެ ފުރަތަމަ ކުއާޓަރުގައި ލިބުނު އާމްދަނީއާ އަޅާބަލާއިރު، 83.58 މިލިއަން ރުފިޔާ މަދު އަދަދެކެވެ. އެހެނަކަމުން އެ ކުންފުންޏަށް 10.75 މިލިއަން ރުފިޔާގެ ގެއްލުމަކާ ކުރިމަތިލާންޖެހުނެވެ.
ޕީސީބީގެ ރިޕޯޓްގައިވާ ގޮތުގައި، އައިއޭއެސްއަށް ގެއްލުންވާން ދިމާވި މައިގަނޑު ސަބަބަކީ ކުންފުނީގެ އާމްދަނީ ދަަށަށް ދިޔަ ނަމަވެސް ހަރަދުތައް މައްޗަށް ދިޔުމެވެ. އެގޮތުން ކުންފުނީގެ އާމްދަނީއިން 83.58 މިލިއަން ރުފިޔާ މަދުވި ނަމަވެސް، ހަރަދުތައް ވަނީ 142.03 މިލިއަން ރުފިޔާއަށް އިތުރުވެފަ އެވެ. ޕީސީބީގެ ރިޕޯޓުން ދައްކާގޮތުން ކުންފުނީގެ ހަރަދުތައް އިތުރުވެފައިވަނީ، މުވައްޒަފުންގެ މުސާރަ އާއި އެލަވަންސްތަކުގެ ބައިން އެވެ. އެބައިގެ ހަރަދުތަކަށް 8.69 މިލިއަން ރުފިޔާ އިތުރުވެ، 100.29 މިލިއަން ރުފިޔާއަށް ވަނީ ހަރަދުތައް ބޮޑުވެފަ އެވެ. މީގެ އިތުރުން އެ ކުންފުނީގެ އާމްދަނީ ދަށަށް ދިޔަ މައިގަނޑު އެއް ސަބަބުގެ ތެރޭގައި، ޑޮމެސްޓިކް ދަތުރުތަކުގެ ބައިން ލިބުނު އާމްދަނީ ދަށަށް ދިއުން ހިމެނެ އެވެ. އެގޮތުން އެބައިން އާމްދަނީ ވަނީ 233.78 މިލިއަން ރުފިޔާއަށް ވެއްޓިފަ އެވެ.
މިދިޔަ އަހަރުގެ ދެވަނަ ކުއާޓަރުގައި އައިއޭއެސް އިން ވަނީ 68.05 މިލިއަން ރުފިޔާގެ ފައިދާއެއް ހޯދައިފަ އެވެ. ރިޕޯޓްގައިވާ ތަފާސްހިސާބުތަކަށް ބަލާއިރު އައިއޭއެސްއަށް ދެވަނަ ކުއާޓަރުގައި ލިބިފައިވާ ގެއްލުމަކީ މިދިޔަ އަހަރުގެ އެ މުއްދަތުގައި ލިބުނު ފައިދާއާ އަޅާބަލާ އިރު، 116 ޕަސެންޓް ދަށް އަދަދެކެވެ. އެއީ، 78.79 މިލިއަން ރުފިޔާ މަދު އަދަދެކެވެ.
އައިއޭސްގެ އާމްދަނީ އިތުރުވި ހަމައެކަނި ވިޔަފާރިއަކީ ސަރަހައްދީ ގައުމުތަކަށް ކުރާ ދަތުރުތަކުން އެވެ. އެގޮތުން އެ ދަތުރުތަކުން ލިބޭ އާމްދަނީއަށް 11.39 މިލިއަން ރުފިޔާ އިތުރުވެ 9 ޕަސެންޓް ވަނީ އިތުރުވެފަ އެވެ. އެ ދަތުރުތަކުން މިއަހަރުގެ ދެވަނަ ކުއާޓަރުގައި އައިއެސްއޭއަށް ވަނީ 138.86 މިލިއަން ރުފިޔާ ލިބިފަ އެވެ.
ރިޕޯޓްގައިވާގޮތުން ކުންފުނީގެ ދަރަނި ވަނީ 73 މިލިއަން ރުފިޔާ އިތުރުވެ، 647.75 މިލިއަން ރުފިޔާއަށް އަރައިފަ އެވެ. އަދި ކުންފުންޏަށް އެކި ފަރާތްތަކުގެ އަތުން ލިބެން ހުރި ފައިސާގެ އަދަދުވެސް ވަނީ، 17 މިލިއަނެއްހާ ރުފިޔާ އިތުރުވެފަ އެވެ. އައިއޭއެސްއަށް ދިމާވެފައިވާ ހާލަތުން އަރައިގަންނަން ޕީސީބީގެ ރިޕޯޓްގައި ލަފާދީފައިވަނީ، މުވައްޒަފުންގެ މުސާރައާއި އެހެން ވެސް ހަރަދުތައް ބޮޑުވަމުން ދާ ދިޔުން ކޮންޓްރޯލްކޮށް އެ ހަރަދުތައް ކުޑަކުރެވޭނެ ހަރުދަނާ އުސޫލުތަކެއް އެކުލަވާލުމަށެވެ. އަދި ޑޮމެސްޓިކް ދަތުރުތަކުގެ އާމްދަނީ ދަށްވާތީ، އެކަމަށް ހައްލުތަކެއް ހޯދުމަށް ކުންފުނިން މަސައްކަތް ކުރުމަށް ވެސް ވަނީ ލަފާދީފަ އެވެ.
އައިއެއެސްއަކީ މޯލްޑިވިއަންގެ ނަމުގައި ފްލައިޓް އޮޕަރޭޓް ކުރާ ކުންފުންޏަކަށް ވާއިރު، އެ ކުންފުނީގައި ތިބި ސީނީއާ މުވައްޒަފުންތަކެއްގެ މުސާރަ އެތައް ގުނައެއް ބޮޑު ކުރި މައްސަލައަކާއި، ގިނަ އަދަދެއްގެ މުވައްޒަފުންތަކެއް ވަޒީފާއިން ކެނޑިފައިވާ މައްސަލަތަކެއްވެސް މިދޭތެރެއިން ފެންމަތިވިއެވެ.
