ރާއްޖެއަށް ކުރަމުްނދާ ވިއްސާރައިގައި ކޮޅިގަނޑުގެ ބާރު ގަދަވެއްޖެ ކަމަށާއި ކުރިއަށް އޮތް 24 ގަޑިއިރު ތޭރެ ރާއްޖޭގެ އެކި ހިސާބުތަކަށް މޫސުން ގޯސް ވާނެކަމަށް މޫސުމާ ބެހޭ އިދާރާ މެޓް އޮފީހުން ބުނެފިއެވެ.
މެޓް އޮފީހުން ބުނީ، ކުރިއަށް އޮތް 24 ގަޑިއިރު ތެރޭގައި ރާއްޖޭގެ ބޮޑުބަޔަކަށް ގުގުރުމާއެކު ވިއްސާރަކުރާނެ ކަމަށެވެ. އަދި ބައެއް ރަށްތަކަށް ބޯކޮށް ވާރޭ ވެހި ވިލާގަނޑުގައި ވައި ގަދަވާނެ ކަމަށްވެސް އެ އިދާރާއިން ލަފާ ކުރެއެވެ. މީގެ އިތުރުން ބޯކޮށް ވާރޭ ވެހި، ވައި ގަދަވެ، ކަނޑުވެސް ގަދަވެ، ބައެއް ރަށްތަކަށް އުދައިގެ އަސަރު ކުރާނެ ކަމަށް ލަފާ ކުރެވޭތީ އެ އިދާރާއިން ވަނީ މޫސުމަށް ސަމާލުވުމަށް އެދިފައެެވެ.
ރާއްޖޭގެ އުތުރުގެ ސަރަހައްދުގައި އުފެދިފައިވާ ކޮޅިގަނޑު މިހާރު ވަނީ އިތުރަށް ބާރުގަދަވެ ބާރުގަދަ ކޮޅިގަނޑަކަށް ބަދަލުވެފައި ކަމަށް މޫސުމާ ބެހޭ އިދާރާއިން މައުލޫމާތު ދެއެވެ. މިހާރު ކޮޅިގަނޑު ހުރީ ހއ. ތުރާކުނުގެ އިރުން 370 ކިލޯ މީޓަރު ދުރުގައެވެ.
އެހެން ނަމަވެސް މި ކޮޅިގަނޑާ ގުޅިފައިވާ ބޯ ވިއްސާރަ ވިލާތައް އަދިވެސް އުތުރާއި މެދުރާއްޖެތޭރެގެ މައްޗަށް އަރަމުން ދާނެ ކަމަށާއި، ލަފާކުރެވޭ ގޮތުގައި ކުރިއަށް އޮތް 24 ގަޑިއިރު ތެރޭގައި މި ކޮޅިގަނޑު އިތުރަށް ބާރުގަދަވެ، ހުޅަނގު އުތުރަށް ދަތުރުކޮށް ރާއްޖެއާ ދުރަށް ޖެހެމުން ދާނެ ކަމަށް އެ މެޓް އޮފީހުން ބުނެއެވެ.
ވިއްސާރައިގައި އުދަ އަރާނެ ކަމަށް އިއްޔެ ވެސް މެޓް އޮފީހުން ވަނީ ބުނެފައެވެ. މިކަމަށް ތައްޔާރު ވުމުގެ ގޮތުން އެމްޑީއެފް އަދި ފުލުހުންނާއި ރަށްރަށުގެ އާންމު ރައްޔިތުންވެސް ދަނީ ވެލިބަސްތާތައް ޖަހާ ރައްކާތެރިކަމަށް ފިޔަވަޅު އަޅަމުންނެވެ.
